सलमानच्या 'भारत'नंतर प्रियांकाने संजय लीला भंसाळींचा सिनेमा नाकारला

प्रियांका चोुप्राने सलमान खानच्या 'भारत' सिनेमातून माघार घेतल्याने चर्चेत होती. आता प्रियांकाने संजय लीला भंसाळी यांच्या सिनेमालाही नकार दिला आहे.

नवी दिल्ली : बॉलिवूडची 'देसी गर्ल' प्रियांका चोप्रा सध्या विविध कारणांमुळे चर्चेत आहे. प्रियांका सलमान खानच्या 'भारत' सिनेमातून माघार घेतल्याने चर्चेत होती. मात्र आता प्रियांकाने संजय लीला भंसाळी यांच्या सिनेमालाही नकार दिल्याची बातमी समोर येत आहे.

संजय लीला भंसाळी गँगस्टर ड्रामा सिनेमा बनवण्याच्या तयारीत आहेत. या सिनेमासाठी भंसाळी यांनी प्रियांकाला विचारणा केली. मात्र प्रियांकाने भंसाळी यांच्या सिनेमाची ऑफर नाकारली असल्याची माहिती समोर येत आहे. मिळालेल्या माहितीनुसार भंसाळी यांनी महिला गँगस्टर 'गंगूबाई कोठेवाली' या भूमिकेसाठी प्रियांकाला कास्ट केलं होतं. मात्र प्रियांकाने नकार दिल्याने या सिनेमाच्या निर्मितीची प्रक्रिया थांबली आहे. या भूमिकेसाठी भंसाळी प्रियांकाला घेण्यासाठी उत्सुक आहेत. त्यामुळे ही भूमिका अद्याप कोणालाही ऑफर करण्यात आलेली नाही.

प्रियांकाने सलमान खानच्या भारत सिनेमाला नकार दिल्यानंतर हॉलिवूडचा सिनेमा साईन केला आहे. या सिनेमात प्रियांका क्रिस प्रॅटसोबत स्क्रिन शेअर करताना दिसणार आहे. याशिवाय बॉलिवूडमधील एका सिनेमात प्रियांका फरहान अख्तरसोबत झळकणार आहे. 'स्काय इज पिंक' असं या सिनेमाचं नाव असून शोनाली बोस या सिनेमाचं दिग्दर्शन करणार आहे.

सलमान खानसोबतचा सिनेमा सोडण्याचं एक कारण निक जोनस सोबतचा साखरपुडा असल्याचं बोललं जात आहे. अनेकांनी प्रियांका आणि निकच्या लग्नाची शक्यताही वर्तवली आहे. मात्र याबाबत विदेशी मीडियाने कोणतीही स्पष्ट माहिती दिलेली नाही.