Banjara Reservation Rally : आरक्षणासाठी बंजारा समाजाचं शक्तीप्रदर्शन, धनंजय मुंडेंचं स्फोटक भाषण

बंजारा समाजाने एसटी आरक्षणाच्या मागणीसाठी राज्यभरात शक्तिप्रदर्शन केले. बीड आणि जालना येथे भव्य मोर्चे काढण्यात आले. हैदराबाद गॅझेटनुसार बंजारांना एसटीतून आरक्षण मिळावे, ही या आंदोलनाची प्रमुख मागणी आहे. बीडमधील मोर्चात धनंजय मुंडे यांची उपस्थिती लक्षणीय ठरली. जोपर्यंत बंजारा समाजाच्या मागण्यांना यश मिळत नाही, तोपर्यंत लढा सुरूच ठेवण्याचा निर्धार मुंडेंनी व्यक्त केला. त्यांनी बंजारा समाजाचा आदिवासी प्रवर्गात समावेश करण्याची मागणी केली. जालन्याच्या मोर्चात राजेश राठोड आणि माजी खासदार हरिभाऊ राठोड यांनी हजेरी लावली. तेलंगणा आणि राजस्थानमध्ये बंजारा समाजाला एसटी आरक्षण मिळत असल्याचे नमूद करण्यात आले. आरक्षणासाठी उमरगा तालुक्यातील मुरूम येथे पवन चव्हाण यांनी आत्महत्या केली होती. या पार्श्वभूमीवर पोहरादेवीचे धर्मगुरू महंत सुनील महाराज यांनी आत्महत्याग्रस्त कुटुंबाची भेट घेतली. "आरक्षणासाठी खचून न जाता धैर्यानं लढावं आणि कुठलंही टोकाचं पाऊल उचलू नये," असे आवाहन सुनील महाराज यांनी केले. बंजारा समाज लढवय्या असून संवैधानिक मार्गानेच लढा जिंकण्याचा निर्धार व्यक्त करण्यात आला.