पैशाच्या हव्यासापोटी मित्राला पत्नीवर बलात्कार करण्यास मदत; आरोपी पती गजाआड

पैशाच्या हव्यासापोटी मित्राला पत्नीवर बलात्कार करण्यास मदत करणाऱ्या पतीला पोलिसांनी गजाआड केल्याची घटना जळगाव शहरात घडली आहे.

सांकेतिक छायाचित्र

जळगाव : पैशाच्या हव्यासापोटी मित्राकडून आपल्या पत्नीवर बलात्कार करुन घेणाऱ्या पतीला पोलिसांनी गजाआड केल्याची घटना जळगाव शहरात घडली आहे. पत्नीला शितपेयातून गुंगीचे औषध देऊन मित्राला अत्याचार करण्यास मदत केल्याचा त्याच्यावर आरोप आहे. या घटनेचं चित्रिकरण करुन ते व्हायरल करण्याची पत्नीला धमकी दिल्याचेही उघड झाले आहे.

शहरात राहणाऱ्या आणि टेलरिंग व्यवसाय करणाऱ्या एका तरुणाचा व्यवसाय लॉकडाऊनमुळे अडचणीत आला होता. त्यात व्यसनाधीन असल्याने रोज पैशांची गरज भासू लागल्याने या तरुणाने पैसे मिळविण्याच्या लालसेने आपल्या मित्रासोबत शय्यासोबत करण्यास आपल्या पत्नीला सांगितले होते. मात्र, पत्नीने त्यास विरोध केल्याने सदर तरुणाने शितपेयात गुंगीचे औषध घालून ते पत्नीला पिण्यास दिले. त्यानंतर पत्नीची शुद्ध हरपल्याचा फायदा घेत आपल्या मित्राला पत्नीवर बलात्कार करण्यास सहकार्य केले.

यावेळी पत्नीला घडत असलेला प्रकार लक्षात आल्यावर तिने विरोध करण्याचा प्रयत्न केला असता पतीने तिचे हात धरून ठेवत मित्राला बलात्कार करण्यास मदत केली. यावेळी पतीने पत्नीचे मित्रासोबतचे अश्लील चित्रणही करून ते व्हायरल करण्याची धमकी देत आणि मुलांना जीवे मारण्याची धमकी देत झाला प्रकार कोणालाही न सांगण्यासाठी दबाव आणला होता. घडल्या प्रकारानंतर पत्नी आजारी पडल्याचे पाहून पतीने तिला माहेरी नेऊन सोडले होते. त्यावेळी पीडितेने आपल्या घरी झाला प्रकार सांगितला. प्रकार अतिशय गंभीर असल्याने माहेरच्यांनी पीडितेला घेऊन पोलिसात तक्रार दिल्याने झाला प्रकार उघडकीला आला आहे.

या प्रकरणात जळगाव शहरातील रामानंद पोलीस ठाण्यात पीडितेचा पती आणि त्याच्या मित्राच्या विरोधात बलात्काराचा गुन्हा दाखल केला आहे. पतीला अटक करण्यात पोलिसांना यश मिळाले आहे तर त्याचा मित्र रमेश काकडे याचा पोलीस आता शोध घेत आहे. व्यसनापायी आपल्या पत्नीला पर पुरुषांच्या स्वाधीन करणाऱ्या या घटनेची संपूर्ण जिल्हाभरातून चर्चा होताना दिसून येत आहे.