Dahi : 'दही' या शब्दाला तामिळनाडूचा विरोध, राज्यावर हिंदी लादू नका, मुख्यमंत्री एम. के स्टॅलिन यांचा इशारा

Tamil Nadu : तामिळनाडूतील लोकांच्या विरोधामुळे दह्याच्या पाकिटावर दही हा हिंदी शब्द न वापरता आता तायिर हा तामिळ शब्द वापरण्यात येणार आहे. 

Tamil Nadu Hindi controversy

चेन्नई: तामिळनाडूमध्ये आता दह्यावरून वाद सुरू झाला असून पाकिटावर दही हा हिंदी शब्द लिहू नका, त्याऐवजी तायिर हा तामिळ शब्द लिहा असं तामिळनाडूचे मुख्यमंत्री एम के स्टॅलिन यांनी म्हटलं आहे. त्यानंतर दह्याच्या पाकिटावर आता यापुढे तायिर हा शब्द लिहिण्यात येईल असं राज्यातील दूध उत्पादक संघ आवीनकडून स्पष्ट करण्यात आलं आहे. पाकिटावर दही हा हिंदी शब्द लिहिण्याचे निर्देश म्हणजे तामिळ जनतेवर हिंदी लादण्याचा प्रकार असल्याचा आरोप मुख्यमंत्री एम के स्टॅलिन यांनी केला होता. 

भारतीय अन्न सुरक्षा आणि मानक प्राधिकरणाने (FSSAI) पाकिटावरील कर्ड हा इंग्रजी शब्द काढून त्यावर दही हा हिंदी शब्द लिहिण्याची सूचना केली होती. त्याविरोधात तामिळनाडूमध्ये लोकांचा असंतोष वाढला. तामिळी जनतेवर हिंदी लादण्याचा हा प्रकार असल्याचा आरोप करण्यात आला. मुख्यमंत्री एमके स्टॅलिन यांनीही या निर्णयाला विरोध केला आहे. त्यांनी दक्षिण भारतातील लोकांवर हिंदी लादल्याचा आरोप केला आहे. सरकारच्या हस्तक्षेपानंतर राज्याचे दूध विकास मंत्री एसएम नासर यांनी एफएसएसएआयला (FSSAI) पत्र लिहिले आहे.

M K Stalin : मुख्यमंत्री काय म्हणाले?

मुख्यमंत्री एम के स्टॅलिन म्हणाले की, केंद्राचा हिंदी लादण्याचा प्रयत्न इतका वाढला आहे की आम्हाला पाकिटावर दही हा हिंदी शब्द लिहिण्याच्या सूचना देण्यात आल्या. हिंदीच्या या धोरणांमुळे दक्षिण भारतातील भाषा मागे पडत आहेत. राज्यावर हिंदी लादण्याचा प्रकार म्हणजे आमच्या मातृभाषेचा अपमान करण्यासारखं आहे. अशांना राज्यातून कायमचे हाकलून दिले जाईल

दही आणि कर्ड दोन्ही वेगळे, मंत्र्यांचा युक्तिवाद

FSSAI ची ही अधिसूचना मागे घेण्याची मागणी राज्याच्या दूग्ध विकास मंत्र्यांनी केली आहे. राज्यात हिंदीला स्थान नाही. दही ही एक सामान्य संज्ञा आहे जी कोणत्याही भाषेत वापरली जाऊ शकते. दही हा विशेष पदार्थ असून त्याची चव कर्डपेक्षा वेगळी असते. मंत्र्यांनी FSSAI ला ऑगस्टपूर्वी नाव बदलण्याच्या सूचना दिल्या आहेत.

तामिळनाडू भाजपचे प्रमुख के. अण्णामलाई यांनीही ही अधिसूचना मागे घेण्याची मागणी केली आहे. प्रादेशिक भाषांना चालना देण्याच्या केंद्रीय धोरणाशी हे पाऊल जुळत नाही, असे ते म्हणाले. तामिळनाडू सहकारी दूध उत्पादक संघ, ज्याला अवीन म्हणून ओळखले जाते, दहीसाठी तायिर हा शब्द वापरणार आहे आणि या संदर्भात FSSAI ला नोटीस देखील पाठवण्यात आली आहे.

हिंदीला तामिळनाडूमध्ये विरोध

तामिळनाडूमध्ये हिंदी भाषेवरून सुरु असलेला हा वाद नवीन नाही. दक्षिणेकडील राज्यांवर हिंदी लादण्याला तामिळनाडूचा विरोध आहे. साठच्या दशकात राज्यात हिंदीविरोधी आंदोलने झाली आणि तत्कालीन केंद्र सरकारने राज्याला आश्वासन दिले की केंद्र आणि दक्षिणेकडील राज्यांमधील संवादासाठी इंग्रजीला अधिकृत भाषा म्हणून मान्यता दिली जाईल.