नोटा बदलण्यासाठी मोदींच्या मातोश्रीही रांगेत

गांधीनगर (गुजरात):  देशभरात बँकांबाहेर नोटा बदलून घेण्यासाठी रांगा लागल्या असताना, तिकडे गांधीनगरमध्ये वेगळंच चित्र पाहायला मिळालं. नोटा बदलून घेण्यासाठी चक्क पंतप्रधान नरेंद्र मोदी यांच्या मातोश्री हिराबेन मोदी रांगेत उभ्या राहिल्या. जवळपास 90 वर्षीय हिराबेन मोदी बँकेच्या रांगेत उभ्या राहिल्याने अनेकांच्या भुवया उंचावल्या. हिराबेन मोदी यांनी गांधीनगरमधील ओरिएंटल बँकेतून नोटा बदलून घेतल्या. देशभरातील नागरिकांना नोटा बदलून घेण्यासाठी मोठ्या संकटाला सामोरं जावं लागतं आहे. विरोधकांकडून तसा आरोप केला जात आहे. मात्र केवळ सामान्य नागरिकांनाच त्रास होतोय असं नाही, तर पंतप्रधानांच्या कुटुंबीयांनाही हा त्रास सहन करावा लागत आहे, असं चित्र गांधीनगरमध्ये दिसून आलं.