Saif Ali Khan Stabbing Case: तो अवैधरित्या भारतात पळाला, त्यानं आयुष्यात कधीच कुस्ती खेळली नाही; सैफच्या आरोपीच्या वडिलांचे बांगलादेशातून खळबळजनक खुलासे

Saif Ali Khan Stabbing Case: सैफ अली खानवर त्याच्या घरात हल्ला करणाऱ्या मोहम्मद शरीफुल इस्लाम शहजादच्या वडिलांनी एबीपी न्यूजशी बोलताना त्यांच्या मुलाबद्दल अनेक खुलासे केलेत.

Saif Ali Khan Stabbing Case

Source : ABP Majha

Saif Ali Khan Stabbing Case: बॉलिवूड अभिनेता (Bollywood Actor) सैफ अली खानवर (Saif Ali Khan) 16 जानेवारी रोजी चोरट्यानं घरात घुसून चाकूहल्ला केला. या हल्ल्यात सैफ अली खानला गंभीर दुखापत झाली होती. सैफवर हल्ला करणारा आरोपी मोहम्मद शरीफुल इस्लाम शहजादला (Mohammad Shahzad) पोलिसांनी अटक केली आहे. सध्या त्याची कसून चौकशी सुरू आहे, त्याच्या चौकशीतून दररोज नवनवे खुलासे होत आहेत. शरीफुल बांगलादेशातून पळून भारतात आला होता, अशी माहिती त्यानं पोलिसांना दिली. अशातच आता शरीफुलचे वडील रुहुल अमीन फकीर यांनी एबीपी न्यूजसोबत एक्स्लुझिव्ह बातचित केली आहे. यावेळी बोलताना त्यांनी अनेक महत्त्वाच्या मुद्द्यांवर भाष्य केलं. तसेच, शरीफुलनं केलेले अनेक दावे त्याच्या वडिलांनी फेटाळून लावले. 

शरीफुलनं तो अवैधरित्या बांगलादेशहून भारतात पळून आल्याचं सांगितलं होतं. त्याच्या वडिलांनी ही शरीफुल कोणत्याही वैध कागदपत्रांशिवाय भारतात आला होता, असं सांगितलं. तसेच, शरीफुल कधीही कुस्तीगीर नव्हता असंही त्यांनी सांगितलं. आरोपी शरीफुलचे वडील काय म्हणाले? पाहुयात सविस्तर... 

प्रश्न : तुमचं नाव काय आहे? 
उत्तर : मोहम्मद रूहुल आमीन. 

प्रश्न : तुमच्यासोबत सर्वात शेवटी तुमच्या मुलाचं बोलणं कधी झालं होतं? 
उत्तर : गेल्या आठवड्यात शुक्रवारी बोलणं झालं होतं. 

प्रश्न : काय बोलणं झालेलं? काय बोलायचा तुमच्याशी? 
उत्तर : घराबाबत बोलणं झालेलं, विचारायचा तुम्ही कसे आहात? घरातले इतर सगळेजण कसे आहेत? शरीफुलला दर महिन्याच्या दहा आणि पंधरा तारखे दरम्यान पगार मिळायचा. दर महिन्याला दहा ते पंधरा हजार रुपये तो आम्हाला पाठवायचा. शरीफुलनं सांगितलं होतं की, तो मुंबईत एका हॉटेलात काम करायचा, त्याच हॉटेल मालकानं शरीफुलला अटक केल्याचा व्हिडीओ आम्हाला पाठवला होता. 

प्रश्न : शरीफुल लहानपणी कसा होता? काय करायचा? त्यानं घर का सोडलं? 
उत्तर : आम्ही सारे राजकारणाशी जोडलेलो आहोत. आम्ही बांगलादेशात BNP पार्टीचा भाग होतो. मी आणि माझी आणखी दोन मुलं आमच्यावर खूप अत्याचार झाले आहेत. 2024 मध्ये जानेवारी महिन्यात शेख हसीना शक्तीशाली झाल्यानंतर आम्हाला आमच्या गावात राहणंही मुश्कील झालं होतं. तेव्हा शरीफुल मला म्हणाला, अब्बा आता आपण काय करायचं? त्यानंतर 2024 मार्च महिन्याच्या शेवटी शरीफुल अवैध मार्गानं भारतात गेला. 

प्रश्न : शरीफुल आपल्यासोबत काही कागदपत्र घेऊन आला होता? 
उत्तर : नाही, तो भारतात अवैधरित्या आलेला, त्याच्यासोबत कोणतीच कागदपत्र नव्हती. 

प्रश्न : बांगलादेशात शरीफुल काय काम करायचा? 
उत्तर : तो बाईक चालवण्याचं काम करत होता. मीच त्याला बाईक खरेदी करून दिली होती. आमच्या गावात बरीच लोक बाईक चालवण्याचं काम करतात. शरीफुलही इतरांप्रमाणे बाईक चालवायचा. आम्हाला बांगलादेशात बाईक चालवण्याचं लायसन्सही देतात. 

प्रश्न : शरीफुल कुस्ती खेळायचा का? 
उत्तर : शरीफुलनं कधीच कुस्ती खेळलेली नाही, त्याला कुस्ती खेळायला कधीच आवडायचं नाही. 

प्रश्न :  तुमच्या घरात कोण-कोण राहातं? तुमच्या कुटुंबात किती लोक राहतात? 
उत्तर : आमच्या कुटुंबात मी, माझी पत्नी आणि तीन मुलं आहे. 

प्रश्न :  तुम्ही हिंदी बोलू शकता? 
उत्तर : नाही मला हिंदी बोलता येत नाही, थोडीफार समजते. मी बांगलादेशातील खालिदपूर जिल्ह्यातील फुलना येथील एका जूट मिलमध्ये लिपिक म्हणून काम करतो. कारखान्याचं नाव - फूलना पीपल्स जूट मिल लि.

प्रश्न :  तुम्ही क्लर्कची नोकरी करता, तुमचा मुलगाही चांगलं काम करायचा, मग त्यानं भारतातील एका बड्या सेलिब्रिटी अॅक्टरच्या घरात घुसून त्याच्यावर हल्ला केला, तुम्हाला माहितीय? 
उत्तर : मला याबाबत काहीच माहीत नाही, मी सगळं टीव्ही चॅनलवर पाहिलं होतं. मला माहितीही नव्हतं की, शरीफुलनं तिथे कुणावर हल्ला केला आहे. आम्ही तर 2008 मध्ये झालोकाथीमध्ये दुसऱ्या जिल्ह्यातून पळून आलो होतो. तिथला सरपंच आम्हाला त्रास द्यायचा.