एक्स्प्लोर

18th July Headline : बंगळुरमध्ये विरोधकांच्या बैठकीचा दुसरा दिवस तर दिल्लीत एनडीएची बैठक; आजपासून श्रावण मासारंभ, आज दिवसभरात

18th July Headline : राज्य विधीमंडळाच्या अधिवेशनाचा आज दुसरा दिवस आहे. तर पुढील काही दिवस मुसळधार पावसाचा इशारा हवामान खात्याकडून देण्यात आला आहे.

By : एबीपी माझा ब्युरो | Edited By: अपूर्वा जाधव | Updated at : 18 Jul 2023 05:45 AM (IST)

18th July Headline

18th July Headline : राज्य विधीमंडळाच्या पावसाळी अधिवेशनाचा आज दुसरा दिवस आहे. तर दिल्लीत भाजपकडून मित्रपक्षांच्या बैठकीचं आयोजन करण्यात आलं आहे. बेंगळूरमधील विरोधकांच्या बैठकीचा आज दुसरा दिवस आहे. आजपासून श्रावणमासाची सुरुवात होणार आहे.

भाजपच्या मित्रपक्षांची बैठक

आगामी लोकसभा निवडणुकांसाठीची मोर्चेबांधणी सगळ्या पक्षांनी सुरू केली आहे. त्याच पार्श्वभूमीवर भाजपकडून दिल्लीत एनडीएच्या बैठकीचं आयोजन करण्यात आलं आहे. या बैठकीला भाजपचे काही जुने मित्र पक्ष सुद्धा उपस्थित राहणार आहेत.

विरोधकांच्या दुसऱ्या बैठकीचा आज दुसरा दिवस

बंगळुरूमधील ताज वेस्ट एंड या पंचतारांकित हॉटेलमध्ये ही दोन दिवसीय बैठक सुरू आहे. या बैठकीचा आजचा दुसरा दिवस आहे. या बैठकीनंतर विरोधी पक्षांची पत्रकार परिषद देखील पार पडणार आहे. सभागृहाचं कामकाज सुरू होण्याच्या आधीच विधान भवनाच्या पायऱ्यावरती आंदोलन करण्यात येणार आहे. त्याचबरोबर काँग्रेसकडून विधानसभा विरोधी पक्षनेते पदासाठी नावही जाहीर केलं जाणार आहे.

पंतप्रधान नरेंद्र मोदी यांच्या हस्ते विकास कामांचं लोकार्पण

दिल्लीत स्वातंत्र्यवीर सावरकर आंतरराष्ट्रीय विमानतळ, पोर्ट ब्लेअरच्या नवीन एकात्मिक टर्मिनल इमारतीचे उद्घाटन पंतप्रधान नरेंद्र मोदी (PM Narendra Modi) करणार आहेत. पंतप्रधान मोदी व्हिडिओ कॉन्फरन्सिंगद्वारे या विकास कामांचे लोकार्पण करणार आहेत.

आझाद मैदानावर बारसू रिफायनरी विरोधात आंदोलन

बारसू सोलगाव पंचक्रोशी रिफायनरी विरोधी संघटना आणि बारसू रिफायनरी विरोधी राज्यव्यापी लढा समिती आज आझाद मैदानावर बारसू विरोधात आंदोलन करणार आहे.

राज्यात मुसळधार पावसाचा इशारा

राज्यात पुढील काही दिवस मुसळधार पावसाचा इशारा देण्यात आला आहे. तर 17 जिल्ह्यांना हवामान खात्याकडून यलो अलर्ट देण्यात आला आहे. मराठवाड्यात आणि मध्य महाराष्ट्रात पुढील 24 तासात विजांच्या कडकडाटासह पावसाचा इशारा हवामान खात्याने दिला आहे.