Breaking News LIVE | शेतकरी नेते राकेश टीकेत यवतमाळच्या महापंचायत मध्ये येणार नाहीत

Breaking News LIVE Updates, 19 February 2021: दिवसभरातील ताज्या घडामोडी, महत्त्वाचे अपडेट्स या लाईव्ह ब्लॉगमध्ये आपल्याला मिळतील. देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

Rajesh Tope | आरोग्यमंत्री राजेश टोपे यांना कोरोनाची लागण
मुंबई : राज्याचे आरोग्यमंत्री राजेश टोपे यांना कोरोनाची लागण झाली आहे. त्यांचा कोरोना चाचणी अहवाल पॉझिटिव्ह आला असून स्वतः आरोग्यमंत्री राजेश टोपे यांनी यासंदर्भात ट्वीट करुन माहिती दिली आहे. आरोग्यमंत्र्यांनी ट्वीटमध्ये त्यांच्या संपर्कात आलेल्यांनी काळजी घेण्याचं आणि लक्षणं आढळल्यास तत्काळ चाचणी करुन घेण्याचं आवाहनही केलं आहे.

 

भारतीय संस्कृतीनुसार स्त्रीच्या कमरेखाली हात लावणं म्हणजे तिच्या शालीनतेला हात घालणं : मुंबई सत्र न्यायालय

 

मुंबई : भारतीय संस्कृतीमध्ये एका स्त्रीच्या कमरेखाली हात लावणं म्हणजे तिच्या शालिनतेला हात घालणंच. गुगलमध्ये जरी त्याचा खाजगी भाग असा उल्लेख नसला तरी इथं तो गुन्हाच आहे, असं महत्त्वपूर्ण निरीक्षण मुंबई सत्र न्यायालयातील विशेष पोक्सो कोर्टानं नोंदवलं आहे. न्यायधीश अभिजीत नांदगावकर यांनी एका प्रकरणात 10 वर्षीय मुलीच्या पार्श्वभागाला स्पर्श केल्याच्या आरोपाखाली एका 22 वर्षीय आरोपीला पाच वर्षांच्या तुरुंगवासाची शिक्षा ठोठावली आहे. आरोपीनं लैंगिक भावना मनात ठेवूनच या मुलीच्या पार्श्वभागाला हात लावल्याचं इथं सिद्ध होत आहे, असंही न्यायालयानं आपल्या निकालात नमूद केलं आहे.

 

शिवजयंतीनिमित्त रायगडावर केलेल्या रोषणाई वरून खा. संभाजीराजे यांनी पुरातत्व खात्याला फटकारलं
पुणे : छत्रपती शिवाजी महाराज यांच्या जयंतीनिमित्त रायगडावर करण्यात आलेल्या रोषणाई वरून खासदार संभाजीराजे यांनी ट्विट करून पुरातत्व खात्याला फटकारले आहे. या संदर्भात खासदार संभाजीराजे यांनी सोशल मीडियावर पोस्ट लिहीत या गोष्टीचा निषेध केला आहे. दरम्यान, या विषयावर सविस्तर भूमिका मांडण्यासाठी उद्या (19 फेब्रुवारी) रोजी शिवनेरी किल्ल्यावर पत्रकार परिषद घेऊन संभाजीराजे पत्रकार बांधवांशी संवाद साधणार आहेत. "भारतीय पुरातत्त्व विभागाने 19 फेब्रुवारी रोजी शिवजयंती निमित्ताने रायगड किल्ल्यावर जी प्रकाशयोजना केली आहे, ती अतिशय विचित्र स्वरूपाची आणि महान वारशाचा अपमान करणारी आहे. भारतीय पुरातत्त्व विभागाच्या इतिहासात आजचा दिवस काळा दिवस म्हणून गणला जाईल. त्यांचे अधिकारी महान ऐतिहासिक स्थळांच्या प्रती इतके असंवेदनशील झाले आहेत की, रंगबेरंगी प्रकाश योजना वापरुन हे पवित्र स्मारक डिस्कोथेक सारखे दिसत आहे. एक शिवभक्त म्हणून मी मनातून दु:खी झालो असून या प्रकारचा मी तीव्र निषेध करतो", अशा भावना खासदार संभाजीराजे यांनी व्यक्त केल्या आहेत.

 

राज्य सहकारी बँक घोटाळा प्रकरण : उपमुख्यमंत्री अजित पवार, हसन मुश्रीफ यांच्यासह 65 संचालकांना दिलासा
मुंबई : राज्य सहकारी बँक घोटाळा प्रकरणी उपमुख्यमंत्री अजित पवार, हसन मुश्रीफ यांच्यासह 65 संचालकांना दिलासा मिळाला आहे. सहकार विभागाच्या अहवालामध्ये अजित पवार यांच्यासह 65 संचालकांना क्लिन चिटस देण्यात आली आहे. यापूर्वी एसआयटीनेही अजित पवार यांच्यासह राज्य सहकारी बँकेवरील 75 जणांना क्लीन चीट दिली होती. राज्य सहकारी बँक घोटाळा प्रकरण समोर आलं होतं. या प्रकरणामुळे राजकीय वर्तुळात खळबळ माजली होती. राज्य सहकारी बँक घोटाळा प्रकरणी राष्ट्रवादीचे नेते आणि राज्याचे उपमुख्यमंत्री अजित पवारांना दिलासा मिळाला आहे. राज्याच्या सहकार विभागाने राज्य सहकारी बँकेतील कथित घोटाळा प्रकरणी चौकशी करण्यासाठी एका समितीची स्थापना केली होती. या समितीने आपला अहवाल सहकार आयुक्तांकडे सादर केला आहे. सुत्रांकडून मिळालेल्या माहितीनुसार, या चौकशी समितीच्या अहवालात अजित पवार, हसन मुश्रीफ यांच्यासह तत्कालीन 65 संचालकांना दिलासा देण्यात आलेला आहे. याप्रकरणी उपमुख्यमंत्री अजित पवार, खासदार विजयसिंह मोहिते-पाटील, बँकेचे तत्कालीन अध्यक्ष माणिकराव पाटील, उपाध्यक्ष बाळासाहेब सरनाईक, आनंदराव आडसूळ आदिंच्या नावाचा समावेश करण्यात आला होता.

