US Iran War : अमेरिका- इराण युद्ध सुरु झाल्यापासून शेअर बाजारात 33 लाख कोटी बुडाले, गुंतवणूकदारांचं 6 वर्षातील सर्वात मोठं नुकसान
Share Market : भारतीय शेअर बाजारात अमेरिका आणि इराण यांचं युद्ध सुरु झाल्यापासून मोठी घसरण सुरु आहे. यामुळं सेन्सेक्स आणि निफ्टीत घसरण सुरु आहे.
मुंबई : भारतीय शेअर बाजारात 13 मार्चला देखील मोठी घसरण झाली. सलग तिसऱ्या दिवशी शेअर बाजारात घसरण झाल्यानं सेन्सेक्स आणि निफ्टी 11 महिन्यांच्या निचांकी पातळीवर पोहोचले आहेत. आखाती देशातील वाढत्या तणावाच्या पार्श्वभूमीवर गुंतवणूकदारांनी सावध भूमिका घेतलीय.भारतीय शेअर बाजारात सेन्सेक्स 1471 अंकांनी घसरुन 74564 अंकांवर बंद झाला. तर, निफ्टी 50 निर्देशांक 488 अंकांनी घसरुन 23151 अंकांवर आला. निफ्टी 7 एप्रिल 2025 नंतर पहिल्यांदा 23200 च्या खाली आला आहे.
निफ्टी 50 निर्देशांकात या आठवड्यात 5 टक्क्यांपेक्षा अधिक घसरण झाली आहे. ही गेल्या चार वर्षातील सर्वाधिक खराब कामगिरी आहे. जून 2022 मध्ये निफ्टी एका आठवड्यात 5 टक्क्यांनी घसरला होता. तर, सेन्सेक्स 5.5 टक्क्यांनी घसरला, ही गेल्या चार वर्षातील खराब कामगिरी आहे.
Share Market Loss : गुंतवणूकदांरांचे 33 लाख कोटी बुडाले
विदेशी गुंतवणूकदारांकडून सातत्यानं सुरु असलेल्या विक्रीच्या सत्रामुळं इतर गुंतवणूकदारांना नुकसान सहन करावं लागत आहे. बीएसईवर लिस्ट असलेल्या कंपन्यांचं बाजारमूल्य 9 मार्च ते 13 मार्च या कालावधीत 20 लाख कोटींनी कमी झालं आहे. तर, अमेरिका- इस्त्रायल आणि इराण यांच्यातील युद्ध सुरु झाल्यापासून गुंतवणूकदारांनी 33 लाख कोटी गमावले आहेत. म्हणजे सेन्सेक्सवर लिस्ट असलेल्या कंपन्यांचं बाजारमूल्य 33 लाख कोटींनी कमी होऊन 430 लाख कोटींवर पोहोचलं आहे.
बाजार विश्लेषकांच्या मते भारतीय शेअर बाजारासमोरील प्रमुख आव्हान म्हणजे ब्रेंट क्रुड ऑईलच्या वाढत्या किमती हे आहे. ब्रेंट क्रूड ऑईलसाठी सध्या 102 डॉलर प्रति बॅरल मोजावे लागत आहेत.
विशेष बाब म्हणजे आंतरराष्ट्रीय ऊर्जा एजन्सीनं आपात्कालीन साठ्यातून 40 कोटी बॅरल तेल जारी करण्याचा निर्णय आणि समुद्रात असलेल्या जहाजांमधील रशियाच्या तेल खरेदीला अमेरिकेनं परवानगी देऊनही ब्रेंट क्रुड ऑईलच्या दरात घसरण झालेली नाही. आखाती देशात सुरु असलेल्या संघर्षामुळं तेलाच्या पुरवठ्या बाबत अनिश्चितता निर्माण झाली आहे. इराण आणि अमेरिका यांच्यातील तणाव कमी होण्याचे कोणतेही संकेत मिळत नसून यामुळं बाजारात चिंतेचे वातावरण निर्माण झाली आहे.
गोल्डमॅन सॅक्सनं दिलेल्या इशाऱ्यानुसार जर होर्मुझच्या सामुद्रधुनीतून होणारा पुरवठा खंडित राहिला तर ब्रेंट क्रुड ऑईलचे दर 150 डॉलर प्रति बॅरलवर पोहोचू शकतो. जर अशी स्थिती निर्माण झाली तर जागतिक अर्थव्यवस्था आणि जगभरातील शेअर बाजारांसाठी धक्कादायक स्थिती असेल.
अमेरिकन डॉलर मजबूत होणं देखील इतर बाजारांसाठी चिंता निर्माण करणारी स्थिती आहे. डॉलर मजबूत झाल्यानं विदेशी गुंतवणूकदार इतर बाजारांमधून पैसे काढत आहेत, याचा भारताच्या शेअर बाजारावर देखील परिणाम होत आहे.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
