Narendra Modi : नरेंद्र मोदींचा रशियाचे अध्यक्ष व्लादिमीर पुतिन यांना फोन, भारत दौऱ्याचं आमंत्रण, ट्रम्प टॅरिफच्या पार्श्वभूमीवर महत्त्वाच्या घडामोडी
Narendra Modi: पंतप्रधान नरेंद्र मोदी यांनी रशियाचे अध्यक्ष व्लादिमीर पुतिन यांच्याशी फोनवरुन चर्चा केली आहे. भारत आणि रशियाच्या संबंधांवर देखील चर्चा झाली.
नवी दिल्ली : भारताचे पंतप्रधान नरेंद्र मोदी यांनी रशियाचे अध्यक्ष व्लादिमीर पुतिन यांच्यासोबत फोनवर चर्चा केली. यावेळी रशियाचे अध्यक्ष व्लादिमीर पुतिन यांनी यूक्रेन सोबत सुरु असलेल्या युद्धासंदर्भातील स्थिती काय आहे याची माहिती नरेंद्र मोदी यांना दिली. पंतप्रधान नरेंद्र मोदी यांनी व्लादिमीर पुतिन यांना भारत दौऱ्याचं आमंत्रण देखील दिलं.
पीआयबीच्या अधिकृत प्रसिद्धीपत्रकानुसार, रशियाचे अध्यक्ष पुतिन यांनी नरेंद्र मोदी यांना यूक्रेन युद्दासंदर्भातील ताज्या घडामोडींची अपडेट दिली आहे. नरेंद्र मोदी यांनी पुतिन यांनी दिलेल्या सविस्तर माहितीसंदर्भात धन्यवाद दिले आहेत. रशिया-यूक्रेन संघर्ष शांततेच्या मार्गानं सोडवावा ही भारताची भूमिका नरेंद्र मोदी यांनी मांडली.
रशिया-भारत भागीदारी भक्कम करण्यावर एकमत
नरेंद्र मोदी आणि व्लादिमीर पुतिन यांच्या चर्चेत दोन्ही नेत्यांनी भारत आणि रशिया यांच्यातील संबंध आणि द्विपक्षीय अजेंडा यामध्ये झालेल्या प्रगतीचा आढावा घेतला. दोन्ही देशांमध्ये विशेष आणि विशेषाधिकार प्राप्त राजनैतिक भागीदारी अधिक वाढवण्याबाबत कटिबद्ध राहण्याबाबत चर्चा झाली.
मोदी यांच्याकडून पुतिन यांना भारत दौऱ्याचं आमंत्रण
पंतप्रधान नरेंद्र मोदी यांनी रशियाचे अध्यक्ष पुतिन यांना या वर्षाच्या अखेरीस होणाऱ्या भारत रशियाच्या वार्षिक द्विपक्षीय शिखर संमेलनासाठी भारतात येण्याचं निमंत्रण देखील दिलं. रशियाचे अध्यक्ष पुतिन भारत दौऱ्यावर आल्यानंतर दोन्ही देशांमध्ये व्यापार, संरक्षण आणि ऊर्जा क्षेत्रातील सहकार्य वाढवण्याची आणि त्याला वेग मिळण्याची अपेक्षा आहे.
ट्रम्प टॅरिफच्या पार्श्वभूमीवर चर्चा
अमेरिकेचे अध्यक्ष डोनाल्ड ट्रम्प यांनी 6 ऑगस्ट रोजी भारतावर 50 टक्के टॅरिफ लादण्याची घोषणा केली आहे. या पार्श्वभूमीवर नरेंद्र मोदी आणि व्लादिमीर पुतिन यांच्यातील चर्चेला महत्त्व प्राप्त झालं आहे. भारतानं रशियाकडून तेल खरेदी सुरु ठेवल्यानं संतापलेल्या डोनाल्ड ट्रम्प यांनी भारतावर 50 टक्के टॅरिफ लादलं आहे.
डोनाल्ड ट्रम्प यांनी गेल्या आठवड्यात भारतावर 25 टक्के टॅरिफ लादण्याची घोषणा केली होती. त्यावेळी रशियासोबत शस्त्र आणि तेल खरेदी संदर्भातील व्यापार सुरु ठेवल्यानं दंड आकारणार असल्याचं त्यांनी जाहीर केलं होतं. अमेरिकेचे अध्यक्ष ट्रम्प यांनी जोपर्यंत टॅरिफ संदर्भातील प्रश्न मिटत नाही तोपर्यंत भारतासोबत चर्चा करणार नसल्याचं म्हटलंय.
दरम्यान, भारताचे राष्ट्रीय सुरक्षा सल्लागार अजित डोवाल हे नुकतेच रशियाच्या दौऱ्यावर गेले होते. तिथं त्यांनी दोन्ही देशांच्या आगामी वाटचालीसंदर्भात चर्चा केली. भारताचे विदेश मंत्री एस जयशंकर येत्या काही दिवसांमध्ये रशियाला जाणार आहेत.
Had a very good and detailed conversation with my friend President Putin. I thanked him for sharing the latest developments on Ukraine. We also reviewed the progress in our bilateral agenda, and reaffirmed our commitment to further deepen the India-Russia Special and Privileged…
— Narendra Modi (@narendramodi) August 8, 2025
महत्त्वाच्या बातम्या
