![ABP Premium](https://cdn.abplive.com/imagebank/Premium-ad-Icon.png)
Karnataka : सकाळ-संध्याकाळ 90 चा पेग फ्री द्या, दारूच्या किमती कमी करा अन्यथा... दरात 20 टक्क्यांची वाढ झाल्यानंतर कर्नाटकात मद्यप्रेमींचे आंदोलन
Karnataka Alcohol Protest : दारूच्या किमती कमी करा किंवा ती फ्री मध्ये वाटा, अन्यथा आम्ही दारू प्यायचं सोडू, त्यामुळे सरकारच्या महसुलात घट होईल अशी धमकी मद्यप्रेमी आंदोलकांनी दिली आहे.
![Karnataka : सकाळ-संध्याकाळ 90 चा पेग फ्री द्या, दारूच्या किमती कमी करा अन्यथा... दरात 20 टक्क्यांची वाढ झाल्यानंतर कर्नाटकात मद्यप्रेमींचे आंदोलन karnataka budget protest for free alcohol udupi demand of decrease in alchohol tax Karnataka : सकाळ-संध्याकाळ 90 चा पेग फ्री द्या, दारूच्या किमती कमी करा अन्यथा... दरात 20 टक्क्यांची वाढ झाल्यानंतर कर्नाटकात मद्यप्रेमींचे आंदोलन](https://feeds.abplive.com/onecms/images/uploaded-images/2023/07/13/ae76bd3b1abfcc723ef64b117b305799168925232850493_original.jpeg?impolicy=abp_cdn&imwidth=1200&height=675)
उडपी : हलगी वाजवली जातेय... मध्यभागी ठेवलेल्या दारूच्या मोठ्या बाटलीला मोगऱ्याचे गजरे घातले जात आहेत, आरती केली जात आहे. आता तुम्ही म्हणाल काय केलंय काय या वीरांनी? तसं खास काही केलेलं नाही, पण कर्नाटक सरकारविरोधात आंदोलन केलंय. या आंदोलनामागचं कारण ऐकाल तर कपाळावर हात मारून घ्याल. कर्नाटक सरकारने आपल्या अर्थसंकल्पात (Karnatak Budget Alcohol Price Hike) दारुचे दर 20 टक्क्यांनी वाढवले आहेत. त्यामुळे मद्यप्रेमींनी या दरवाढीविरोधात उडपी (Udupi Alcohol Protest) शहरात आंदोलन सुरु केलंय.
कर्नाटकात सिद्धरामय्या (Karnataka CM Siddaramaiah) सरकारने 8 जुलै रोजी राज्याचा अर्थसंकल्प मांडला. या अर्थसंकल्पात भारतीय बनावटीच्या विदेशी दारुच्या किंमतीमध्ये 20 टक्क्यांची वाढ करण्यात आली. त्यामुळे कर्नाटक सरकारला येत्या वर्षात 36 हजार कोटींचा महसूल प्राप्त होणार आहे. तसेच सरकारने बीअरवरचा अधिभारही 175 टक्क्यांवरुन 180 टक्क्यांवर आणला.
आता सरकारने कोणतीही दरवाढ केली की त्या त्या संघटना एकवटतात आणि सरकारविरोधात निदर्शने करतात. पण मद्यप्रेमींची अशी कोणतीच संघटना नाही. मग करणार काय? म्हणूनच आता उडपीत सगळे मद्यप्रेमी एकवटले आणि आंदोलन सुरू केलं. या मद्यप्रेमींनी तर आता थेट सरकारलाच धमक्या दिल्या आहेत. या मद्यपींनी दारु कायमची सोडून देण्याची धमकी दिली. तसं झाल्यास सरकारच्या महसुलामध्ये घट होईल. दारु सोडून अख्ख्या कुटुंबासकट तीर्थाटनाला जाण्याचा इशाराही त्यांनी दिला आहे.
Udupi Alcohol Protest : मद्यप्रेमींची मागणी काय?
दारू ही कामगार वर्गांकडून सर्वाधिक प्यायली जाते. काम केल्यानंतर कामगारांचे अंग दुखतंय. मग संध्याकाळी त्यांना नायटीचा एक पेग मारावाच लागतोय. त्यामुळे त्यांच्या वेदना कमी होतात. आता कशावरही कर लावला तर आंदोलनं होतात. फक्त दारूवरील कर वाढवल्यावर आंदोलनं होत नाहीत. मग म्हणून दारूवरील कर वाढवायचाच का? आम्ही असं म्हणत नाही की सगळाच कर कमी करा. पण मग काहीतरी कमी करा अशी मागणी या मद्यप्रेमी आंदोलकांनी केली आहे.
ज्या मद्यपींमुळे राज्याला सर्वाधिक महसूल मिळतो त्यांचा रोष आता सरकार पत्करणार का? मद्यपींनी दिलेले इशारे खरंच अंमलात आणणार का? मद्यप्रेमींच्या आंदोलनावर सरकार आपली भूमिका स्पष्ट करणार का याकडे आता सर्वांचं लक्ष लागलं आहे.
ही बातमी वाचा:
Disclaimer : हे फक्त घडलेल्या घटनेचं वृत्ताकन आहे, एबीपी माझा दारू पिण्याचं कोणतंही समर्थन करत नाही.
महत्त्वाच्या बातम्या
ट्रेंडिंग न्यूज
![ABP Premium](https://cdn.abplive.com/imagebank/metaverse-mid.png)