Gondia News : प्रॉपर्टी डीलरवर अज्ञात मारेकऱ्यांचा प्राणघातक हल्ला; दिवसाढवळ्या घडलेल्या घटनेने गोंदिया हादरला
गोंदिया शहरातील एका प्रॉपर्टी डीलरवर काही अज्ञात मारेकर्‍यांनी प्राणघातक हल्ला केला आहे. दिवसाढवळ्या घडलेल्या या घटनेने एकच खळबळ उडाली असून संपूर्ण गोंदिया शहर या हत्येच्या घटनेने हादरले आहे.
Gondia News गोंदिया : गोंदिया शहरातील एका प्रॉपर्टी डीलरवर काही अज्ञात मारेकर्‍यांनी प्राणघातक हल्ला केला आहे. दिवसाढवळ्या घडलेल्या या घटनेने एकच खळबळ उडाली असून संपूर्ण गोंदिया शहर या हत्येच्या घटनेने हादरला आहे. गोंदिया शहरातील प्रॉपर्टी डीलर महेश दखने (वय 35 वर्ष) यांच्यावर हा हल्ला झाला आहे. यात अज्ञात हल्लेखोरांनी हल्ला चढवत महेश दखने यांना गंभीर जखमी केल्याची माहिती समोर आली आहे. घटना गोंदिया शहरातील (Gondia News) किसान चौक छोटा गोंदिया येथे घडली आहे. गोंदिया शहरातील महेश दखने हे आपल्या टू-व्हीलर गाडीने जात असतांना अज्ञात हल्लेखोरांनी पाठलाग करत डोक्यावर हातोडा, कुऱ्हाडी, तलवार आदी हत्याराने वार केले. त्यामुळे क्षणात महेश दखणे रक्ताच्या थारोळ्यात जमिनीवर पडले. घटनास्थळावरून आरडाओरडा ऐकून काही लोक धावले, मात्र तोपर्यंत हल्लेखोर पळून गेले.
दिवसाढवळ्या घडलेल्या घटनेने गोंदिया हादरला
त्यानंतर स्थानिक नागरिकांनी गंभीर जखमी महेश दखणे यांना बेशुद्ध अवस्थेत डॉ. बहेकर यांच्या खाजगी रुग्णालयात उपचारासाठी दाखल केले. बराच वेळ पडून राहिल्याने आणि जास्त रक्तस्त्राव झाल्याने महेश दखणे यांची प्रकृती चिंताजनक असल्याची महिती आहे. घटनेची माहिती मिळताच गोंदिया शहर पोलिसांनी घटनास्थळी धाव घेत पुढील कायदेशीर प्रक्रिया सुरू केली असून घटनेचा पुढील तपास सध्या पोलीस करत आहेत.
घटनास्थळी बघ्यांची एकच गर्दी
गोंदिया शहरातील किसान चौक (छोटा गोंदिया) येथे जान्हवी ऑटो रिपेअरिंग सेंटर जवळ सकाळी 9.45 वाजताच्या सुमारास शहरातील प्रॉपर्टी डीलर महेश दखने यांच्यावर हल्ला करण्यात आला. मात्र वर्दळीच्या रस्त्यावर अचानक झालेला आरडाओरडा ऐकून काही लोक मारेकऱ्यांच्या मागे धावले, मात्र हल्लेखोर तोपर्यंत पळून गेले होते. दरम्यान बघ्यांची एकच गर्दी जमली पण त्यांना तात्काळ दवाखान्यात नेण्याची तसदी कोणी घेतली नाही, दरम्यान वाचन खंदारे नामक एका व्यक्तीने फोन करून या प्रकरणाची माहिती माजी नगरसेवक लोकेश कल्लू यादव यांना दिली. त्यांनी तात्काळ घटनास्थळ गाठून गंभीर जखमी महेश दखणे यांना बेशुद्ध अवस्थेत डॉ. बहेकर यांच्या खाजगी रुग्णालयात उपचारासाठी दाखल केले.
घटनास्थळी उपस्थित असलेले शहर पोलीस ठाण्याचे प्रभारी चंद्रकांत सूर्यवंशी यांनी माहिती देताना सांगितले की, महेश दखणे हे जमीन खरेदी-विक्रीचा व्यवसाय करत असल्याने हा हल्ला झाला असावा असा अंदाज आहे. मालमत्तेचा वाद किंवा जुन्या वैमनस्यामुळे ही घटना घडली याचा तपास सध्या पोलीस घेत आहे. तसेच मारेकऱ्यांचा तपास देखील घेत असल्याची माहिती पोलिसांनी दिली.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
