Shiv Sena vs BJP Zero Hour:ठाण्यात शिंदेंना भाजपकडूनच आव्हान?शिंदेंच्या बालेकिल्ल्यात नाईकांचा दरबार

मंडळी, राजकारण गा खेळ मोठा गमतीदार आहे. राजकारणात कधीकधी आपल्या माणसांनाही आव्हान द्यावं लागतं, आणि कधीकधी प्रतिस्पर्ध्याला जवळ करावं लागतं. 

आता तुम्ही म्हणाल, आम्ही कार्यक्रमाच्या सुरुवातीलाच हे तत्वज्ञान का सांगतोय. कारण अर्थातच महाराष्ट्राचं राजकारण. भाजपच्या एका निर्णयामुळं शिवसेनेचे मुख्य नेते आणि उपमुख्यमंत्री एकनाथ शिंदेंची त्यांच्या बालेकिल्ल्यातच कोंडी होते की काय असा प्रश्न पडू लागलाय.. 

आता फार कोड्यात बोलत नाही. आजचा विषय उलगडून सांगायचा तर पालघर जिल्ह्याचे पालकमंत्री आणि भाजपचे नवी मुंबईतील आमदार गणेश नाईक यांनी लवकरच ठाणे शहरात जनता दरबार भरवण्याचं ठरवलंय. ठाण्याच्या सुप्रसिद्ध गडकरी रंगायतनमध्ये नाईक जनतेचे प्रश्न सोडवणार आहेत. 

आता कुणी म्हणेल त्यात काय विशेष आहे?.. तर ऐका, नाईक हे राज्याचे वनमंत्री आहेत, त्यांचा ऐरोली हा मतदारसंघ ठाणे जिल्ह्यातच आहे.. जनता दरबार भरवला तर त्यात काय विशेष? पण मंडळी, राजकारण खरंच इतकं साधंसोपं असतं तर अजून काय हवं होतं? 

मंडळी, नोव्हेंबर २०२४मध्ये झालेल्या विधानसभा निवडणुकीत भाजपला राज्यात १३२ जागा मिळाल्यानं अनेक राजकीय समीकरणं बदललीयत. मग महायुतीतली अंतर्गत समीकरणं त्याला अपवाद कशी असतील? आधी एकनाथ शिंदे मुख्यमंत्री होते, आता देवेंद्र फडणवीस मुख्यमंत्री आहेत. सत्तास्थापनेची प्रक्रिया सुरू असताना शिंदे नाराज असल्याच्या अनेक बातम्या येत होत्या. पालकमंत्रीपदाच्या नियुक्तीच्या वेळीही शिंदेंची नाराजी दिसून आल्याची राजकीय निरीक्षकांमध्ये चर्चा आहे. त्यामुळं गणेश नाईकांची ही घोषणा त्याचीच परतफेड तर नाही ना, असा प्रश्नही अनेकांना पडला आहे.