बीड ते सातारा! मतदारांनी 'तुतारी'सोबत पिपाणी'ही वाजवली, शरद पवारांच्या राष्ट्रवादीला अनेक जागांवर फटका!
Lok Sabha Election 2024 Result : लोकसभा निवडणुकीचा निकाल आता स्पष्ट झाला आहे. या निवडणुकीत पिपाणी हे निवडणूक चिन्ह असणाऱ्या उमेदवारांना हजारोंच्या संख्येने मतं मिळाली आहेत.
मुंबई : लोकसभा निवडणुकीत (Lok Sabha Election 2024) महाविकास आघाडीच्या (Maha Vikas Aghadi) घटकपक्षांनी जोरदार कामगिरी केली. या निवडणुकीत काँग्रेस (Congress) महाराष्ट्रात सर्वांत मोठा पक्ष ठरला आहे. ठाकरे यांची शिवसेना (Shivsena) तसेच शरद पवार (Sharad Pawar) यांच्या राष्ट्रवादीच्या जागा वाढल्या आहेत. दरम्यान, शरद पवार यांच्या पक्षाच्या उमेदवाराला पिपाणी या निवडणूक चिन्हामुळे अनेक जागांवर मतफुटीचा फटका बसला आहे. साताऱ्यातील (Satara) जागेवरही याच मतफुटीमुळे पवारांच्या राष्ट्रवादीला फटका बसल्याचं बोललं जातंय.
'तुतारी वाजवणारा माणूस' ऐवजी 'पिपाणी'ला मतं
'तुतारी वाजवणार माणूस' हे शरद पवार यांच्या राष्ट्रवादी पक्षाचे निवडणूक चिन्ह आहे. दुसरीकडे निवडणूक आयोगाने काही अपक्ष उमेदवारांना पिपाणी हे निवडणूक चिन्ह दिले होते. त्यामुळे मतदारांचा गोंधळ झाला आणि 'तुतारी वाजवणारा माणूस' ऐवजी 'पिपाणी'ला अनेक ठिकाणी मतदान अधिक झाल्याचा राष्ट्रवादीने दावा केला आहे.सातारा, दिंडोरी, रावेर, भिवंडी, शिरूर अशा जागांवर पिपाणी या चिन्हावर निवडणूक लढवणाऱ्या उमेदवाराला लक्षणीय मतं पडली आहेत.
पिपाणी चिन्ह असणाऱ्यांना किती मतं?
पिपाणी या चिन्हामुळे आम्हाला मिळणारी मतं फुटली आहेत, असं पवार यांच्या राष्ट्रवादीनं म्हटलं आहे. रावेर, दिंडोरी, भिवंडी, बारामती, शिरुर, अहमदनगर, बीड, सातारा या जागांवर पिपाणी या चिन्हांवर निवडणूक लढवणाऱ्या उमेदवारांना कित्येक मतं पडली आहेत. आकड्यांत सांगायचे झाल्यास रावेर या जागेवर पिपाणी चिन्हावर निवडणूक लढवणारे एकनाथ साळुंके यांना 43 हजार 957 मतं पडली आहेत. त्याच प्रमाणे दिंडोरी या जागेवरून बाबू भगरे (सर) यांना 1 लाख 3 हजार 632 मते पडली आहेत. भिवंडी जागेवर कांचन वखरे यांना 24 हजार 625 मते मिळाली. बारामती या जागेवर शेख सोएलशहा यांना 14 हजार 917 मते पडली आहेत. शिरुरमध्ये मनोहर वाडेकर यांना 28 हजार 324, अहमदनगरमध्ये गोरख आळेकर यांना 44 हजार 597, बीडमध्ये अशोक थोरात यांना 54 हजार 850 मते, साताऱ्यात संजय गाडे यांना 37 हजार 62 मते पडली आहेत.
...तर साताऱ्यात पवारांच्या उमेदवाराच विजय झाला असता
साताऱ्यात भाजपचे उमेदवार उदयनराजे भोसले आणि पवार गटाचे उमेदवार शशिकांत शिंदे यांच्यात थेट लढत झाली. उदयनराजे यांना एकूण 5 लाख 71 हजार 134 मतं पडली. त्यानंतर पवार यांच्या पक्षाचे उमेदवार शशिकांत शिंदे यांना 5 लाख 38 हजार 363 मतं पडली. म्हणजेच शिंदे यांचा 32 हजार 771 मतं कमी पडली. दुसरीकडे याच मतदारसंघात पिपाणी हे निवडणूक चिन्ह असणाऱ्या संजय गाडे या अपक्ष उमेदवाराला 37 हजार 62 मते मिळाली.
हेही वाचा :
तुतारी, पिपाणीचा घोळ! साताऱ्यात संजय गाडेंच्या चिन्हामुळे शिंदेंचा पराभव? वाचा नेमकं काय घडलं?
महत्त्वाच्या बातम्या
