Pune Crime News: झटपट श्रीमंत होण्याचे आमिष नडले! बनावट ट्रेडिंग ॲपद्वारे पुण्यातील आयटी व्यावसायिकाला लुटले; दोन आठवड्यांत तब्बल 4 कोटी गायब
Pune Crime News: पुण्यातील 46 वर्षीय आयटी व्यावसायिकाला सायबर भामट्यांनी बनावट शेअर ट्रेडिंग नेटवर्कच्या माध्यमातून तब्बल 4.43 कोटींचा गंडा घातल्याचा प्रकार उघडकीस आलाय.
Pune Crime News: पुण्यातील एका 46 वर्षीय आयटी व्यावसायिकाला (IT Professional) सायबर भामट्यांनी (Cyber Criminals) बनावट शेअर ट्रेडिंग नेटवर्कच्या माध्यमातून तब्बल 4.43 कोटी रुपयांचा गंडा घातल्याची धक्कादायक घटना उघडकीस आली आहे. याप्रकरणी पीडित आयटी व्यावसायिकाने पिंपरी-चिंचवड सायबर विभागाकडे (Pimpri-Chinchwad Cyber Department) तक्रार दिली असून, पोलिसांनी अज्ञात भामट्यांविरुद्ध गुन्हा दाखल केला आहे.
Pune Crime News: नामांकित आंतरराष्ट्रीय बँकेच्या नावाने व्हॉट्सॲप ग्रुप
पोलिसांनी दिलेल्या माहितीनुसार, पीडित व्यावसायिक सोशल मीडियावरील एका पोस्टच्या माध्यमातून सायबर चोरट्यांच्या संपर्कात आला होता. त्या पोस्टवरील लिंकवर क्लिक केल्यानंतर तो एका व्हॉट्सॲप ग्रुपमध्ये (WhatsApp Group) सहभागी झाला. हा ग्रुप एका नामांकित आंतरराष्ट्रीय बँकेच्या (International Bank) नावाने चालवला जात होता, जेणेकरून कोणालाही संशय येऊ नये.
Pune Crime News: गुंतवणूक तज्ज्ञ 'मैरा' आणि खोटे स्क्रीनशॉट्स
या व्हॉट्सॲप ग्रुपमध्ये दररोज सकाळी ऑनलाइन सत्रांचे (Online Sessions) आयोजन केले जात होते. त्यामध्ये शेअर बाजाराची माहिती, गुंतवणुकीच्या रणनीती आणि अधिक नफा मिळवून देणाऱ्या शेअर्सविषयी मार्गदर्शन केले जात होते. 'मैरा' नावाची एक महिला या ग्रुपची मुख्य ॲडमिन (Group Admin) होती. ती स्वतःला मोठी गुंतवणूक तज्ज्ञ म्हणून सादर करत असे. गुंतवणूकदारांचा विश्वास संपादन करण्यासाठी या ग्रुपमध्ये इतर सदस्यांनी मोठा नफा कमावल्याचे कथित स्क्रीनशॉट्स आणि खोटे पुरावे रोज शेअर केले जात होते.
Pune Crime News: दोन आठवड्यांत 4.43 कोटींची गुंतवणूक
ग्रुपमधील वाढता नफा पाहून पीडित व्यावसायिकाचा विश्वास बसला. त्यानंतर त्याला एका लिंकद्वारे बनावट ट्रेडिंग ॲप (Fake Trading App) डाऊनलोड करण्यास आणि त्यावर गुंतवणूक खाते (Investment Account) उघडण्यास सांगण्यात आले. या डिजिटल ॲपमध्ये गुंतवलेल्या रकमेवर झपाट्याने वाढणारा नफा दाखवण्यात येत होता. या अमिषाला बळी पडून पीडिताने अवघ्या दोन आठवड्यांच्या कालावधीत वेगवेगळ्या बँक खात्यांवर विविध व्यवहारांद्वारे तब्बल 4.43 कोटी रुपयांची गुंतवणूक केली.
Pune Crime News: अशी उघडकीस आली फसवणूक
काही दिवसांनी जेव्हा पीडित व्यावसायिकाने या ॲपमधून आपले पैसे आणि कमावलेला नफा काढण्याचा प्रयत्न केला, तेव्हा त्याला तांत्रिक अडचणी दाखवण्यात आल्या. आणखी पैशांची मागणी केल्यावर त्याला संशय आला. त्याने तपास केला असता, ते संपूर्ण नेटवर्क आणि ट्रेडिंग ॲप बनावट असल्याचे उघड झाले आणि आपली फसवणूक (Cyber Fraud) झाल्याचे त्याच्या लक्षात आले. या प्रकरणी पिंपरी-चिंचवड सायबर पोलिसांनी गुन्हा दाखल करून पुढील तपास सुरू केला असून, नागरिकांनी अशा कोणत्याही अनोळखी व्हॉट्सॲप ग्रुप किंवा बनावट ॲप्सना बळी पडू नये, असे आवाहन पोलिसांतर्फे करण्यात आले आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
महत्त्वाच्या बातम्या
