Trump Tariffs India | भारतावर 'टॅरिफ बॉम्ब', एकूण शुल्क 50% वर

अमेरिकेचे अध्यक्ष Donald Trump यांनी भारतावर अतिरिक्त 25% 'टॅरिफ' लावल्याने एकूण शुल्क 50% पर्यंत पोहोचले आहे. रशियासोबतच्या तेल करारामुळे हा निर्णय घेण्यात आल्याचे अमेरिकेकडून सांगण्यात आले आहे. या अध्यादेशावर Trump यांनी स्वाक्षरी केली असून, 21 दिवसांनंतर भारतातून येणाऱ्या सर्व आयातीवर हे अतिरिक्त शुल्क लागू होईल, मात्र काही गोष्टींना यातून वगळण्यात आले आहे. या निर्णयामुळे भारत-अमेरिका व्यापार संबंधांवर मोठा परिणाम होण्याची शक्यता आहे. आंतरराष्ट्रीय घडामोडींचे अभ्यासक शैलेंद्र देवांडकर यांनी या निर्णयाला 'अत्यंत पक्षपाती स्वरुपाचा' म्हटले आहे. 'मला असं वाटतं की अत्यंत पक्षपाती स्वरुपाचा हा निर्णय आहे आणि याच्यातनं एकूणच Donald Trump यांचा कशा पद्धतीने एकतर्फी व्यवहार आहे हे याच्यातनं प्रतिबिंबित होतं,' असे देवांडकर यांनी नमूद केले. युरोपियन महासंघ आणि चीनचा रशियासोबत भारतापेक्षा मोठा व्यापार असतानाही त्यांच्यावर असे शुल्क न लावल्याने भारताला जाणीवपूर्वक लक्ष्य केले जात असल्याचे त्यांनी सांगितले. भारत कोणत्याही दबावाला बळी न पडता कृषी, मत्स्यव्यवसाय आणि दुग्धजन्य उत्पादनांवरील आयात शुल्क कमी करण्यास तयार नाही, तसेच रशियाकडून तेल खरेदी सुरू ठेवणार या भूमिकेवर ठाम आहे.