Sandip Deshpande On Ashish Shelar: 'भाजपला मुंबईत परप्रांतीय महापौर बसवायचंय', संदीप देशपांडेंचा शेलारांवर गंभीर आरोप

मुंबई महानगरपालिका निवडणुकीच्या (BMC Elections) पार्श्वभूमीवर मनसे (MNS) आणि भाजपमध्ये (BJP) बोगस मतदारांच्या मुद्द्यावरून वाद पेटला आहे. मनसे नेते संदीप देशपांडे यांनी भाजप नेते आशिष शेलार यांच्यावर गंभीर आरोप केले आहेत. 'भाजपला मुंबईत परप्रांतीय महापौर बसवायचंय, त्यामुळे परप्रांतीय मतदार घुसवले जात आहेत', असा थेट आरोप देशपांडे यांनी केला आहे. देशपांडे यांनी वांद्रे पश्चिममधील देवळाचा पत्ता देऊन मतदार यादीत नावे घुसल्याचा दावा केला. दुसरीकडे, मनसेने आगामी मुंबई पालिका निवडणुकीसाठी २२७ पैकी १२५ जागांची यादी तयार केली असून, पक्षाची या जागांवर ताकद असल्याचा दावा केला आहे. आरक्षण सोडत जाहीर झाल्यानंतर ठाकरे गट आणि मनसेमध्ये जागावाटपाची चर्चा सुरू होण्याची शक्यता वर्तवण्यात येत आहे.