22:52 PM (IST)  •  19 Feb 2021

शेतकरी नेते राकेश टीकेत यवतमाळच्या महापंचायत मध्ये येणार नाही: किसान आघाडीचे संदीप गिड्डे यांची माहिती. राकेश टिकेत यांना कोणीतरी यवतमाळ पोलीस अधीक्षक असे बोलतो म्हणून सांगून कोरोना संसर्ग वाढतोय त्यामुळे आपण आल्यास 14 दिवस कोरोनटाईन राहावे लागेल आणि असं सांगितलं गेलं त्यामुळे राकेश टिकेत हे येणार नाही असे संदीप गिड्डे यांनी सांगितले.

23:38 PM (IST)  •  19 Feb 2021

गेल्या तीन दिवसापासून कल्याण-डोंबिवलीत करुणा चा आकडा वाढत असून आज 145 रुग्ण आढळून आले आहेत .काही महिन्यांपूर्वी हॉटस्पॉट ठरलेल्या कल्याण डोंबिवलीने आता कुठे मोकळा श्वास घेतला होता मात्र पुन्हा एकदा कोरोनाच संकट कल्याण-डोंबिवली वर घोंगावत आहे या पार्श्वभूमीवर महापालिका सतर्क झाले असून महापालिका व पोलिस प्रशासनातर्फे गर्दी न करण्याचा झ सोशल डिस्टंसिंग पाळण्याचे, मास्क वापरण्याचे आवाहन केले जाते मात्र असे असले तरी राजकीय पदाधिकारी मात्र कोरोना नियमांचे सर्रास पायमल्ली करताना दिसत आहेत .दोन दोन दिवसापूर्वी भाजप कार्यकर्ते संदीप माळी यांच्या वाढदिवसाला हजारांची गर्दी जमली होती , याची गंभीर दखल घेत महापालिका प्रशासनाने संदीप माळी यांच्यासह चार जणांविरोधात गुन्हे दाखल केले होते .या घटनेला 48 तास उलटत नाहीत तोच पुन्हा एकदा भाजपा नगरसेवक संदीप गायकर यांचे आयोजित केलेल्या हळदीकुंकू कार्यक्रमाला शेकडो महिलांनी हजेरी लावल्याचे समोर आले आहे .हा व्हिडीओ सोशल मीडियावर व्हायरल होत आज पुन्हा एकदा या राजकीय नेत्यांना सामाजिक भान आहे की नाही असा सवाल उपस्थित झाला आहे .

22:36 PM (IST)  •  19 Feb 2021

लातूर जिल्ह्यात आज ४८ कोरोना रुग्णांची भर. यामध्ये मनपा हद्दीतील २० रुग्ण, जिल्ह्यातील इतर भागातील २८. आज बरे झालेले ३७ रुग्ण, आजचे मृत्यू : ००, मयतांचा आकडा ६९९.

21:11 PM (IST)  •  19 Feb 2021

पुणे जिल्ह्यात आज दिवसभरात 1015 कोरोना रुग्णांची नोंद. तर 6 जणांचा मृत्यू. आज बऱ्याच दिवसांनी किंबहुना काही महिन्यांनी पुण्यातील कोरोना रुग्णांच्या एका दिवसातील संख्येने एक हजारांचा टप्पा ओलांडलाय.

21:40 PM (IST)  •  19 Feb 2021

एकीकडे सरकार आणि प्रशासन कोविड लस घेण्यासाठी मोठ्या प्रमाणत लसीकरण मोहीम आखत आहे. मात्र, दुसरीकडे ही लस घेतल्यानंतर देखील अनेकांना कोरोना होत असल्याचे समोर येत आहे. दहा दिवसांपूर्वी कोविड लस घेतलेल्या घाटकोपर पोलीस ठाण्याच्या तीन पोलीस कर्मचाऱ्यांना कोरोनाची लागण झाली आहे. सुरेश विष्णू ढोमे, शरद गुलाब तडवी, लक्ष्मण शिवले अशी या कर्मचाऱ्यांची नावे आहे. हे तिघेही निगराणी पथकात कार्यरत आहेत. त्यांनी दहा दिवसांपूर्वी राजावाडी रुग्णालयात लसीकरण करून घेतले होते. मात्र, 17 आणि 18 रोजी हे तिन्हीजण कोरोना पोजिटिव्ह आढळले आहेत. यातील ढोमे हे डोंबिवली येथील खाजगी रुग्णालयात तर तडवी आणि शिवले यांच्यावर सेव्हन हिल रुग्णालयात उपचार सुरू आहेत. त्यामुळे आता लसीकरण केलेल्या पोलिसात देखील संभ्रम निर्माण झाला आहे.