(Source: ECI/ABP News/ABP Majha)
Breaking News LIVE : 6 ते 9 सप्टेंबर दरम्यान संपूर्ण महाराष्ट्रात मुसळधार पावसाची शक्यता
Breaking News LIVE Updates, 6 September 2021: दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित सर्व बातम्या केवळ एका क्लिकवर...
LIVE
Background
Belgaum Municipal Corporation Election : बेळगाव महानगरपालिका निवडणुकीची मतमोजणी आज (सोमवारी) सकाळी आठ वाजता सुरु होणार आहे. या निवडणुकीत भाजप, काँग्रेस या राष्ट्रीय पक्षांनी प्रथमच पक्षाच्या चिन्हावर निवडणूक लढवली आहे. भाजप, काँग्रेस बरोबर आप, एमआयएम, निधर्मी जनता दल देखील निवडणुकीच्या रिंगणात उतरले आहेत. बेळगाव महानगरपालिका निवडणुकीची मतमोजणी बीके मॉडेल हायस्कूल येथे सोमवारी होणार असून सकाळी आठ वाजता मतमोजणीला प्रारंभ होणार आहे.
बेळगाव महानगरपालिका निवडणुकीसाठी (Belgaum Municipal Corporation Election) एकूण 58 प्रभागांची मतमोजणी होणार आहे. एकूण 385 उमेदवार निवडणुकीच्या रिंगणात आहेत. भाजप 55, काँग्रेस 45, महाराष्ट्र एकीकरण समिती 21, जेडीएस 11, आम आदमी 37, एआयएमआयएम 7, अन्य दोन आणि अपक्ष 217 उमेदवारांचे भवितव्य सोमवारी ठरणार आहे. मतमोजणी केंद्रात पाचशे पोलीस बंदोबस्तासाठी तैनात करण्यात आले आहेत. मतमोजणी केंद्राच्या परिसरात 144 कलम जारी करण्यात आले आहे. शहरात मतमोजणी दरम्यान कोणताही अनुचित प्रकार घडू नये म्हणून शहरात 1500 पोलीस बंदोबस्तासाठी नेमण्यात आले आहेत. मतमोजणी केंद्राकडे जाणारे सगळे रस्ते बॅरिकेड्स लावून बंद करण्यात आले आहेत. दुपारी बारा वाजेपर्यंत सगळे निकाल जाहीर होण्याची शक्यता आहे. अनेक माजी महापौर, उप महापौर निवडणुकीपासून अलिप्त राहिले आहेत. निवडणुकीच्या रिंगणात बहुतांश चेहरे नवीन आहेत.
गेल्या दोन वर्षांपासून प्रलंबित असलेल्या बेळगाव महानगरपालिका निवडणुकांसाठी 3 सप्टेंबर रोजी मतदान पार पडलं असून आज, 6 सप्टेंबर रोजी निवडणुकीचा निकाल जाहीर केला जाणार आहे. मराठी भाषिकांनी बेळगावचा गड राखण्याची तयारी सुरु केली होती. बेळगाव महानगरपालिका निवडणुकीसाठी शुक्रवारी सकाळी सात ते संध्याकाळी सहा वाजेपर्यंत मतदान पार पडलं.
Shravan 2021 : आज शेवटचा श्रावणी सोमवार, पंढरपूरच्या विठ्ठल मंदिराला आकर्षक फुलांची आरास
आज पवित्र श्रावण महिन्याचा शेवटचा दिवस, म्हणजेच शेवटचा श्रावणी सोमवार. या निमित्तानं पंढरपूरच्या विठ्ठल मंदिरात फुलांची आकर्षक सजावट करण्यात आली आहे. भक्त युवराज मुचलंबे यांनी विठ्ठल चरणी फुल सजावटीची सेवा अर्पण केली आहे. आज सोमवती अमावास्या आणि श्रावणी सोमवार असल्यानं हरिहराचं प्रतीक असलेल्या विठ्ठल मंदिरात अत्यंत मनमोहक अशी फुलांची सजावट करण्यात आली आहे. विठ्ठल मंदिराच्या चौखांबी आणि सोळखांबी मध्ये रंगसंगती साधत फुलांचे पडदे, फुलांची झुंबरं आणि मंडप बनविण्यात आला असून विठ्ठल रुक्मिणी समोर फुलांच्या आकर्षक रांगोळीच्या पायघड्या देखील घालण्यात आल्या आहेत. झेंडू, गुलछडी, गुलाब, लिली अशा विविध रंगांच्या फुलांचा या सजावटीसाठी वापर केला असून विठ्ठल मंदिरातील कर्मचारी असलेल्या शिंदे बंधू यांनी ही आकर्षक फुल सजावट साकारली आहे.
संपूर्ण महाराष्ट्रात पुढील 4-5 दिवस चांगल्या पावसाचा अंदाज, काही ठिकाणी अतिवृष्टीची शक्यता
ऑगस्ट संपता संपता महाराष्ट्राला वरुणराजाने काहीसा दिलासा दिला आहे. महाराष्ट्रात सर्वत्र पावसाची हजेरी बघायला मिळत आहे. बंगालच्या उपसागरात कमी दाबाचे क्षेत्र पुढील 24 तासात तीव्र होत आहे. तसेच पूर्व पश्चिम वाऱ्यांचा वेग चांगला असल्यानं दक्षिणेसह संपूर्ण महाराष्ट्रात पुढील 4-5 दिवस चांगल्या पावसाचा अंदाज भारतीय हवामान विभागाकडून वर्तवण्यात आला आहे. देशासह महाराष्ट्रात मागील काही दिवसांपासून चांगला पाऊस होत असल्यानं शेतकऱ्यांची चिंता काही अंशी कमी झाली आहे. विदर्भ, मराठवाड्यात मागील 2-3 दिवसापासून मुसळधार पाऊस बघायला मिळत आहे. त्यात काल मराठवाड्यातील अनेक धरणांच्या पाणीपातळीत देखील चांगली वाढ झाली आहे.
