(Source: Dainik Bhaskar)
Dhule: धुळ्यातील पोलिस प्रशिक्षण केंद्रात पोलिस निरीक्षकाची आत्महत्या; सुसाईड नोट पोलिसांच्या हाती
Dhule Sucide: पोलिस प्रशिक्षण केंद्रातील सह्याद्री अपार्टमेंटमधील पोलिस निरीक्षक प्रवीण कदम यांनी आत्महत्या केली आहे.
धुळे: शहरातील पोलीस प्रशिक्षण केंद्रात कार्यरत असणाऱ्या प्रवीण कदम यांनी आपल्या राहत्या घरात गळफास घेऊन आत्महत्या केल्याची धक्कादायक घटना घडली. आज सायंकाळी ही घटना उघडकीस आल्यानंतर जिल्हा पोलीस दलात एकच खळबळ उडाली आहे. पोलिस प्रशिक्षण केंद्रातील सह्याद्री अपार्टमेंटमधील त्यांच्या निवासस्थानी ही घटना घडली असून त्याच ठिकाणी एक सुसाईड नोट मिळून आली आहे, याप्रकरणी धुळे शहर पोलीस ठाण्यात गुन्हा दाखल करण्यात आला आहे. पोलिस निरीक्षक प्रवीण कदम यांनी आत्महत्या का केली याचा उलघडा अद्याप झालेला नाही.
धुळे शहरातील पोलिस प्रशिक्षण केंद्रात कार्यरत असणारे प्रवीण कदम यांनी आपल्या पोलिस प्रशिक्षण केंद्रातील सह्याद्री अपार्टमेंटमधील निवासस्थानात गळफास घेऊन आत्महत्या केल्याची धक्कादायक घटना आज सायंकाळच्या सुमारास उघडकीस आली. या घटनेची माहिती मिळताच जिल्हा पोलीस अधीक्षक संजय बारकुंड, उपविभागीय पोलीस अधिकारी ऋषिकेश रेड्डी, अप्पर पोलीस अधीक्षक किशोर काळे यांच्यासह पोलीस अधिकारी आणि कर्मचारी घटनास्थळी दाखल झाले होते. पोलीस अधिकाऱ्यांनी प्रवीण कदम यांच्या निवासस्थानाची पाहणी केली. यावेळी त्यांना या ठिकाणी एक सुसाईड नोट मिळून आली आहे. याप्रकरणी शहर पोलीस ठाण्यात गुन्हा दाखल करण्यात आला आहे.
प्रवीण कदम हे उत्तम बासरी वादक तसेच कॅसिओ वादक असून त्यांना संगीताची मोठी आवड असल्याचे सांगण्यात आलं आहे. तसेच प्रवीण कदम हे सर्पमित्र देखील होते. त्यांनी आत्महत्या का केली हे मात्र अद्याप समजू शकलं नाही. यासंबंधी पोलिस अधिक तपास करत आहेत. मात्र त्यांच्या आत्महत्येमुळे एकच खळबळ उडाली आहे.
काय लिहले आहे सुसाईड नोटमध्ये?
माझ्या आत्महत्येस मी स्वतः जबाबदार असून इतर कोणालाही दोषी धरू नये, गंगापूर पोलीस स्टेशन येथील फेटल गुन्हा त्यास कारणीभूत असल्याचं यात लिहले आहे.
प्रवीण कदम हे नाशिक येथील गंगापूर पोलीस ठाण्यात असताना त्यांच्यावर कुठल्या अपघाताच्या गुन्ह्याचा तपास करण्यासाठी वरिष्ठांकडून काही दबाव होता का, तसेच या दबावातून त्यांनी हे पाऊल उचलले आहे का अशा अनेक चर्चांना या घटनेमुळे उधाण आले आहे. दरम्यान त्यांनी लिहिलेल्या सुसाईड नोटमधील कारणांचा शोध घेऊन संबंधितांवर कारवाई होते का हे पाहणे महत्त्वाचे असणार आहे.
महत्त्वाची बातमी:
महत्त्वाच्या बातम्या
ट्रेंडिंग न्यूज
