EPFO : गुड न्यूज, पीएफचे पैसे UPI द्वारे काढता येणार, ईपीएफओ एप्रिलपासून नवा पर्याय उपलब्ध करुन देणार

EPFO : ईपीएफओकडून येत्या एप्रिलपासून खातेधारांना पीएफचे पैसे काढण्यासाठी यूपीआयचा पर्याय उपलब्ध निर्माण होणार आहे.

ईपीएफओ

EPFO News : कर्मचारी भविष्य निर्वाह निधी संघटना येत्या एप्रिलपासून खातेधारकांना पीएफचे पैसे यूपीआयमधून काढण्याचा पर्याय उपलब्ध करुन देणार आहे. यूपीआयच्या माध्यमातून पीएफचे पैसे थेट बँकेत जमा होतील.अधिकृत सूत्रांच्या माहितीनुसार पीएफ खात्यात ठराविक रक्कम शिल्लक ठेवून उर्वरित रक्कम यूपीआयच्या माध्यमातून काढता येईल. जी खातेदाराच्या बँक खात्यात जमा होईल.

ईपीएफओ खातेदारांना कर्मचारी भविष्य निर्वाह निधी म्हणजेच पीएफ खात्यातून यूपीआयच्या पिनचा वापर करुन सुरक्षित व्यवहार करता येईल. पैसे बँक खात्यात आल्यानंतर इलेक्ट्रॉनिक पेमेंट, एटीएम किंवा डेबिट कार्डद्वारे त्या पैशांचा वापर करता येईल. सूत्रांच्या माहितीनुसार ईपीएफओ या प्रणालीच्या सॉफ्टवेअरमधील त्रुटी दूर करण्याचा प्रयत्न करत आहे.

सध्या ईपीएफओ खात्यातून पैसे काढण्यासाठी सध्या अर्ज करावा लागतो. ऑटो अप्रूव्हल म्हणजेच स्वयंचलित मंजुरी प्रक्रियेद्वारे पैसे दोन ते तीन दिवसात बँक खात्यात जमा होतील. यापूर्वी ही मर्यादा एक लाख होती ती वाढून पाच लाख रुपये करण्यात आली आहे. आजारपण, शिक्षण, लग्न आणि घर खरेदीसाठी पैसे पीएफ खात्यातून काढता येतात.

ईपीएफओ खात्यातून पैसे काढण्यासाठी क्लेम करावा लागतो. क्लेम करणं आणि मंजुरी यासाठी लागणाऱ्या प्रक्रिया कमी करण्यासाठी ईपीएफओ नवी प्रणाली विकसित करत आहे. दरवर्षी पाच कोटी दावे मंजूर केले जातात. त्यापैकी सर्वाधिक दावे पीएफ खात्यातून पैसे काढण्यासाठी केले जातात. ईपीएफओ त्यांच्या खातेदारांना खात्यातून थेट पैसे काढण्यास मंजुरी देत नाही, कारण त्यांच्याकडे बँकिंगचा परवाना नाहीये. सूत्रांनी म्हटलं की सरकार ईपीएफओ त्यांच्या सेवा बँकांप्रमाणं सुधारण्याचा प्रयत्न करतेय.

ऑक्टोबर 2025 मध्ये ईपीएफओच्या केंद्रीय न्यास मंडळानं ईपीएफमधून ठराविक रक्कम काढण्याच्या तरतुदी सुरळीत करण्यासाठी मंजुरी दिली होती. 13 जटील तरतुदी तीन श्रेणींमध्ये विभागण्यात आल्या. आजारपण, शिक्षण आणि लग्न, निवासाच्या आवश्यकता आणि विशेष स्थिती यात वर्गीकरण करण्यात आलं होतं. ईपीएफओ खात्यातील एकूण जमा रकमेपैकी 75 टक्के काढता येईल. तर, 25 टक्के रक्कम खात्यात राहिल. पीएफ खात्यातील रक्कमेवर 8.25 टक्क्यांप्रमाणं चक्रवाढ व्याज मिळतं.