Marathwada Rain: मराठवाड्यात दमदार पाऊस; वीज कोसळून सहा ठार

औरंगाबादसह मराठवाड्यातील अनेक जिल्ह्यात शनिवारी पावसाने दमदार हजेरी लावली आहे.

lightning strike

Marathwada Rain News: शनिवारी मराठवाड्यातील अनेक भागात दमदार पाऊस झाला. औरंगाबाद, जालना, परभणी, नांदेड, बीड आणि हिंगोली जिल्ह्यात अनेक ठिकाणी पावसाने हजेरी लावली. मात्र याचवेळी निसर्गाची अवकृपा सुद्धा पाहायला मिळाली.अंगावर वीज पडून जालना जिल्ह्यात तिघांचा मृत्यू झाला तर, दोन जण जखमी झाले. औरंगाबाद जिल्ह्यात तिघांचा मृत्यू झाला असून, नांदेड जिल्ह्यात एक जण जखमी झाला. 

औरंगाबादेत तिघांचा मृत्यू 

औरंगाबाद जिल्ह्यात सिल्लोड तालुक्यातील सावखेडा (उटाडेवाडी) येथील गट क्रमांक 292 मध्ये संजय नथ्थू उटाडे (45) हे आपल्या शेतात ठिबक सिंचनाच्या पाईपलाइनचे काम करत असताना दुपारी साडेबारा वाजेच्या सुमारास अंगावर वीज पडून त्यांचा मृत्यू झाला.  तर दुसऱ्या घटनेत पैठण तालुक्यातील केकत जळगाव येथे अंगावर वीज पडून गजानन हरिश्चंद्र दराडे (27) या तरुणाचा मृत्यू झाला. तसेच आडगाव जावळे येथे दुपारी वादळी वाऱ्यासह पावसाने हजेरी लावली. यावेळी सांडू शामराव नजन यांच्या घरावर वीज पडल्याने त्यांची बहीण सरुबाई शहादेव लांडे ( वय 40 वर्षे) यांचा मृत्यू झाला. 

जालन्यात निसर्गाची अवकृपा

जालना जिल्ह्यात भोकरदन तालुक्यातील कोदा येथे शनिवारी महिला शेतकरी गंगाबाई पांडुरंग जाधव, मुलगा दत्ता पांडुरंग जाधव, भारती गजानन जाधव हे तिघे शेतात काम करत होते. दरम्यान, अडीच वाजेच्या सुमारास वीज पडल्याने गंगाबाई पांडुरंग जाधव यांचा मृत्यू झाला, तर त्यांच्याबरोबर असलेले दत्तात्रय जाधव व भारती जाधव हे जखमी झाले. जखमींना उपचारासाठी खासगी रुग्णालयात दाखल करण्यात आले आहे.

मंठा तालुक्यातील पेवा येथील शेतकरी अनिल भारत शिंदे (22) शनिवारी आपल्या शेतात काम करीत असताना विजेचा कडकडाट सुरू झाला. सायंकाळी 5 वाजेच्या सुमारास वीज पडून त्यांचा मृत्यू झाला. दुसऱ्या एका घटनेत माळकिणी येथे दुपारी तीन वाजेच्या सुमारास शेतात काम करीत असताना वसंत वामनराव जाधव (50) यांच्या अंगावर वीज पडली. त्यात त्यांचा मृत्यू झाला. त्यामुळे विजेचा  कडकडाट सुरु असताना शेतकऱ्यांनी शेतात काम करताना काळजी घेण्याचे आवाहन प्रशासनाने केलं आहे.