Nalasopara Fire: नालासोपारा पूर्वेकडील गोदामांना भीषण आग, चार गोदामं जळून खाक

नालासोपारा (Nalasopara) पूर्वेकडे साई बाजार (Sai Bazar) इमारतीमागे असलेल्या गोदामाला (Godown) भीषण आग लागल्याची घटना घडली आहे. वसई-विरार (Vasai-Virar) अग्निशमन दलाच्या अथक प्रयत्नांनंतर आगीवर नियंत्रण मिळवण्यात यश आले आहे. या अग्नितांडवात चार गोदामं पूर्णपणे जळून खाक झाली आहेत, ज्यामुळे मोठ्या प्रमाणात वित्तहानी झाली आहे. आगीची माहिती मिळताच वसई-विरार अग्निशमन दलाच्या तीन गाड्या तातडीने घटनास्थळी दाखल झाल्या आणि त्यांनी आग विझवण्यासाठी शर्थीचे प्रयत्न सुरू केले. अग्निशमन दलाच्या जवानांनी परिस्थिती नियंत्रणात आणली असून, सुदैवाने कोणतीही जीवितहानी झाल्याचे वृत्त नाही. सध्या आगीचे नेमके कारण काय होते, याचा तपास सुरू आहे.