Ajit Pawar And Sharad Pawar : AI वरुन चॅट GPT; बैठकीनंतर पवरांमध्ये बंद दाराआड चर्चा? Special Report

Ajit Pawar And Sharad Pawar : AI वरुन चॅट GPT; बैठकीनंतर पवरांमध्ये बंद दाराआड चर्चा? Special Report

दोन्ही राष्ट्रवादी पुन्हा एकत्र येणार का? पवार काका पुतण्याचं मनोमिलन होणार का? महाराष्ट्राच्या राजकारणात असे सवाल विचारले जात असतानाच आज पुन्हा एकदा शरद पवार आणि अजित पवार पुण्यात एकत्र आले. निमित्त होतं वसंतदादा साखर संकुलात आयोजित एका बैठकीचं. या बैठकीत दोन्ही पवार एकत्र बसले होते. कृषी क्षेत्रात एआयच्या वापराबाबत या बैठकीत चर्चा झाल्याचं बोललं जातंय. पण या बैठकीनंतर शरद पवार अजित पवार आणि जयंत पाटील यांची आणखी एक बैठक झाली. या बैठकीत नेमकी काय साखरपेरणी झाली? आढावा घेऊयात या स्पेशल रिपोर्टमधून

पुण्याच्या साखर संकुलात बंद दाराआड चर्चा करणारे हे नेते आहेत शरद पवार, अजित पवार आणि जयंत पाटील.
हे नेते एकत्र येण्याचं औपचारिक कारण होतं कृषी उत्पादकता वाढवण्यासाठी एआय तंत्रज्ञानाचा वापर करण्याबाबत चर्चा करणं.
एप्रिल महिन्यात याच विषयावर चर्चा करण्यासाठी याच ठिकाणी दोन्ही नेते एकत्र आले होते. 
त्यानंतर आज पुन्हा कृत्रिम बुद्धीमत्तेच्या संभाव्य वापराबाबत दोन्ही राष्ट्रवादीच्या प्रमुख नेत्यांनी खल केला.
अर्थात, आजच्या भेटीचं कागदोपत्री कारण काहीही असलं तरी महाराष्ट्राच्या राजकारणात मात्र वेगळ्याच कारणासाठी या भेटीकडं पाहिलं जात होतं. 
शरद पवार आणि अजित पवारांचा पक्ष एक होणार का, या प्रश्नाची चर्चा सध्या राज्यात सुरु आहे.
या प्रश्नाचं उत्तर सध्या एआयकडे नाहीच, मात्र स्वतः शरद पवारांकडेही ते नसल्याचं त्यांच्या प्रतिक्रियेतून दिसून आलं होतं. 

पुण्याच्या साखर संकुलात एआयच्या वापराबाबतची बैठक पार पडली.
या बैठकीला दोन्ही पवार, जयंत पाटील यांच्यासोबत माजी मंत्री बाळासाहेब थोरात आणि दिलीप वळसे पाटीलदेखील उपस्थित होते.
मात्र या बैठकीनंतर साखर संकुलात बंद दाराआड दोन्ही पवार आणि जयंत पाटील यांच्यात आणखी एक वेगळी बैठक पार पाडली. 
या बैठकीत नेमकी काय साखरपेरणी झाली, असा प्रश्न त्यामुळं निर्माण झाला. 

पवार काका-पुतणे एकत्र येण्याची चर्चा यापूर्वीही अनेकदा रंगली होती.
मात्र यावेळी ही शक्यता अधिक गडद झाल्याचं चित्र आहे.
असं होणं शक्य नाही, असं आत्मविश्वासानं सांगणारे शरद पवारांचे नेते यावेळी मात्र ताकही फुंकून पित असल्याचं चित्र आहे.