Saif Ali Khan Attack Case : सैफवर हल्ला झाल्याची माहिती पोलिसांना करिनानं दिलीच नाही, लीलावती रुग्णालयातून मिळाली
Saif Ali Khan Attack Case : सैफ अली खानवर हल्ला करणाऱ्या आरोपीला अटक करण्यात आल्याचा आरोप मुंबई पोलिसांनी केला आहे. पोलिसांकडे पुरेसे पुरावे आहेत.
Saif Ali Khan Attack Case : अभिनेता सैफ अली खानवर (Actor Saif Ali Khan) वांद्रे (Bandra) येथील त्याच्या राहत्या घरात घुसून चोरट्यानं हल्ला केला. या हल्ल्यात सैफ गंभीर जखमी झाला होता. त्यानंतर त्याला तात्काळ लीलावती रुग्णालयात (Lilavati Hospital) दाखल करण्यात आलं. रुग्णालयात दाखल केल्यानंतर सैफवर तात्काळ शस्त्रक्रिया करण्यात आल्याची माहिती रुग्णालय प्रशासनानं दिली होती. तेव्हापासून आतापर्यंत या प्रकरणात अनेक खळबळजनक खुलासे करण्यात आले आहेत. आता याप्रकरणी आणखी एक धक्कादायक खुलासा झाला आहे. पोलिसांना सैफ अली खानवरील हल्ल्याची माहिती करिना (Kareena Kapoor Khan) किंवा खान कुटुंबाकडून नाही तर, लीलावती रुग्णालयातून मिळाली, अशी माहिती पोलिसांनी दिली आहे.
अभिनेता सैफ अली खानवरील हल्ल्याबाबत माध्यमांशी बोलताना पश्चिम विभागाचे अतिरिक्त एसीपी परमजीत सिंह दहिया म्हणाले की, पोलिसांना सैफ अली खानवरील हल्ल्याची माहिती कुटुंबाकडून नाही तर, लीलावती रुग्णालयातून मिळाली. सैफ अली खान पहाटे 2:57 वाजता ऑटो रिक्षानं रुग्णालयात पोहोचला. दरम्यान, पोलिसांनी अद्याप सैफला रुग्णालयात कोणी नेलं आणि हल्ल्यानंतर कुटुंबानं पोलिसांना का कळवलं नाही? याचा खुलासा केलेला नाही.
पोलीस अधिकारी दहिया यांनी दावा केला की, आम्ही ज्या व्यक्तीला अटक केली आहे, तो पूर्णपणे योग्य आरोपी आहे. यामध्ये संशयाला वाव नाही. आमच्याकडे फिजिकल, ओरल आणि टेक्निकल असे तिन्ही पुरावे आहेत. त्यामुळे या पुराव्यांच्या आधारे पोलीस आपली बाजू कोर्टात सिद्ध करू शकतात.
पुणे सीआयडीकडे सॅम्पल्स
आरोपींच्या फिंगरप्रिंटबाबत जे अंदाज लावले जात आहेत, ते पूर्णपणे चुकीचे आणि निराधार असल्याचं एसीपी दहिया यांनी सांगितलं. दरम्यान, आतापर्यंत फॉरेंसिक डिपार्टमेंटकडून वांद्रे पोलिसांना फिंगरप्रिंटचे रिपोर्ट्स मिळालेले नाहीत. वांद्रे पोलिसांनी फिंगरप्रिंटचे नमुने पुणे सीआयडीकडे पाठवल्याचही त्यांनी सांगितलं आहे.
आरोपी बंगालमार्गे बांगलादेशातून भारतात
एसीपी दहिया पुढे म्हणाले की, जेव्हा आरोपी पश्चिम बंगालमार्गे भारतात आला, तेव्हा तो काही दिवस कोलकातामध्येही राहिला. कोलकातामध्ये ज्या महिलेच्या आधार कार्डवरून आरोपीनं सिम कार्ड घेतलं होतं, तिचा जबाब नोंदवण्यात आला आहे. आमची टीम कोलकातामध्ये असल्याची माहितीही त्यांनी दिली. आरोपीकडे असलेला चाकू आणि हेक्सा ब्लेड जप्त करण्यात आल्याची माहितीही दहिया यांनी दिली. सर्व साक्षीदारांचे जबाब नोंदवण्यात आले आहेत. आरोपीची ओळख परेड अद्याप झालेली नाही.
पोलिसांकडून लपवाछपवी?
दरम्यान, सैफ अली खान प्रकरणात अजुनही अनेक प्रश्न अनुत्तरीतच आहेत. ज्यांची उत्तरं मुंबई पोलिसांनीही दिलेली नाहीत. जसं की, ज्या दिवशी हल्ला झाला, त्या दिवशी नेमकं काय घडलं? याचा सीक्वेन्स अद्याप पोलिसांनी सांगितलेला नाही. आरोपीला सैफचे 11 व्या मजल्यावर असलेलं घर चोरीसाठी योग्य का वाटलं? तो खालच्या मजल्यावरही चोरी करू शकला असता. पोलिसांना पहाटे 3 वाजता आरोपीबद्दल माहिती मिळाली, तरीही तो सकाळी 7 वाजेपर्यंत सैफच्या घराजवळील वांद्रे तलाव, लकी हॉटेल परिसरात कसा फिरत राहिला? हे सर्व प्रश्न अनुत्तरीतच आहेत.
महत्त्वाच्या इतर बातम्या :
महत्त्वाच्या बातम्या
