(Source: ECI/ABP News/ABP Majha)
Maharashtra Election 2024 : विधानसभेसाठी भाजपची नवी रणनीती; राज्यभरात महाजनसंपर्क अभियान, दिग्गज नेत्यांचाही सहभाग
Election 2024: भाजपने राज्यात महाजनसंपर्क अभियान राबविण्याचे ठरवले आहे. उद्या, 6 ऑक्टोबरला नागपुरातून या महाजनसंपर्क अभियानाला सुरुवात होणार आहे. त्या पाठोपाठ राज्यभरात हे अभियान राबवले जाणार आहे.
Maharashtra Politics नागपूर: लोकसभा निवडणुकीत राज्यात आणि विशेषत:विदर्भात जबर दणका बसल्यानंतर आता भाजपने विधानसभा निवडणुकीसाठी (State Legislative Assembly Election 2024) चांगलीच कंबर कसली आहे. त्यासाठी भाजपचे केंद्रीय गृहमंत्री अमित शाह (Amit Shah) हे नुकतेच महाराष्ट्राच्या दौऱ्यावर येऊन गेले आहेत. दरम्यान, अमित शाह (Amit Shah) हे नागपूर येथे देखील येऊन गेले आहेत. यावेळी त्यांनी भाजप नेते, पदाधिकारी आणि कार्यकर्त्यांना मार्गदर्शन केले होते. यावेळी अमित शाह यांनी विधानसभा निवडणुकीत आपले प्रमुख उद्दिष्ट सांगत भाजपच्या (BJP) सर्व स्थरातील नेते, पदाधिकारी आणि कार्यकर्त्यांना पूर्ण ताकदीने कामाला लागण्याच्या सूचना दिल्या आहेत. त्या अनुषंगाने आता भाजपचे सर्व नेते नवनवीन रणनीती आखत विधानसभेसाठीची तयारी करताना दिसत आहे. दरम्यान, आता भाजपने राज्यात महाजनसंपर्क अभियान राबविण्याचे ठरवले आहे. उद्या म्हणजेच 6 ऑक्टोबरला नागपुरातून या महाजनसंपर्क अभियानाला सुरुवात होणार आहे. त्यानंतर नागपूर पाठोपाठ राज्यभरात हा महाजनसंपर्क अभियान राबवला जाणार आहे.
दिग्गज नेत्यांचाही सहभाग
विधानसभेसाठी भाजप महाजनसंपर्क अभियान राबवणार आहे. या माध्यमातून एकाच वेळी शहरातील सर्व कार्यकर्ते घराबाहेर पडून घरोघरी जाऊन संपर्क साधतील. 6 तारखेला सकाळी 8 ते दुपारी 12 दरम्यान हे महाजनसंपर्क अभियान होणार आहे. विशेष म्हणजे केंद्र, राज्य पातळीवरील वरिष्ठ मंत्रीही यात सहभागी होऊन कार्यकर्त्यांसोबत गृहसंपर्क साधतील. यात केंद्रीय मंत्री नितीन गडकरी, उपमुख्यमंत्री देवेंद्र फडणवीस आणि भाजप प्रदेशाध्यक्ष चंद्रशेखर बावनकुळे हे देखील यात सहभागी होणार आहेत. नागपूर नंतर विधानसभा निवडणूक घोषित होण्याअगोदर तसेच नंतर प्रचारादरम्यान राज्यात इतर ठिकाणीही अशी मोहीम राबविण्यात येणार आहे. या माध्यमातून भाजपचे कार्य जनतेपर्यंत, त्यांच्या घरापर्यंत पोहचवणार आहे. राज्यात नागपुरातून या महाजनसंपर्क मोहिमेची उद्या सुरुवात होणार असून एकाच वेळी शहरातील सर्व सहा मतदारसंघातील 2 हजार 158 बूथच्या भागात भाजप कार्यकर्ते घरोघरी जाऊन संपर्क साधतील, अशी माहिती पुढे आली आहे.
मध्य नागपूर विधानसभा मतदारसंघातून 'या' नावांची चर्चा
मध्य नागपूर विधानसभा मतदारसंघातून भाजपने हलबा नेते दिपराज पार्डीकर आणि माजी महापौर प्रवीण दटके यांच्या नावाची चाचपणी केली आहे. मध्य नागपूर मतदारसंघात 90 हजारापेक्षा जास्त हलबा समाजाचे मतदार आहेत. त्यामुळं भाजप हलबा उमेदवार देण्याची शक्यता वर्तवली जातेय. विजयाच्या निकषावर भाजप उमेदवार देणार असल्याची माहिती मिळत आहे.
हे ही वाचा
महत्त्वाच्या बातम्या
ट्रेंडिंग न्यूज
