Akola : अकोल्यात हनुमान मूर्ती प्रतिष्ठापनेत कळसावरून नोटांची उधळण, भाविकांची झुंबड
Akola Manarkhed Hanuman Pratisthapana : नोटांच्या उधळणीनंतर त्या घेण्यासाठी भाविकांची झुंबड उडाली, त्यामुळे काही काळ चेंगराचेंगरीसारखी परिस्थिती निर्माण झाल्याचं चित्र होतं.
अकोला : जिल्ह्यातील बाळापूर तालुक्यातल्या मनारखेड गावात हनुमान मूर्ती प्रतिष्ठापना सोहळ्यात एक अजब प्रकार पाहायला मिळाला. मंदिराच्या कळसावरून हजारो रुपयांच्या नोटांची आणि नाण्यांची उधळण करण्यात आली. त्या नोटा गोळा करण्यासाठी मात्र भाविकांची झुंबड पाहायला मिळाली. या प्रकारामुळे मोठी गर्दी झाल्याने परिसरात काही काळ गोंधळाचे वातावरण निर्माण झाल्याचं दिसून आलं.
मनारखेड गावातील नव्याने स्थापन करण्यात आलेल्या हनुमान मूर्तीच्या प्रतिष्ठापनेनंतर हा प्रकार घडला. मंदिराच्या कळसावरून 10, 20 आणि 50 रुपयांच्या हजारो नोटा उधळण्यात आल्या. यासोबतच 5 आणि 10 रुपयांची नाणीही उधळण्यात आली.
नोटांसाठी भाविकांची झुंबड (Devotees Rush for Notes)
नोटांची उधळण होताच कार्यक्रमाला उपस्थित भाविकांनी त्या वेचण्यासाठी एकच झुंबड उडवली. काही जण थेट मंदिरात उभारलेल्या मंडपावर चढण्याचा प्रयत्न करत होते, तर काहीजण वाऱ्याच्या दिशेने उडणाऱ्या नोटांच्या मागे धावताना दिसले. वाऱ्यामुळे या नोटा मंदिरापासून लांबच लांब उडून गेल्याचं दिसून आलं, त्यामागे भाविकही धावताना दिसून आलं.
या धावपळीत काही काळ चेंगराचेंगरीसारखी परिस्थिती निर्माण झाली होती. मात्र, सुदैवाने कोणतीही दुर्घटना घडली नाही. या कार्यक्रमादरम्यान सुरक्षेची विशेष व्यवस्था नसल्याचेही पाहायला मिळाले.
‘भक्तीचा भाग’ म्हणत गावकऱ्यांचे समर्थन (Religious Tradition Debate)
गावकऱ्यांनी या प्रकाराचे समर्थन करत, हा आमच्या भक्तीचा भाग आहे असं सांगितले. अनेक भाविकांनी वेचलेल्या नोटा आणि नाणी आपल्या घरातील देव्हाऱ्यात ठेवणार असल्याचे सांगितले.
दरम्यान, सार्वजनिक कार्यक्रमांमध्ये अशा प्रकारे नोटांची उधळण करणे योग्य आहे का, याबाबत चर्चा सुरू झाली आहे. सुरक्षेच्या दृष्टीने अशा घटनांकडे प्रशासनाने गांभीर्याने पाहण्याची गरज व्यक्त केली जात आहे.
ही बातमी वाचा:
महत्त्वाच्या बातम्या
