Akola : रील शूटच्या बहाण्याने गुंतवून ठेवलं, अकोल्यात रील स्टारचे 20 लाखांचे सोन्याचे दागिने, 90 हजार रुपये लुटले
Akola Reel Star Gold Theft : एक महिना आधी प्लॅनिंग करून रील स्टार असलेल्या मैत्रिणीच्या घरात एका तरुणीने तिच्या प्रियकराच्या मदतीने चोरी केल्याची घटना घडली.
अकोला : सोशल मीडियासाठी रील शूट करण्याच्या बहाण्याने तब्बल 20 लाख रुपयांच्या सोन्याच्या दागिन्यांची चोरी केल्याचा धक्कादायक प्रकार अकोला शहरात उघडकीस आला आहे. मैत्रिणीच्या घरातील सोन्यावर डल्ला मारण्यासाठी रील क्रिएटर तरुणीने महिनाभर आधीच कट रचल्याचे पोलीस तपासात समोर आले आहे. या प्रकरणात मुख्य आरोपी तरुणीसह तिचा प्रियकर आणि दोन साथीदार अशा चौघांना पोलिसांनी अटक केली आहे. ही कारवाई महाराष्ट्र पोलीस यांच्या जुने शहर पोलीस ठाण्याने केली आहे.
रील शूटच्या नावाखाली रचला कट (Reel Shoot Crime Plan)
पोलिसांच्या माहितीनुसार, फिर्यादी आणि आरोपी या दोघी शेजारी राहत होत्या आणि त्यांच्यात घनिष्ट मैत्री होती. सोशल मीडियावर रील शूट करण्यासाठी आरोपीने मैत्रिणीला घरी बोलावले. सुमारे दीड तास शूटिंग सुरू ठेवण्यात आले, जेणेकरून कोणालाही संशय येऊ नये. याच दरम्यान कपडे बदलण्याचा बहाणा करून आरोपी थेट मैत्रिणीच्या घरी गेली. आधीच घराची माहिती असल्याने तिने कपाटातील सुमारे 150 ग्रॅम सोन्याचे दागिने आणि 90 हजार रुपये रोख रक्कम चोरून नेली.
चोरीनंतर पुन्हा शूटिंगमध्ये सहभाग (Post Theft Strategy)
चोरी केल्यानंतर कोणालाही संशय येऊ नये म्हणून आरोपी पुन्हा रील शूटिंगमध्ये सहभागी झाली. मात्र, काही वेळानंतर सोन्याचे दागिने आणि रोख रक्कम गायब असल्याचे लक्षात आल्यानंतर फिर्यादीने तक्रार दाखल केली.
पोलिस तपासात उघड झाला प्रकार (Police Investigation Akola)
तक्रार दाखल झाल्यानंतर पोलिसांनी कॉल डिटेल्स, मोबाईल लोकेशन आणि हालचालींचा बारकाईने तपास केला. तपासाच्या धाग्यांवरून आरोपीपर्यंत पोहोचण्यात पोलिसांना यश आले. चौकशीत आरोपी तरुणीने गुन्ह्याची कबुली दिली असून चोरीचा मुद्देमाल जप्त करण्यात आला आहे. या प्रकरणाबाबत जुने शहर पोलीस ठाण्याचे पोलीस निरीक्षक नितीन लेव्हरकर यांनी माहिती दिली. सध्या चारही आरोपींविरुद्ध गुन्हा नोंदवण्यात आला असून पुढील तपास सुरू आहे.
ही बातमी वाचा:
महत्त्वाच्या बातम्या