कमी दाबाचे क्षेत्र पुढील 24 तासात चक्रीय स्थितीत याचे रुपांतर होत असल्याने विदर्भात आजपासून पुढील 2 दिवस काही ठिकाणी मुसळधार तर काही ठिकाणी अति मुसळधार पावसाचा अंदाज वर्तवण्यात आला आहे. कोकण, मध्य महाराष्ट्रात देखील पुढील 4-5 दिवस चांगला पाऊस बघायला मिळू तर काही ठिकाणी अतिवृष्टीची देखील शक्यता भारतीय हवामान विभागाकडून वर्तवण्यात आली आहे.
चंद्रपूर : सचिन तेंडुलकर यांनी पोळ्यानिमित्त केली बैलांची पूजा
चंद्रपूर : सचिन तेंडुलकर यांनी पोळ्यानिमित्त केली बैलांची पूजा. ताडोबा सफारीसाठी चंद्रपूर जिल्ह्यात आलेल्या सचिन तेंडुलकर यांनी आज संध्याकाळी त्यांचा मुक्काम असलेल्या रिसॉर्टमध्ये बैलांची पूजा करून शेतकऱ्यांप्रती आपली कृतज्ञता व्यक्त केली. त्यांच्या रिसॉर्टजवळ असलेल्या तुकूम या गावातील 2 शेतकरी तेजराम खिरडकर आणि विनोद निखाडे आपली बैलजोडी घेऊन रिसॉर्टमध्ये आले होते. तेव्हा सचिन तेंडुलकर यांनी बैलांची पूजा केली आणि शेतकऱ्यांना टॉवेल आणि पैसे देऊन त्यांचे धन्यवाद मानले.
यवतमाळ शहरासह नेर तसेच पुसद परिसरात जोरदार हजेरी
यवतमाळ : आज सायंकाळी आलेल्या धुवाधार पावसाने यवतमाळ शहरासह नेर तसेच पुसद परिसरात जोरदार हजेरी लावली. सोसाट्याच्या वाऱ्या व विजेच्या कडकडाटासह पाऊस बरसला. नेर तालुक्यातील वाई हातोला, पिंपरी कलगा, आनंदनगर, टाकळी सलामी या भागात गारपीटसुद्धा झाली. पावसाळ्या दरम्यान शहरातील वीजपुरवठा खंडित झाला. या अचानक आलेल्या पावसामुळे बैल पोळा सण साजरा करणाऱ्या शेतकऱ्यांची धावपळ उडाली
6 ते 9 सप्टेंबर दरम्यान संपूर्ण महाराष्ट्रात मुसळधार पावसाची शक्यता
बंगालच्या उपसागरात निर्माण झालेल्या कमी दाबाच्या पट्ट्यामुळे 6 ते 9 सप्टेंबर दरम्यान संपूर्ण महाराष्ट्रात मुसळधार पावसाची शक्यता आहे. ही माहिती मुंबई प्रादेशिक हवामान विभागाच्या शुभांगी भुते यांनी दिली,
नाईट कर्फ्यु लावला जाणार नाही, विजय वडेट्टीवार यांची माहिती
मुंबई, पुणे सह अनेक शहरात कोरोना वाढत असल्याचे प्राथमिक संकेत आहेत.. समोर सणासुदीचा काळ आहे.. लोकांनी जास्त गर्दी करू नये, काही नवे निर्बंध लावण्यासाठी मुख्यमंत्री एक दोन दिवसात तज्ञांसोबत चर्चा करून निर्णय घेतील.. काही नवे नियम लागू केले जाऊ शकतील, मात्र ते दोन तीन दिवसात निर्णय घेतले जातील.. नाईट कर्फ्यु लावला जाणार नाही, तशी चर्चा ही आजच्या बैठकीत झालेली नाही...- मंत्री विजय वडेट्टीवार
कोरोनाच्या पार्श्वभूमीवर निर्बंध कायम असलेल्या 'त्या' 11 जिल्ह्यांतील कनिष्ठ न्यायालयं पूर्ण क्षमतेनं सुरू करा
कोरोनाच्या पार्श्वभूमीवर निर्बंध कायम असलेल्या 'त्या' 11 जिल्ह्यांतील कनिष्ठ न्यायालयं पूर्ण क्षमतेनं सुरू करा
मुंबई उच्च न्यायालयाच्या प्रशासकीय समितीचे निर्देश
पुणे, रायगड-अलिबाग, रत्नागिरी, सिंधुदूर्ग, सातारा, सोलापूर, कोल्हापूर, सांगली, अहमदनगर, बीड आणि पालघरचा समावेश
परिस्थिती पूर्वपदावर येत असल्यानं न्यायलयं 100 टक्के क्षमतेनं सुरू करण्याचे निर्देश
महत्त्वाच्या बातम्या
ट्रेंडिंग न्यूज
