Ajit Pawar : कोपरापासून ढोपरापर्यंत, लाथा बुक्क्यांनी मारलं, अखेर सूरज चव्हाणांच्या मारहाणीवर अजित पवार बोलले, म्हणाले...
Ajit Pawar: सूरज चव्हाण यांनी छावाच्या कार्यकर्त्यांना बेदम मारहाण केली. या पार्श्वभूमीवर अजित पवार यांनी या प्रकरणावर भाष्य करत घडलेली घटना अत्यंत गंभीर, दुर्दैवी आणि निषेधार्ह असल्याचे म्हटले आहे.
Ajit Pawar on NCP Suraj Chavan beaten Chhava Sanghatana Workers: कृषीमंत्री माणिकराव कोकाटे यांचा विधिमंडळात रम्मी खेळतानाचा व्हिडीओ व्हायरल झाल्यानंतर त्यांच्यावर सर्व स्थरातून टीका केली जात आहे. दरम्यान याच मुद्द्याला घेऊन रविवारी अखिल भारतीय छावा संघटनेने लातूरमध्ये (Latur News) राष्ट्रवादी काँग्रेसचे प्रदेशाध्यक्ष सुनील तटकरे यांच्यासमोर संताप व्यक्त केला. मात्र यावेळी 'छावा'च्या कार्यकर्त्यांनी सुनील तटकरे यांच्यासमोर पत्ते उधळले होते. या प्रकारानंतर राष्ट्रवादी युवक काँग्रेसचे प्रदेशाध्यक्ष सूरज चव्हाण (Suraj Chavan) यांनी 'छावा'च्या कार्यकर्त्यांना बेदम मारहाण केली. या मारहाणीचा व्हिडीओ सोशल मिडीयावर व्हायरल झाल्यानंतर विरोधकांनी महायुती सरकार आणि राष्ट्र्वादी काँग्रेस पक्षावर टीकेची झोड उठवली. या पार्श्वभूमीवर आता राष्ट्रवादी काँग्रेसने डॅमेज कंट्रोल सुरु केलं असताना. राष्ट्रवादी काँग्रेसचे (अजित पवार गट) सर्वेसर्वा अजित पवार यांनी या प्रकरणावर भाष्य करत घडलेली घटना अत्यंत गंभीर, दुर्दैवी आणि निषेधार्ह असल्याचे म्हटले आहे.
नेमकं काय म्हणाले अजित पवार?
लातूरमध्ये काल राष्ट्रवादी काँग्रेस आणि छावा संघटनेच्या पदाधिकाऱ्यांमध्ये घडलेली घटना अत्यंत गंभीर, दुर्दैवी आणि निषेधार्ह आहे. कोणत्याही प्रकारच्या हिंसेला, असभ्य वर्तनाला किंवा असंसदीय भाषेला मी ठामपणे विरोध करतो. समाजातील प्रत्येक घटकाच्या न्याय्य मागण्यांचा आणि भावनांचा आम्ही मनापासून सन्मान करतो. राष्ट्रवादी काँग्रेस पक्षाची ओळख ही छत्रपती शिवाजी महाराज, शाहू महाराज, महात्मा फुले आणि डॉ. बाबासाहेब आंबेडकर यांच्या लोकशाही, समता व बंधुत्वाच्या विचारांवरच उभी आहे.
माझ्या सर्व सहकाऱ्यांना आणि कार्यकर्त्यांना मी स्पष्टपणे सांगू इच्छितो, सामाजिक जीवनात काम करत असताना नेहमी लोकशाही, शांतता आणि अहिंसा या मुल्यांना प्राधान्य द्या. अशा शब्दात अजित पवार यांनी प्रतिक्रिया देत भाष्य केलं आहे.
सूरज चव्हाण यांच्यावर गुन्हा दाखल
राष्ट्रवादी काँग्रेस अजित पवार गटाचे प्रदेशाध्यक्ष सुरज चव्हाण यांच्यासह 10 जणांवर गुन्हा दाखल करण्यात आला आहे. लातूर शहरातील विवेकानंद पोलीस ठाण्यात गुन्हा दाखल करण्यात आला आहे. विवेकानंद पोलीस ठाण्याचे एक आणि स्थानिक गुन्हे अन्वेषण विभागाच्या एक अश्या दोन पथके सूरज चव्हाण यांच्या शोधासाठी मार्गस्थ झाली आहेत.
दरम्यान या राड्याच्या पार्श्वभूमीवर खबरदारी म्हणून प्रदेशाध्यक्ष सुनील तटकरेंच्या आजच्या धाराशिव दौऱ्यातून सूरज चव्हाण यांना वगळण्यात आल्याची माहिती सूत्रांनी माझाला दिली आहे. लातूरमधील घटनेचे पडसाद धाराशिवमध्येही उमटण्याची शक्यता असल्याने सूरज चव्हाणांना दौऱ्यातून वगळण्यात आलंय आहे. तर या राड्यानंतर अजित पवारांनी सुरज चव्हाण यांना तडकाफडकी बोलावून घेतल्याची माहिती समोर येत आहे.
काल लातूरमध्ये घडलेल्या अत्यंत गंभीर आणि निषेधार्ह घटनेच्या पार्श्वभूमीवर, मी राष्ट्रवादी युवक काँग्रेसचे प्रदेशाध्यक्ष सूरज चव्हाण यांना त्यांच्या पदाचा त्वरित राजीनामा द्यायच्या स्पष्ट सूचना दिल्या आहेत.
— Ajit Pawar (@AjitPawarSpeaks) July 21, 2025
पक्षाच्या मूल्यांच्या विरोधात जाऊन केले जाणारे वर्तन कोणत्याही स्थितीत…
आणखी वाचा
महत्त्वाच्या बातम्या
