एक्स्प्लोर

Jalgaon Train Accident: नेपाळचं कुटुंब अस्थी घेण्यासाठी रेल्वे रुळावर पोहचलं; एकाचं फक्त शिर मिळालं, जळगावमध्ये काय घडतंय?

Jalgaon Train Accident: जळगाव येथील शासकीय वैद्यकीय महाविद्यालयाच्या रुग्णालयात आतापर्यंत सात मृतांचं शवविच्छेदन झालेलं आहे.

By : चंद्रशेखर नेवे, एबीपी माझा, जळगाव | Edited By: मुकेश चव्हाण | Updated at : 23 Jan 2025 12:05 PM (IST)

Jalgaon Train Accident

Source : ABP

Jalgaon Train Accident जळगाव: जळगाव जिल्ह्यातील पाचोरा तालुक्यात बुधवारी (22जानेवारी) सायंकाळी परधाडे रेल्वे स्थानकाजवळ (Jalgaon Train Accident) घडलेल्या भयंकर अपघातात 13 प्रवाशांचा मृत्यू झाला असून एकूण 25 प्रवासी जखमी झाले आहेत. तसेच या अपघातामधील मृतांचा आकडा वाढण्याची शक्यता आहे. कारण अजूनही अनेक प्रवाशी बेपत्ता असल्याची माहिती मिळत आहे.

जळगाव येथील शासकीय वैद्यकीय महाविद्यालयाच्या रुग्णालयात आतापर्यंत सात मृतांचं शवविच्छेदन झालेलं आहे. या सर्व मृतदेहांवर रासायनिक प्रक्रिया करून मृतदेह पोलिसांच्या स्वाधीन केले जातील आणि त्यानंतर ते नातेवाईकांना सुपूर्द करतील. अनेक मृतदेह दूरचे असल्याने जवळपास पाच ते सहा दिवस त्यांच्या गावी जाण्यासाठी लागू शकतात. त्यामुळे सर्व मृतदेहांवर रासायनिक प्रक्रिया करूनच मृतदेह नातेवाईकांकडे देण्यात येतील. तर अपघातातील एका प्रवाशाचे केवळ शिर मिळून आले, मात्र धड अद्याप मिळालेले नाही. त्याच्या धडाचा शोध घेण्यासाठी रेल्वे पोलिसांनी श्वान पथकाची मदत घेऊन घटनास्थळी शोध घेण्याचं काम सुरू केले आहे.

नेपाळचं कुटुंब अस्थी घेण्यासाठी घटनास्थळी-

जळगावमधील रेल्वे अपघातामध्ये नेपाळमधील कमला भंडारी या महिलेचा देखील मृत्यू झाला. कमला भंडारी यांचा मृत्यू झाल्याची माहिती मिळताच त्यांचा मुलगा तपेंद्रा आणि सून हे दोघेही घटनास्थळी येऊन त्यांनी अस्थी आणि मयत आईचे कपडे घेऊन गेले आहेत. भारत सरकारने मृतदेह नेपाळपर्यंत पोहचवण्याची सुविधा करून द्यावी, अशी मागणी ही कुटुंबीयांनी केली आहे. दरम्यान, कमला भंडारी यांच्यासोबत त्यांच्या सून होत्या. अपघात झाल्यानंतर घटनास्थळावर सासू कमला भंडारी यांना सावरताना चोरट्यांनी त्यांचा मोबाइल, पर्स व त्यातील पैसे चोरून नेले. याशिवाय अनेक प्रवाशांचे पैसे व बॅगा लांबविण्यात आल्याचे सांगण्यात आल्याची माहिती समोर आली.