Pink Guava : वाळवंटात फुलवलं नंदनवन, तैवानी गुलाबी पेरुंच्या लागवडीतून लाखोंचा नफा

शेतकरी सध्या आपल्या शेतात विविध प्रयोग करत आहेत. पारंपारिक पद्धतीच्या शेतीला फाटा देत आधुनिक पद्धतीनं शेती करत आहेत.

Agriculture news taiwami pink guava

Pink Guava : शेतकरी सध्या आपल्या शेतात विविध प्रयोग करत आहेत. पारंपारिक पद्धतीच्या शेतीला फाटा देत आधुनिक पद्धतीनं शेती करत आहेत. अशाच एका राजस्थानमधील शेतकऱ्याने वाळवंटात तैवानच्या गुलाबी पेरुची बाग फुलवली आहे. या गुलाबी पेरुपासून हा शेतकरी भरघोस उत्पन्न मिळवत आहे. 

राजस्थानचे नाव ऐकताच लोकांच्या मनात पहिले चित्र येते ते वाळवंटाचे. लोकांना वाटते की राजस्थानमध्ये फक्त वाळू असल्यानं तेथील शेतकरी उत्तर प्रदेश आणि बिहारप्रमाणे बागकाम करणार नाहीत. पण तसे होत नाही. राजस्थानचे शेतकरीही आता केळी, सफरचंद, संत्री, आवळा आणि खजूर यांची देखील आधुनिक पद्धतींनी लागवड करत आहेत. त्यामुळं शेतकऱ्यांचे उत्पन्न अनेक पटींनी वाढले आहे. विशेष बाब म्हणजे आता राजस्थानचे शेतकरी तैवानच्या गुलाबी पेरुची लागवड करत आहेत. ज्याला राज्यातच नाही तर इतर राज्यांतही मागणी आहे. अशा परिस्थितीत आज आपण एका शेतकऱ्याबद्दल बोलणार आहोत, ज्याने वाळवंटात तैवानचा गुलाबी पेरू उगवून सर्वांना आश्चर्यचकित केले आहे.

राजस्थानमध्ये फक्त खजूरच पिकवता येतात असं लोकांना वाटतं, पण असं नाही. शेतकरी बांधव राजस्थानमध्येही स्वादिष्ट फळांची लागवड करु शकतात. राज्यातील अनेक शेतकऱ्यांनी तैवानच्या गुलाबी पेरूची लागवड करण्यास सुरुवात केली आहे. यातून त्यांना चांगले उत्पन्न मिळत आहे. आज आपण शेतकरी लिहमाराम मेघवाल यांच्याबद्दल माहिती पाहणार आहोत. शेतकरी लिहमाराम मेघवाल यांनी आपल्या मेहनतीने ओसाड जमिनीवर तैवानच्या गुलाबी पेरुची सुंदर बाग फुलवली आहे. यामुळे त्यांना वर्षभरात भरघोस उत्पन्न मिळत आहे. 

रेताड जमिनीवर पेरू

लिहमाराम मेघवाल हे नागौर जिल्ह्यातील खिंवसार येथील रहिवासी आहेत. त्याच्या गावात वालुकामय माती आहे. पाण्याचीही टंचाई आहे. असे असतानाही त्यांनी रेताड जमिनीवर पेरू बागायत सुरू केली. लिहमाराम यांच्या म्हणण्यानुसार त्यांनी २०२० मध्ये तैवानच्या गुलाबी पेरूची लागवड सुरू केली आहे. सुरुवातीला त्यांनी लखनौ येथून तैवानच्या पेरूचे रोपटे खरेदी केले होते. एका रोपाची किंमत 140 रुपये होती.

150 झाडांपासून पेरूचे उत्पादन घेतले जात आहे

शेतकरी लिहमाराम सांगतात की ते त्यांच्या शेतात फक्त सेंद्रिय खतांचा वापर करतात. तसेच बागेत वेळोवेळी गांडूळ खत टाकले जाते. त्यामुळे झाडांची वाढ झपाट्याने होते. तसेच बागेतील रोपांमधील अंतर 5 फूट बाय 6 फूट ठेवण्यात आले आहे. त्यामुळं झाडांना पुरेशा प्रमाणात सूर्यप्रकाश, हवा आणि पाणी मिळू शकते. विशेष बाब म्हणजे 2020 मध्ये लिखमाराम यांनी बागेत 200 तैवानी पेरुची रोपटी लावली होती. परंतु, जवळपास 50 झाडे सुकली. मात्र, 150 झाडांपासून पेरूचे उत्पादन घेतले जात आहे.

तैवानच्या गुलाबी पेरूचे उत्पादन आणखी वाढेल

गतवर्षी शेतकरी लेखमाराम यांनी प्रति रोप 3 किलो पेरू तोडला होता. परंतु यावर्षी त्याचे उत्पादन प्रति रोप 10 किलो तैवान गुलाबी पेरू इतके वाढले आहे. अशा प्रकारे त्यांनी यावर्षी सुमारे 1500 किलो पेरूची विक्री केली, त्यातून त्यांना चांगले उत्पन्न मिळाले. शेतकरी लिहमाराम मेघवाल यांच्या म्हणण्यानुसार, कोरोनाच्या काळात लॉकडाऊन लागू झाला तेव्हा तो उरलेल्या वेळेत यूट्यूब पाहत असे. येथेच त्यांना तैवानी पेरू लागवडीची माहिती मिळाली. त्यानंतर त्यांनी शेती करण्यास सुरुवात केली. त्यांच्या मते, तैवानच्या गुलाबी पेरूचे उत्पादन येत्या काही वर्षांत आणखी वाढेल, ज्यामुळे चांगले उत्पन्न मिळेल.

महत्त्वाच्या बातम्या: