Naal 2 : नागराज मंजुळेंचा ‘नाळ 2’ येणार प्रेक्षकांच्या भेटीला, सोशल मीडियावर केली चित्रपटाची घोषणा!

Naal 2 : दोन वर्षांपूर्वी प्रेक्षकांच्या भेटीला आलेल्या ‘नाळ’ (Naal 2) या चित्रपटाने प्रेक्षकांची मने जिंकून घेतली होती. या चित्रपटातील चिमुकल्या ‘चैत्या’ने प्रेक्षकांच्या मनाला भुरळ घातली होती.

Naal 2

Naal 2 : दोन वर्षांपूर्वी प्रेक्षकांच्या भेटीला आलेल्या ‘नाळ’ (Naal) या चित्रपटाने प्रेक्षकांची मने जिंकून घेतली होती. या चित्रपटातील चिमुकल्या ‘चैत्या’ने प्रेक्षकांच्या मनाला भुरळ घातली होती. या चित्रपटाला प्रेक्षकांचा उदंड प्रतिसाद मिळाला होता. आता या चित्रपटाच्या चाहत्यांसाठी एक आनंदाची बातमी आहे. लवकरच या चित्रपटाचा दुसरा भाग प्रेक्षकांच्या भेटीला येणार आहे. नुकतीच नागराज मंजुळे (Nagraj Manjule) यांनी त्यांच्या ‘नाळ 2’ या चित्रपटाची घोषणा केली आहे. सोशल मीडियावर पोस्ट शेअर करत नागराज मंजुळे यांनी ही माहिती दिली आहे.

‘नाळ 2’ची (Naal 2) घोषणा करताना नागराज मंजुळे यांनी सोशल मीडियावर एक पोस्ट शेअर केली आहे. यात त्यांनी ‘नाळ’ चित्रपटाच्या स्टारकास्टचा फोटो शेअर केला आहे. ‘नाळ 2’च्या नावाने चांगभलं म्हणत त्यांनी ही पोस्ट शेअर केली आहे.

पाहा पोस्ट :

काय म्हणाले नागराज मंजुळे?

‘मागच्या महिन्यात सुधाकरने अचानक फोन करून सांगितलं की नाळचा दुसरा भाग लिहिलाय. ऐकवायला कधी भेटुयात? नाळचा दुसरा भाग काय होऊ शकतो, याबाबत माझ्याही मनात उत्सुकता तयार झाली. स्क्रिप्ट ऐकली ती इतकी अनपेक्षित तरीही सहज नि भारी होती की, दोन महिन्यांच्या जय्यत तयारीनिशी फिल्मचं शूटिंग झटक्यात सुरू केलं. पहिल्या ‘नाळ’ प्रमाणेच 'नाळ'चा दुसरा भागही संस्मरणीय होईल अशी आशा आहे! ‘नाळ 2’ नावानं चांगभलं!!!’, असं त्यांनी आपल्या पोस्टमध्ये लिहिले आहे.

‘नाळ’ने राष्ट्रीय पुरस्कारांवर कोरले नाव

‘नाळ’ या चित्रपटाने प्रेक्षकांची मने जिंकली होती. केवळ प्रेक्षकच नव्हे, तर या चित्रपटाने समीक्षकांचीही वाहवा मिळवली होती. 66व्या राष्ट्रीय चित्रपट पुरस्कारांमध्ये या चित्रपटाने बाजी मारत दोन पुरस्कार पटकावले होते. या चित्रपटातल्या 'चैत्या'ची भूमिका साकारणाऱ्या श्रीनिवास पोफळे याला सर्वोत्कृष्ट बालकलाकाराचा पुरस्कार जाहीर झाला होता. तर, याच चित्रपटासाठी दिग्दर्शक सुधाकर रेड्डी यंकट्टी यांनी सर्वोत्कृष्ट नवोदित दिग्दर्शकाचा पुरस्कार मिळवला होता. आता लवकरच या चित्रपटाचा दुसरा भाग प्रेक्षकांच्या भेटीला येणार असल्याने चाहते देखील उत्सुक झाले आहेत.

नागराज मंजुळे यांचं अभिनयात पदार्पण

‘नाळ’ या चित्रपटातून दिग्दर्शक नागराज मंजुळे यांनी अभिनय विश्वात पदार्पण केले होते. प्रेक्षकांच्या पसंतीस उतरलेल्या 'नाळ' या चित्रपटाने रिलीजच्या पहिल्या आठवड्यात तब्बल 14 कोटी रुपयांची कमाई केली होती. ‘नाळ’ या चित्रपटात प्रसिद्ध अभिनेत्री देविका दफ्तरदार आणि बालकलाकार श्रीनिवास पोकळे हे मायलेकाच्या भूमिकेत झळकले होते.    

हेही वाचा :