लखनौ : भाजपला अति आत्मविश्वास नडला : योगी आदित्यनाथ

अलाहाबाद : 2014 लोकसभा निवडणुकीत सर्वच्या सर्व जागा जिंकत संपूर्ण उत्तरप्रदेश काबीज केलेल्या भाजपाला, पोटनिवडणुकीत मात्र मोठा झटका बसला आहे. मुख्यमंत्री योगी आदित्यनाथ यांच्या गोरखपूरमध्येच भाजप उमेदवाराला पराभवाची चव चाखावी लागली आहे. ‘अतिआत्मविश्वासामुळे पोटनिवडणुकीत भाजपचा पराभव झाला.’ अशी कबुली मुख्यमंत्री योगी आदित्यनाथ यांनी दिली.

अति आत्मविश्वास नडला : योगी आदित्यनाथ

'या पोटनिवडणुकीत कुठे कमतरता राहिली याची आम्ही समीक्षा करु. हा जनतेचा निर्णय आहे आणि लोकशाहीमध्ये जनता जनार्दन असते. ही जनतेचा कौल मान्य करतो. तसंच विजयी उमेदवारांना शुभेच्छाही देतो.' असं मुख्यमंत्री योगी आदित्यनाथ म्हणाले.

'शेवटच्या क्षणी सपा आणि बसपा यांनी युती केली. जेव्हा उमेदवारांच्या नावाची घोषणा झाली त्यावेळी सर्व पक्ष वेगवेगळे लढत होते. पण त्याचवेळी राज्यसभा निवडणुकीची घोषणा झाली आणि दोन्ही पक्षांनी युती केली. भाजपचा पराभव हा आमच्यासाठी समीक्षेचा विषय आहे. भविष्यात चांगली कामगिरी करता यावी यासाठी आम्ही आतापासूनच योजना तयार करणार आहोत. आम्हाला माहिती आहे की, उत्तरप्रदेशमध्ये फायद्यासाठी काही जण युती करतील. पण आता जनता ते मान्य करणार नाही. पण या पोटनिवडणुकीत आम्हाला अतिआत्मविश्वास नडला. त्यामुळे या पोटनिवडणुकीतील पराभवाची आम्ही समीक्षा करु.' असंही योगी आदित्यनाथ यावेळी म्हणाले.