ABP Majha Marathi News Headlines 07 AM TOP Headlines 13 April 2025

 महायुतीत सर्वकाही आलबेल नसल्याची चर्चा राजकीय वर्तुळात नेहमीच होत असते. तर, विरोधकांकडूनही उपमुख्यमंत्री एकनाथ शिंदे (Eknath shinde) नाराज असल्याचं वारंवार सांगितलं जातं. महायुतीमधील (Mahayuti) अजित पवारांची राष्ट्रवादी आणि एकनाथ शिंदेंच्या शिवसेनेत रायगडच्या पालकमंत्रीपदावरुन वाद सुरू आहे. तर, दुसरीकडे एसटी महामंडळाला अर्थ खात्याकडून निधी मिळत नसल्याचे, तसेच फाईली अडवून ठेवण्यात येत असल्याची सांगत परिवहन मंत्री प्रताप सरनाईक यांनी अजित पवारांच्या खात्याबद्दल थेट नाराजी व्यक्त केली होती. त्यामुळे, गृहमंत्री अमित शाह यांच्या दौऱ्याकडे राजकीय वर्तुळाचे लक्ष लागले होते. त्यातच, एकनाथ शिंदे यांनी पुण्यात अमित शाह (Amit shah) यांची भेट घेऊन आपली नाराजी उघड केली. यावेळी, शिवसेना आमदारांना निधी वाटप करताना दुजाभाव केला जात असल्याची तक्रारही त्यांनी केल्याचे समजते. त्यामुळे, महायुतीमधील शीतयुद्ध आता दिल्ली दरबारी गृहमंत्र्यांच्या कानावर पोहोचल्याचं दिसून येतं.  

अमित शहा आणि एकनाथ शिंदे यांच्यात काल पुण्यात झाली बैठक झाली होती. या बैठकीत निधी वाटपावरून झालेल्या चर्चेत एकनाथ शिंदे यांनी खंत व्यक्त केल्याची सूत्रांची माहिती आहे. अर्थ खात्याकडून शिवसेनेच्या मंत्र्यांच्या आणि आमदारांच्या फाईल वेटिंगवर ठेवल्या जात असल्याची बाब शिंदे यांनी शहांच्या लक्षात आणून दिली. त्यामुळे शिवसेनेच्या मंत्री आणि आमदारांच्या विकासकामात अडथळा निर्माण होत असल्याचे देखील शिंदेंनी सांगितले. जर महायुतीत आहोत तर निधी वाटप आणि फाईल क्लिअरन्स एकसमान झाले पाहिजे, अशी मागणी एकनाथ शिंदे यांनी अमित शाह यांच्याकडे केली आहे.