Ekta Kapoor : एकता कपूरवर अटकेची टांगती तलवार, निर्माती विरोधात ‘अरेस्ट वॉरंट’ जारी!

Ekta Kapoor :  एकता कपूरने बनवलेल्या ‘XXX’  या वेब सीरिजमध्ये सैनिकांच्या पत्नीची आक्षेपार्ह प्रतिमा सादर केल्याच्या विरोधात दाखल केलेल्या खटल्यात हे वॉरंट काढण्यात आले आहे.

Ekta Kapoor

Ekta Kapoor : बिहारमधील बेगुसराय कोर्टाने बॉलिवूडची प्रसिद्ध चित्रपट, टीव्ही आणि वेब सीरिजची निर्माती एकता कपूर (Ekta Kapoor) आणि तिची आई शोभा कपूर (Shobha Kapoor) यांच्याविरोधात अटक वॉरंट (Arrest Warrant) जारी केले आहे. एकता कपूरने बनवलेल्या ‘XXX’  या वेब सीरिजमध्ये सैनिकांच्या पत्नीची आक्षेपार्ह प्रतिमा सादर केल्याच्या विरोधात दाखल केलेल्या खटल्यात हे वॉरंट काढण्यात आले आहे. बेगुसराय न्यायदंडाधिकारी विकास कुमार यांच्या कोर्टातून हे वॉरंट जारी करण्यात आले आहे.

एकता कपूरच्या ‘अल्ट बालाजी’ या बॅनरखाली बनलेली 'ट्रिपल एक्स सीझन 2' ही वेब सीरिज रिलीज झाल्यानंतर एकतावर देशाच्या सैनिकांच्या चारित्र्याचा, त्यांच्या गणवेशाचा आणि त्यांच्या पत्नींचा अपमान केल्याचा आरोप केला गेला होता. या सीरिजच्या एका एपिसोडमध्ये असे दाखवण्यात आले होते की, जेव्हा एखादा सैनिक सीमेवर आपले कर्तव्य बजावत असतो, तेव्हा त्याची पत्नी त्याच्या पाठीमागे इतर पुरुषांशी अवैध संबंध ठेवते. एवढेच नाही, तर या स्त्रीया इतर पुरुषांना घरी बोलावून, पतीचा सैनिकी गणवेश घालून परपुरुषासोबत घृणास्पद काम करतात.

नेमका वाद काय?

एकता कपूरच्या (Ekta Kapoor) ‘ट्रिपल एक्स’ या वेब सीरिज विरोधात माजी सैनिक शंभू कुमार यांनी 6 जून 2020 रोजी न्यायालयात तक्रार पत्र दाखल केले. एकता कपूरच्या 'ट्रिपल एक्स सीझन 2' या वेब सीरिजमध्ये भारतीय जवानांच्या पत्नींबद्दल आक्षेपार्ह दृश्य दाखवण्यात आल्याचा आरोप त्यांनी केला होता. शंभू कुमार म्हणाले की, भारतीय सैनिक स्वतःचा जीव धोक्यात घालून देशाचे रक्षण करतात. त्यांना आदराने वागवले पाहिजे. पण, या वेब सीरिजमध्ये भारतीय सैनिक आणि त्याच्या पत्नीचे असे चुकीच्या पद्धतीने चित्रण करणे हा सैनिकांचा अपमान आहे. या प्रकरणी फेब्रुवारी 2021मध्ये एकता आणि शोभा कपूर यांच्याविरुद्ध समन्स जारी करण्यात आले होते. आता न्यायालयाने या प्रकरणात अटक वॉरंट जारी केले आहे.

ते सीन हटवल्याचा एकता कपूरचा निर्वाळा

या वादाबद्दल एकता कपूरनेही प्रतिक्रिया दिली होती. एकताने (Ekta Kapoor) म्हटले होते की, या दृशांमुळे भावना दुखावल्याची माहिती मिळताच तिने वेब सीरिजमधून ही दृश्ये काढून टाकली आहेत. या वादावर एकता कपूरने लोकांची, प्रेक्षकांची माफी देखील मागितली होती. ‘XXX’ ही वेब सीरिज प्रदर्शित झाल्यानंतर या सीरिजच्या विरोधात देशभरात निदर्शनेही झाली होती. एकता कपूरविरोधात देशभरात अनेक ठिकाणी तक्रार दाखल करण्यात आल्या होत्या. तिच्यावर बिहारमधील अनेक जिल्ह्यांमध्ये गुन्हेही दाखल आहेत.

हेही वाचा :