Omar Abdullah : ओमर अब्दुल्ला होणार जम्मू-काश्मीरचे दुसऱ्यांदा मुख्यमंत्री, विधिमंडळ पक्षाच्या नेतेपदी निवड; 13 किंवा 14 ऑक्टोबरला शपथ घेणार
Omar Abdullah : इंडिया आघाडीचे तीन सदस्यीय शिष्टमंडळ शुक्रवारी एलजी मनोज सिन्हा यांची भेट घेऊन सरकार स्थापनेचा दावा करणार आहे. 13 किंवा 14 ऑक्टोबरला शपथविधी सोहळा होण्याची शक्यता आहे.
जम्मू-काश्मीरमधून कलम 370 हटवल्यानंतर झालेल्या विधानसभा निवडणुकीत इंडिया आघाडीला 49 जागा मिळाल्या. युतीचा भाग असलेल्या नॅशनल कॉन्फरन्सला सर्वाधिक 42, काँग्रेसला 6 आणि माकपला एक जागा मिळाली. बहुमताचा आकडा 46 आहे. 7 पैकी 4 अपक्षांनी गुरुवारी नॅशनल कॉन्फरन्सला पाठिंबा जाहीर केला. इंदरवालमधून प्यारेलाल शर्मा, छांबमधून सतीश शर्मा, सुरनकोटमधून मोहम्मद अक्रम आणि बानी मतदारसंघातून डॉ. रामेश्वर सिंह हे चार अपक्ष आहेत. उमर म्हणाले की, आता आमची संख्या 46 झाली आहे.
भाजपने 29 जागा जिंकल्या, पीडीपीला फक्त 3 जागा मिळाल्या
8 ऑक्टोबर रोजी जाहीर झालेल्या जम्मू-काश्मीर विधानसभा निवडणुकीच्या निकालात भाजपने 29 जागा जिंकल्या. गेल्या निवडणुकीच्या तुलनेत पक्षाला 4 जागांचा फायदा झाला आहे. मात्र, जम्मू-काश्मीर भाजपचे अध्यक्ष रविंदर रैना नौशेरा मतदारसंघातून एनसी उमेदवाराकडून सुमारे 8 हजार मतांनी पराभूत झाले. त्यांनी आपला राजीनामा पक्षप्रमुखांकडे पाठवला आहे. माजी मुख्यमंत्री मेहबुबा मुफ्ती यांचा पक्ष पीडीपीने 3 जागा जिंकल्या आहेत. गेल्या निवडणुकीत पक्षाला 28 जागा मिळाल्या होत्या. पहिल्यांदाच निवडणूक लढवत असलेल्या मेहबूबा यांची मुलगी इल्तिजा मुफ्ती यांचा श्रीगुफ्वारा बिजबेहारा मतदारसंघातून 9 हजारांहून अधिक मतांनी पराभव झाला.
जम्मू-काश्मीरमध्ये आम आदमी पक्षाने पहिल्यांदाच विजयाची नोंद केली आहे. दोडा मतदारसंघातून मेहराज मलिक यांनी भाजपच्या गजयसिंह राणा यांचा 4 हजार 500हून अधिक मतांनी पराभव केला. तर पीपल्स कॉन्फरन्सने एक जागा जिंकली. संसद हल्ल्यातील आरोपी अफजल गुरूचा भाऊ एजाज गुरूला सोपोरमधून 129 मते मिळाली.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
