Gadchiroli Naxal : निवडणुकांच्या पार्श्वभूमीवर नक्षली कारवायांना ऊत; गडचिरोली-छत्तीसगड सीमेवर पोलिसांनी केला नक्षल कॅम्प उद्ध्वस्त

Naxal : ऐन निवडणुकांपूर्वी मोठी कारवाई करण्याच्या तयारीत असलेल्या नक्षलवाद्यांच्या तळावर पोलिसांनी मोठी कारवाई केली आहे. यात अनेक स्फोटके आणि मोठ्या प्रमाणात इतर वस्तू जप्त करण्यात पोलिसांना यश आले.

( Image Source :ABP Majha/ Reporter Gadchiroli)

Gadchiroli Naxal गडचिरोली : देशभरात लोकसभा निवडणुकांची (Lok Sabha 2024) रणधुमाळी सुरू आहे. या निवडणुकांच्या पार्श्वभूमीवर मोठा घातपात करण्याचा उद्देशाने गडचिरोली-छत्तीसगडच्या सीमेलगत गेल्याकाही दिवसांमध्ये  नक्षलवाद्यांचा (Naxal) वावर वाढला असल्याचे समोर आले आहे. या नक्षलवाद्यांच्या कारवाई विरोधात पोलिसांनी देखील आपली कंबर कसली असून प्रत्येक बारीक सारिक गोष्टींकडे पोलीस लक्ष देऊन आहे. अशातच, ऐन निवडणुकांपूर्वी मोठी कारवाई करण्याच्या तयारीत असलेल्या या नक्षलवाद्यांच्या तळावर पोलिसांनी (Gadchiroli Police) मोठी कारवाई केली आहे. यात अनेक स्फोटके आणि मोठ्या प्रमाणात इतर वस्तू जप्त करण्यात पोलिसांना यश आले.

निवडणुकांच्या पार्श्वभूमीवर नक्षली कारवायांना ऊत

गडचिरोली पोलिसांनी आगामी लोकसभा निवडणुकीच्या पार्श्वभूमीवर नक्षलविरोधी अभियान आधिक तीव्र केले आहे. दरम्यान, शुक्रवारी रात्री उशिरा एक विश्वासार्ह माहिती मिळाली की,  कसनसूर चातगाव दलम आणि छत्तीसगडच्या औंधी दलमचे काही सशस्त्र कॅडर गडचिरोली-छत्तीसगडच्या सीमेवर असलेल्या मोहल्ला मानपूर जिल्ह्यातील चुटीनटोला गावाजवळ (एसपीएस पेंढरीपासून 12 किमी पूर्वेला) तळ ठोकून आहेत. तसेच आगामी सार्वत्रिक लोकसभा निवडणुकांच्या पार्श्वभूमीवर विध्वंसक कारवाया करण्यासाठी त्यांची रणनीती असल्याची गुप्त माहिती प्राप्त झाली.

या माहितीच्या आधारे गडचिरोली पोलिसांचे अतिरिक्त पोलीस अधीक्षक यतीश देशमुख यांच्या नेतृत्वाखाली सी- 60 युनिटच्या  नक्षलविरोधी ऑपरेशन टीमने तात्काळ त्या दिशेने मोर्चा वळवला. दरम्यान, या परिसरात सर्च ऑपरेशन सुरू असता, काल 30 मार्चला ते एका उंच टेकडीवर पोहचले. मात्र त्यावेळी पोलिसांच्या आगमनाची चाहूल लागताच जंगलात तळ ठोकून असलेल्या नक्षलवाद्यांनी येथून पळ काढला. त्यानंतर पोलिसांनी या परिसराची पाहणी केली असता सुरक्षा दलाच्या पथकाला या डोंगरमाथ्यावर एक मोठे आश्रयस्थान आणि नक्षल छावणी आढळून आली. या छावणीतील सर्व नक्षल साहित्य पोलिसांनी जप्त करून ही छावणी नष्ट करण्यात आली असून या नक्षल्यांचा पुढील शोध सध्या पोलीस घेत आहे. 

घटनास्थळी मिळालेले नक्षल साहित्य 

कॉर्डेक्स वायर, डिटोनेटर, जिलेटिन स्टिक्स, बॅटरी, वॉकी टॉकी चार्जर, बॅकपॅक इत्यादींचा मोठ्या प्रमाणात नक्षलवादी सामान आणि इतर साहित्य पोलिसांनी जप्त करत ही छावणी नष्ट केली आहे. तसेच ही कारवाई यशस्वी करून सी-60 युनिटचे पथक आज सुखरूपपणे गडचिरोलीला पोहोचले आहे.  

इतर महत्वाच्या बातम्या