Raundal: 'ख्वाडा' आणि 'बबन'च्या यशानंतर भाऊसाहेब शिंदे पुन्हा येणार प्रेक्षकांच्या भेटीस; 'रौंदळ' ची रिलीज डेट जाहीर
'रौंदळ' (Raundal) या आगामी मराठी चित्रपटात भाऊसाहेबचा (Bhau Shinde) रांगडा लूक बघायला मिळणार आहे.
Raundal: अभिनेता भाऊसाहेब शिंदे (Bhau Shinde) पुन्हा एका नव्या रूपात प्रेक्षकांच्या भेटीला येण्यासाठी सज्ज झाला आहे. राष्ट्रीय पुरस्कार विजेत्या 'ख्वाडा' चित्रपटात मुख्य भूमिका साकारल्यानंतर 'बबन'मध्ये भाऊसाहेबनं काम केलं. आता 'रौंदळ' या आगामी मराठी चित्रपटात भाऊसाहेबचा रांगडा लूक बघायला मिळणार आहे. 3 मार्च 2023 रोजी 'रौंदळ' हा चित्रपट प्रेक्षकांच्या भेटीस येणार आहे. या चित्रपटाची भाऊसाहेब शिंदेचे चाहते उत्सुकतेने वाट बघत आहेत.
भूमिका फिल्म्स अ‍ॅण्ड एंटरटेनमेंटच्या निर्मिती संस्थेअंतर्गत बाळासाहेब शिंदे, डॉ. पुरुषोत्तम भापकर, प्रमोद चौधरी, भाऊ शिंदे आणि राईज बिझनेस ग्रुप यांनी 'रौंदळ' या चित्रपटाची निर्मिती केली आहे. रवींद्र आवटी, संतोष आवटी, कैलाश गुंजाळ आणि संजय कुंजीर या चित्रपटाचे सहनिर्माते आहेत. या चित्रपटाचं दिग्दर्शन गजानन नाना पडोळ यांनी केलं आहे. 'रौंदळ' ची रिलीज डेट सोशल मीडियाच्या माध्यमातून घोषित करण्यात आली आहे. या चित्रपटात भाऊच्या जोडीला नेहा सोनावणे आहे. या चित्रपटातील 'मन बहरलं...' हे प्रेमळ गीत काही दिवसांपूर्वीच रसिकांच्या भेटीला आलं.
'रौंदळ'बाबत दिग्दर्शक गजानन पडोळ म्हणाले की, 'आजवर ग्रामीण बाजाचे बरेच चित्रपट रिलीज झाले असले तरी या चित्रपटाचा बाज खऱ्या अर्थाने महाराष्ट्राच्या मातीचा सुगंध दूरवर पसरवणारा असल्याची जाणीव रसिकांना होईल. सत्य घटनेवर आधारलेल्या या कथेत गावातील वास्तव घटनांसह इतरही बऱ्याच गोष्टी पाहायला मिळणार आहेत. 'रौंदळ'च्या माध्यमातून रसिकांसमोर एक म्युझिकल सिनेमा सादर करण्याचा आमच्या संपूर्ण टिमचा प्रयत्न आहे. भाऊसाहेब शिंदेनं साकारलेला नायक आजवर मराठी चित्रपटांमध्ये पाहिलेल्या नायकापेक्षा खूप वेगळा असल्याचं चित्रपट पाहताना प्रेक्षकांना जाणवेल. चित्रपटगृहातून बाहेर पडताना हा चित्रपट प्रेक्षकांना बरंच काही देऊन जाईल असंही पडोळ म्हणाले.
या चित्रपटात यशराज डिंबाळे, सुरेखा डिंबाळे, शिवराज वाळवेकर, संजय लाकडे, गणेश देशमुख, सागर लोखंडे आदी कलाकार आहेत. सुधाकर शर्मा, डॅा. विनायक पवार, बाळासाहेब शिंदे यांनी लिहिलेल्या गीतरचना वैशाली माडे, सोनू निगम, जावेद अली, गणेश चंदनशिवे, स्वरूप खान, दिव्या कुमार, हर्षित अभिराज यांनी गायल्या आहेत. राष्ट्रीय पारितोषिक विजेता साऊंड डिझायनर महावीर साबन्नावरनं या चित्रपटाचं सिंक साऊंड आणि डिझाईन केलं आहे.
विक्रमसेन चव्हाण या सिनेमाचे असोसिएट दिग्दर्शक आहेत. रोहित नागभिडे यांनी पार्श्वसंगीत दिलं असून, नेहा मिरजकर यांनी कोरिओग्राफी केली आहे. समीर कदम यांनी मेकअप, सिद्धी योगेश गोहिल यांनी कॅास्च्युम, मोझेस फर्नांडीस यांनी फाईट सीन्स, गजानन सोनटक्के यांनी कला दिग्दर्शनचे काम पाहिलं आहे.
वाचा इतर महत्वाच्या बातम्या:
महत्त्वाच्या बातम्या
ट्रेंडिंग न्यूज
