कर्नाटक सत्तासंघर्ष | काँग्रेस-जेडीएस सरकारमधील सर्व मंत्र्यांचे राजीनामे तर भाजपकडून मात्र मुख्यमंत्र्यांच्या राजीनाम्याची मागणी

कर्नाटक राज्य पुन्हा एकदा राजकीय अस्थिरतेच्या उंबरठ्यावर असून सत्ताधारी जेडीएस आणि काँग्रेसच्या 13 आमदारांनी तर एका अपक्ष आमदाराने विधानसभा अध्यक्षांची भेट घेऊन त्यांच्याकडे राजीनामे दिले आहेत.

बंगळुरु : कर्नाटकच्या काँग्रेस- जेडीएस सरकारमधील सर्वच्या सर्व मंत्रिमंडळानं राजीनामा दिला आहे. मुख्यमंत्री एच डी कुमारस्वामी यांच्या मंत्रिमंडळातील 21 च्या 21 मंत्र्यांनी पदाचे राजीनामे दिले आहेत. बंडखोरांना शमवण्यासाठी जेडीएसनं ही खेळी केल्याची माहिती सूत्रांकडून मिळाली आहे. दरम्यान, सरकारमध्ये असलेल्या काँग्रेस आणि जेडीएसच्या आमदारांनी राजीनामा दिल्याने त्यांनी बहुमत गमावले आहे, या सगळ्या गोष्टींची जबाबदारी स्वीकारत कुमारस्वामी यांनी राजीनामा द्यावा अशी मागणी भाजपाच्या नेत्या शोभा करंदलाजे यांनी केली आहे. कर्नाटकातील सत्तासंघर्षाचे जोरदार पडसाद लोकसभेत देखील उमटले आहेत. भाजपकडून लोकशाहीचा अवमान होत असल्याची टीका काँग्रेसने केली आहे. तर कर्नाटकात जे होत आहे त्याच्याशी आमचा काही संबंध नसल्याचे भाजपने स्पष्ट केले आहे. कर्नाटक राज्य पुन्हा एकदा राजकीय अस्थिरतेच्या उंबरठ्यावर असून सत्ताधारी जेडीएस आणि काँग्रेसच्या 13 आमदारांनी तर एका अपक्ष आमदाराने विधानसभा अध्यक्षांची भेट घेऊन त्यांच्याकडे राजीनामे दिले आहेत. या आमदारांचा राजीनामा मंजूर झाला तर कर्नाटक राज्यातील बहुमत हे भाजपकडे झुकण्याची दाट शक्यता आहे. तर राज्यपाल येत्या 17 जुलैला विधानसभेत बहुमत सिद्ध करण्याचा आदेश देतील, अशी शक्यता वर्तवण्यात येत आहे. दरम्यान या बंडखोरांना शमविण्यासाठी जेडीएसने नवी खेळी खेळल्याचे बोलले जात आहे. कर्नाटकच्या जेडीएस सरकारमधील सर्वच्या सर्व मंत्रिमंडळानं राजीनामा दिला आहे. मुख्यमंत्री एच डी कुमारस्वामी यांच्या मंत्रिमंडळातील 21 च्या 21 मंत्र्यांनी पदाचे राजीनामे दिले आहेत. माहितीनुसार कर्नाटकचे राज्यपाल 17 जुलै रोजी विधानसभेत बहुमत सादर करण्याचे आदेश देऊ शकतात.  कर्नाटकमध्ये काँग्रेस-जेडीएसच्या आमदारांची संख्या सातत्याने घटत आहे. राज्यात विधानसभेच्या एकूण 224 जागा आहेत. बहुमतासाठी 113 आमदारांची आवश्यकता आहे. काँग्रेसकडे विधानसभा अध्यक्षांसह एकूण 80 आमदार आहेत. तर जेडीएसकडे 37 आमदार आहेत. दोन्ही मिळून 117 आमदारांच्या संख्याबळावर जेडीएस-काँग्रेस सत्तेत आले होते. तसेच बहुजन समाज पार्टी आणि एका अपक्ष आमदारानेदेखील या सरकारला पाठिंबा दिला होता.