बैठकीत फडणवीस प्रचंड रागावले, त्यांना खुश करण्यासाठी भाजप नेते 'जरांगें'वर तुटून पडले; रोहित पवारांचा दावा
Rohit Pawar : फडणवीस यांना खुश करण्यासाठीच भाजप नेते मनोज 'जरांगें'वर तुटून पडले होते असा आरोप शरद पवार गटाचे आमदार रोहित पवार यांनी केला आहे.
मुंबई : मनोज जरांगे (Manoj Jarange) यांनी देवेंद्र फडणवीसांवर (Devendra Fadnavis) केलेल्या टिकेनंतर भाजप नेत्यांनी आक्रमक भूमिका घेत जरांगे यांच्यावर जोरदार हल्लाबोल केला आहे. मात्र, फडणवीस यांना खुश करण्यासाठीच भाजप नेते मनोज 'जरांगें'वर तुटून पडले होते असा आरोप शरद पवार गटाचे आमदार रोहित पवार (Rohit Pawar) यांनी केला आहे.
दोन दिवसांपूर्वी भाजप नेत्यांची एक बैठक पार पडली, त्या बैठकीत देवेंद्र फडणवीस प्रचंड रागावले होते. त्यामुळं काल फक्त देवेंद्र फडणवीस यांना खुश करण्यासाठीं भाजपचे नेते तुटून पडले होते. या माध्यमातुन टार्गेट दुसऱ्याच कुणाला तरी करण्यात येत आहे. देवेंद्र फडणवीस यांच्यावर बोलल्यावर एसआयटी चौकशी केली जाते. मात्र, पेपरफुटी ज्यानी केली त्यांच्यावर कारवाई होतं नाही, कारण देवेंद्र फडणवीस यांचा यामागे हात आहे, असेही रोहित पवार म्हणाले आहेत.
फक्त राजकारण होत आहे...
अधिवेशनात मी माझ्या मतदारसंघातील एमआयडीसीचा मुद्दा मांडला आणि त्यानंतर लगेच दुसऱ्या दिवशी बैठक आयोजीत करण्यात आली आहे. असं सतत होतांना पाहिला मिळत आहे. यांना फक्त राजकारण करायचं आहे त्यामुळं आम्हाला बैठकीला बोलवलं नाहीं, असे म्हणत पवार यांनी सरकारवर टीका केली आहे.
लोकं सोबत नसल्याने भाजप चिंतेत...
राजकिय षडयंत्र भाजपसोडून दुसरं कोणी करत नाही. नेत्याच्या विरोधात बोललं की एसआयटी लागते. पूर्ण देशात किंवा महाराष्ट्रात भाजपला सत्ता येईल असं वाटतं नाहीं. त्यामुळं त्यांचे सातत्यानं दौरे वाढले आहेत. आरक्षणाचा मुद्दा, धनगर आरक्षण मुद्दा संसदेत सुटू शकतो. माञ तिथं कूणी विषय काढत नाही. सध्या लोकं त्यांच्या बाजूने नसल्यामुळे भाजप चिंतेत आहे.
गुजरात अमली पदार्थ कारवाईवर प्रतिक्रिया...
1 लाख 20 हजार कोटी रुपयांचे अमली पदार्थ गुजरातमध्ये सापडले आहेत. महिन्याच्या अंतरात 2 हजार कोटी रुपयांचे अमली पदार्थ सापडत असतील तर हे गंभीर आहे, असल्याचे रोहित पवार म्हणाले आहेत.
अजित पवारांना महायुतीत चार जागा मिळतील...
चारच्या आसपास जागा अजित पवार यांना मिळण्याची शक्यता आहे. त्यामधे शिरूर लोकसभा मतदारसंघ नसेल, कारण तो शिवसेनेला जाणार आहे. अजित पवार हे दिलीप वळसे पाटील यांना लोकसभा निवडणूक लढण्यासाठी मागणी करत होते. मात्र, दिलीप वळसे पाटील कुणाचंच ऐकत नाहीत. शरद पवार याचं देखील त्यांनी ऐकलं नाही, असे रोहित पवार म्हणाले.
इतर महत्वाच्या बातम्या :
महत्त्वाच्या बातम्या
