एक्स्प्लोर

Hasan Mushrif: गिरीश महाजनांकडील खाते हसन मुश्रीफांकडे सोपवले; मंत्र्यांचे खातेवाटप अखेर जाहीर

महाविकास आघाडी सरकारमध्ये त्यांच्याकडे कामगार खाते होते, त्यामुळे त्यांना हे खातं दिलं जाईल, अशी शक्यता वर्तवली जात होती. तथापि, त्यांना वैद्यकीय शिक्षण खात्याचा कारभार देण्यात आला आहे.

By : एबीपी माझा वेब टीम | Edited By: परशराम पाटील | Updated at : 14 Jul 2023 04:58 PM (IST)

Hasan Mushrif

Hasan Mushrif: गेल्या 13 दिवसांपासून रखडलेल्या अजित पवार गटातील मंत्र्यांना अखेर खातेवाटप जाहीर करण्यात आले आहे. हसन मुश्रीफ यांना भाजपच्या गिरीश महाजन यांच्याकडील वैद्यकीय शिक्षण खाते देण्यात आले आहे. महाविकास आघाडी सरकारमध्ये त्यांच्याकडे कामगार खाते होते, त्यामुळे त्यांना हे खातं दिलं जाईल, अशी शक्यता वर्तवली जात होती. तथापि, त्यांना वैद्यकीय शिक्षण खात्याचा कारभार देण्यात आला आहे. हसन मुश्रीफ आज कोल्हापूर दौऱ्यावर आहेत. यावेळी बोलताना त्यांनी आज खातेवाटप होईल, असे सांगताना कोणतं खातं मिळणार यावर भाष्य केले नव्हते.

मुख्यमंत्री एकनाथ शिंदे यांच्याकडे सामान्य प्रशासन, नगर विकास, माहिती व तंत्रज्ञान, माहिती व जनसंपर्क, परिवहन, सामाजिक न्याय, पर्यावरण व वातावरणीय बदल, खनिकर्म आणि इतर कोणत्याही मंत्र्यांना वाटप न केलेले विभाग असतील. उपमुख्यमंत्री देवेंद्र फडणवीस यांच्याकडे गृह, विधी व न्याय, जलसंपदा व लाभक्षेत्र विकास, ऊर्जा, राजशिष्टाचार ही खाती असतील. उपमुख्यमंत्री अजित पवार यांच्याकडे वित्त व नियोजन हे खाते राहील.

तरच आम्ही त्यांच्यासोबत मित्र म्हणून राहू

दरम्यान, मुश्रीफ यांनी कोल्हापुरात बोलताना सांगितले की, आगामी निवडणुकांमध्ये आम्हाला महायुती सोबत राहावं लागेल. सतेज पाटील महायुतीमध्ये आले तरच आम्ही त्यांच्यासोबत मित्र म्हणून राहू. मी खासगीत त्यांना आमच्या पक्षात येण्याची ऑफर दिली आहे, असा मोठा गौप्यस्फोट मुश्रीफ यांनी केला. कोल्हापूर राजकारणात मुश्रीफ आणि सतेज पाटील यांची जय वीरु अशीच ओळख आहे. त्यामुळे आता मुश्रीफ बंडखोर झाल्याने मैत्रीतही बंड होणार का? अशी चर्चा कोल्हापूरच्या राजकीय वर्तुळात सुरु झाली आहे. महाविकास आघाडी पॅटर्न या जोडीने राज्यात प्रथमच कोल्हापूर मनपा राबवला होता. गोकुळमध्येही पाटील-मुश्रीफ गटाची सत्ता आहे. जिल्हा बँक, बाजार समितीमध्येही दोघे एकत्र आहेत.