Hardeek Joshi : राणादाची नवी भूमिका... 'तुझेच मी गीत गात आहे' मालिकेत दिसणार परदेशी बिझनेसमनच्या भूमिकेत

Tuzech Mi Geet Gaat Aahe : 'तुझेच मी गीत गात आहे' या मालिकेत आता हार्दिक जोशीची (Hardeek Joshi) एन्ट्री होणार आहे.

Hardeek Joshi

Hardeek Joshi Entry In Tuzech Mi Geet Gaat Aahe : 'तुझेच मी गीत गात आहे' (Tuzech Mi Geet Gaat Aahe) ही छोट्या पडद्यावरील लोकप्रिय मालिका आहे. ही मालिका प्रेक्षकांच्या पसंतीस उतरावी यासाठी निर्माते वेगवेगळे प्रयत्न करत आहेत. आता या मालिकेत प्रेक्षकांच्या लाडक्या राणाची एन्ट्री होणार आहे. राणादाच्या नव्या भूमिकेची प्रेक्षकांना उत्सुकता आहे. 'तुझेच मी गीत गात आहे' या मालिकेत आता अभिनेता हार्दिक जोशीची (Hardeek Joshi) एन्ट्री होणार आहे.

शुभंकर ठाकूरच्या भूमिकेत दिसणार हार्दिक जोशी! 

'तुझेच मी गीत गात आहे' ही मालिका आता उत्कंठावर्धक वळणावर आली आहे. एकीकडे स्वराजच आपला मुलगा आहे हे सत्य मल्हारसमोर उलगडेल का याची उत्सुकता असताना आता मालिकेत एका नव्या पात्राची एन्ट्री होणार आहे. शुभंकर ठाकूर असं या नव्या पात्राचं नाव असून त्याचं मोनिकासोबत खास नातं आहे. हे नातं नेमकं काय असेल हे मालिकेच्या पुढील भागांमधून उलगडे. मात्र शुभंकरच्या एन्ट्रीने मालिकेत धमाकेदार वळण येणार आहे. लोकप्रिय अभिनेता हार्दिक जोशी शुभंकरची व्यक्तिरेखा साकारणार आहे.

शुभंकरच्या येण्याने मालिकेत नवं नाट्य रंगेल : हार्दिक जोशी
 
शुभंकरच्या भूमिकेबद्दल बोलताना हार्दिक जोशी म्हणाला,"एखादं नवं पात्र जेव्हा मालिकेत येतं तेव्हा ते नवी गोष्ट घेऊन येतं. ते पात्र ती गोष्ट रंगवत असतं. शुभंकरच्या येण्याने मालिकेत नवं नाट्य रंगेल. परदेशी असलेला शुभंकर बिझनेसच्या निमित्ताने भारतात आला आहे. शुभंकर स्पष्टवक्ता असला तरी मनाने अतिशय हळवा आहे. त्याला इतरांनी केलेली मदत तो कधीच विसरत नाही". शुभंकरचं कामत कुटुंब आणि मोनिकासोबत नेमकं काय कनेक्शन आहे हे लवकरच उलगडेल.

हार्दिक जोशीबद्दल जाणून घ्या... (Who Is Hardeek Joshi)

हार्दिक जोशी हा छोट्या पडद्यावरील लोकप्रिय अभिनेता आहे. 'तुझ्यात जीव रंगला' या मालिकेच्या माध्यमातून तो घराघरांत पोहोचला आहे. त्याच्या 'राणा'या भूमिकेला प्रेक्षकांचं खूप प्रेम मिळालं. या भूमिकेमुळे त्याला राणादा अशी ओळख मिळाली. 'तुझ्यात जीव रंगला' या मालिकेसह राजा शिवछत्रपती, राधा ही बावरी, दुर्वा, अस्मिता, अघोरी, तुझ्या माझ्या संसाराला आणि काय हवं, या मालिकांमध्येही हार्दिक जोशी झळकला आहे. 'रंगा पतंगा' या सिनेमातही तो झळकला आहे. 

हार्दिक जोशीने काही दिवसांपूर्वी एकथान शिंदे यांच्या शिवसेनेत प्रवास केला आहे. याबद्दल बोलताना तो म्हणालेला,"आजवर प्रेक्षकांसाठी काम केलं आहे. आता पडद्यामागून काम करणाऱ्या कलाकारांसाठी काम करायची इच्छा आहे. आता राजकारणात प्रवेश केल्याने ते काम करण्याची संधी मिळणार आहे".

संबंधित बातम्या