Mumbai Bank Scam : 'छळ मांडण्याच्या दृष्टीने सरकारच्या दबावाखाली पोलिसांकडून चौकशी', प्रवीण दरेकरांचा गंभीर आरोप

Pravin Darekar on Mumbai Bank Scam : भाजप नेते प्रवीण दरेकर यांची मुंबई बँक बोगस मजूर प्रकरणात आज दुसऱ्यांदा चौकशी करण्यात आली. दरेकर यांची सुमारे चार तास चौकशी करण्यात आली.

Pravin Darekar on Mumbai Bank Scam

Pravin Darekar on Mumbai Bank Scam : विधानपरिषदेचे विरोधी पक्षनेते प्रवीण दरेकर यांची मुंबई बँक (Mumbai Bank) बोगस मजूर प्रकरणात आज दुसऱ्यांदा पोलीस चौकशी झाली. दरेकर यांची सुमारे चार तास चौकशी करण्यात आली. चौकशीनंतर प्रवीण दरेकर यांनी प्रसारमाध्यमांना प्रतिक्रिया दिली आहे. छळवाद मांडण्याच्या दृष्टीने सरकारच्या दबावाखाली पोलिसांकडून चौकशी करण्यात आली, असा गंभीर आरोप प्रवीण दरेकर यांनी केला आहे. आमच्यावर कार्यकर्ता म्हणून कायद्याचे पालन करण्याचे संस्कार असल्यामुले आम्ही पहिल्या दिवसापासून पोलीस तपासात सहकार्याची भूमिका घेतली आहे. पहिल्या दिवशी चार तास चौकशी झाली. आजही तीन-चार चौकशी झाली.' यानंतरही गरज पडल्यास चौकशीसाठी हजेरी लावणार असल्याचं दरेकरांनी म्हटलं आहे. 

दरम्यान, पोलीस कस्टडीची मागणी कशासाठी असा सवालही त्यांनी यावेळी उपस्थित केला आहे. यामागचा केवळ उद्देश हा खोटी एफआयआर दाखल करुन छळवाद मांडण्याचा आहे, असा आरोपही त्यांनी केला आहे. यावेळी दरेकर यांनी शिवसेना खासदार संजया राऊत यांच्यावर निशाणा साधलाय. 'आम्ही संजय राऊतांसारखा आक्रस्थळेपणा करणार नाही', असं म्हणत दरेकर यांनी म्हटलं आहे.

दरम्यान, आपण अब्रुनुकसानीचा दावा करणार असल्याचंही प्रवीण दरेकर यांनी सांगितलं आहे. दरेकरांनी सांगितलं की, ''विरोधकांनी एकत्रितपणे हातमिळवणी करून केलेलं हे षड्यंत्र आहे. मी नाना पटोले, भाई जगताप आणि धनंजय शिंदे यांच्यावर अब्रुनुकसानीचा दावा दाखल करणार आहे. या संदर्भातील पत्र त्या तिघांनाही पाठवणार आहे. कारण मुंबई बँकेचा नफा 15 कोटी असून आणि दोन हजार कोटींच्या घोटाळ्याचा आरोप करण्यात येत आहे. आपल्या प्रसिद्धीसाठी एखाद्याची बदनामी करणं योग्य नाही.''

यापूर्वीच्या चौकशीत काय झालं?
4 एप्रिल रोजी मुंबईतील माता रमाबाई आंबेडकर पोलीस स्टेशनमध्ये त्यांची तीन तास चौकशी करण्यात आली होती. दुपारी 12 वाजता सुरु झालेली चौकशी दुपारी 3 वाजता संपली. "पोलिसांनी पाहिजे असलेली सगळी माहिती दिली. पण पोलिसांवर सरकारचा प्रचंड दबाव असल्याचं प्रत्येक क्षणी जाणवत होतं," अशी प्रतिक्रिया प्रवीण दरेकर यांनी चौकशीनंतर माध्यमांशी संवाद साधताना दिली. तसंच पोलिसांनी अनेक वेळा उलटसुलट आणि तेच तेच प्रश्न विचारुन भंडावून सोडण्याचा प्रयत्न केला. शिवाय चौकशी सुरु असताना पोलीस अधिकाऱ्यांना सहा-सात वेळा फोन आले, पण कोणाचे फोन आले ते कळलं नाही, असंही दरेकर यांनी म्हटलं होतं. 

काय आहे प्रकरण?
प्रवीण दरेकर यांची मुंबै बँकेवर संचालक म्हणून बिनविरोध निवड झाली होती. मुंबै बँकेच्या निवडणुकीत प्रवीण दरेकर मजूर आणि नागरी सहकार बँक अशा दोन्ही प्रवर्गातून निवडून आले होते. परंतु सहकार विभागाने प्रवीण दरेकर यांना मजूर म्हणून अपात्र ठरवलं. दरेकर 1997 पासून मुंबै बँकेवर मजूर प्रवर्गातून संचालक म्हणून निवडून येत आहेत. पण मजूर नसतानाही निवडणूक लढवून प्रवीण दरेकर यांनी बँकेच्या हजारो ठेवीदारांची आणि सरकारची फसवणूक केल्याचा आरोप करत आम आदमी पक्षाचे धनंजय शिंदे यांनी त्यांच्याविरोधात तक्रार नोंदवली. मुंबै बँकेत कोट्यवधीचा घोटाळा झाला असून सहकार कायद्याचं उल्लंघन केल्याचा आरोप दरेकर यांच्यावर आहे.

महत्त्वाच्या इतर बातम्या :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह - ABP Majha