एक्स्प्लोर

नरेंद्र जाधव समिती तत्काळ बरखास्त करा, पाचवीपर्यंत कोणतीही तिसरी भाषा नको, आझाद मैदानात एल्गार; राजकीय पक्ष, साहित्यिक, विविध सामाजिक संघटनाही एकवटणार

protest at Azad Maidan against compulsory Hindi: आझाद मैदानात सकाळी दहा वाजल्यापासून शालेय शिक्षण अभ्यास आणि कृती समन्वय समिती त्रिभाषा सूत्र विरोधात धरणे आंदोलनाला बसले आहेत.

By : वेदांत नेब | Edited By: परशराम पाटील | Updated at : 07 Jul 2025 11:28 AM (IST)

protest at Azad Maidan against compulsory Hindi

Source : facebook

protest at Azad Maidan against compulsory Hindi: मराठी भाषिक राज्य असतानाही शालेय शिक्षणात हिंदी सक्तीचा वरवंटा उखडून फेकल्यानंतर आता सरकारने नेमलेली नरेंद्र जाधव समिती सुद्धा तत्काळ बरखास्त करावी, तसेच पाचवीपर्यंत कोणतीही तिसरी भाषा नको यासाठी आझाद मैदानात धरणे आंदोलन करण्यात येत आहे. शालेय शिक्षण अभ्यास आणि कृती समन्वय समितीकडून या आंदोलनाची हाक देण्यात आली आहे. आज (7 जुलै) आझाद मैदानात सायंकाळी पाच वाजेपर्यंत धरणे आंदोलन करण्यात येणार असून यासाठी साहित्यिक, सामाजिक आणि राजकीय पक्षही एकवटणार आहेत. डॉ. नरेंद्र जाधव समिती तत्काळ रद्द करा, बालभारतीची शैक्षणिक स्वायत्तता अबाधित ठेवा, शिक्षण मंत्री दादा भुसे आणि एससी आरटी संचालक राहुल रेखावार यांची तत्काळ हाकालपट्टी करा या प्रमुख मागण्यांसाठी हे धरणे आंदोलन केले जाणार आहे.

आझाद मैदानात सकाळी दहा वाजल्यापासून शालेय शिक्षण अभ्यास आणि कृती समन्वय समिती त्रिभाषा सूत्र विरोधात धरणे आंदोलनाला बसले आहेत. या धरणे आंदोलनाला राजकीय पक्षांनी सुद्धा पाठिंबा दिला आहे. शिवसेना ठाकरे गट, काँग्रेस, मनसे, भाकप या राजकीय पक्षाचे प्रतिनिधी सुद्धा या धरणे आंदोलनात सहभागी होणार आहेत.

नरेंद्र जाधव सरकारधार्जिण असल्याचा आरोप

हिंदी सक्तीचा वरवंटा मागे घेतला, तरी पडद्याआडून महायुती सरकारचा डाव सुरु असल्याची शंका मराठी जणांमध्ये आहे. या संदर्भात अभ्यास करण्यासाठी नरेंद्र जाधव यांच्या अध्यक्षतेखाली समिती नेमण्यात आली आहे. मात्र, नरेंद्र जाधवांचा आजवरचा इतिहास पाहिल्यास ते सरकारधार्जिणे आणि सरकारची भलामण करत असल्याचा आरोप सातत्याने त्यांच्या नियुक्तीपासून होत आहे. नरेंद्र जाधव अर्थ विषयातील जाणकार असल्याने शैक्षणिक क्षेत्रातील संवेदनशील विषयासाठी नेमणूक कशासाठी? असाही सवाल केला जात आहे. शिवसेना पक्षप्रमुख उद्धव ठाकरे यांनीही या मुद्याकडे लक्ष वेधले होते. राज ठाकरे यांनी मराठी जणांमधून होत असलेल्या विरोधाची जाणीव नरेंद्र जाधव यांंना असावी, असा गर्भित इशारा दिला आहे.