Anushka Sharma, Virat Kohli : दोन हेल्मेटसह वाहतुकीचे नियम पाळत मुंबईच्या रस्त्यांवर विराट अन् अनुष्काने लुटली पावसाची मजा! पाहा व्हिडीओ...

Anushka Sharma, Virat Kohli : भारतीय क्रिकेटपटू विराट कोहलीने, त्याची पत्नी आणि बॉलिवूड अभिनेत्री अनुष्का शर्मासोबत स्कूटीवरून सफर करत मुंबईच्या रस्त्यावर पावसाचा आनंद लुटला.

Anushka Sharma, Virat Kohli

Anushka Sharma, Virat Kohli : भारतीय क्रिकेटपटू विराट कोहलीने (Virat Kohli), त्याची पत्नी आणि बॉलिवूड अभिनेत्री अनुष्का शर्मासोबत (Anushka Sharma) स्कूटीवरून सफर करत मुंबईच्या रस्त्यावर पावसाचा आनंद लुटला. विराट कोहली आणि अनुष्का एका जाहिरात फोटोशूटसाठी एका स्टुडिओत पोहोचले होते आणि यावेळी त्यांनी मुंबईच्या पावसाळ्याचा आनंद घेतला. यावेळी दोघांनीही चक्क स्कूटीवर फिरण्याचा आनंद लुटला. दोघांनी संपूर्ण चेहरा झाकणारे हेल्मेट परिधान केले होते. पण, त्यांच्या चाहत्यांनी त्यांना ओळखले आणि आता त्यांचा व्हिडीओ सोशल मीडियावर व्हायरल होत आहेत.

विराट आणि अनुष्का एका जाहिरातीच्या शूटिंगसाठी मड आयलंडवर गेले होते. तिथून परतताना दोघे काळ्या रंगाच्या स्कूटीवर फिरताना दिसले. यावेळी दोघेही काळे हेल्मेट परिधान करून, मीडियापासून स्वतःला लपवण्याचा प्रयत्न करताना दिसले. पण, या स्टार जोडप्याला कॅमेरामनने ओळखले आणि चाहत्यांनीही त्यांचा पाठलाग केला. अखेर कॅमेऱ्यात कैद झाल्यावर अनुष्का आणि विराटने मीडियासमोर फोटो पोजही दिल्या.

पाहा व्हिडीओ :

व्हायरल व्हिडीओंमध्ये विराट आणि अनुष्काने काळे हेल्मेट घातलेले दिसत आहे. विराट कोहली स्कूटी चालवत असताना अनुष्का शर्मा त्याच्या मागे बसली आहे. यावेळी अनुष्का पूर्णपणे ब्लॅक आउटफिटमध्ये दिसत आहे. तर, दुसरीकडे विराट कोहलीने पांढऱ्या स्नीकर्ससह हिरवा शर्ट आणि काळी जीन्स परिधान केली होती. दोघांचे व्हिडीओ सध्या सोशल मीडियावर व्हायरल झाले आहेत. इंस्टाग्रामवरही काही फोटो आणि व्हिडीओ मोठ्या प्रमाणात शेअर केले जात आहेत.

चाहत्यांना मिळाला सुखद धक्का

यावेळी विराट स्कूटी चालवत होता, तर अनुष्का मागे बसली होती. कोट्यवधींचा मालक असलेल्या विराट आणि अनुष्काला स्कूटीवरून प्रवास करताना पाहून चाहते आश्चर्यचकित झाले आहेत. कोहली आणि अनुष्का बऱ्याच दिवसांनी मीडियासमोर आले आहेत. आई-वडील झाल्यापासून आता ते क्वचितच सार्वजनिक ठिकाणी दिसतात. मात्र, त्यांना स्कूटीवर पाहून चाहतेही खुश झाले आहेत.

विराट कोहली सध्या ब्रेकवर

विराट कोहली सध्या क्रिकेटमधून ब्रेकवर आहे. सध्या झिम्बाब्वे दौऱ्यावर गेलेल्या टीम इंडियाचा विराट भाग नाही. मात्र, तो आता आशिया कपमधून पुनरागमन करू शकतो. या स्पर्धेसाठी त्याचा संघात समावेश करण्यात आला आहे. भारत 28 ऑगस्टला पाकिस्तानविरुद्धच्या मोहिमेला सुरुवात करणार आहे. 27 ऑगस्टपासून यूएईमध्ये आशिया कपला सुरुवात होत आहे. सध्या विराट कोहली मुंबईत सराव करत आहे.

हेही वाचा :