Sunil Kedar : खेलो इंडिया स्पर्धेत यशस्वी खेळाडूंच्या पुरस्कार रकमेत वाढ, महाराष्ट्र यंदाही विजयाची परंपरा कायम राखेल : क्रिडामंत्री

खेलो इंडिया स्पर्धेत यशस्वी खेळाडूंच्या पुरस्कार रकमेत वाढ करण्यात आल्याची घोषणा राज्याचे क्रिडामंत्री सुनिल केदार यांनी केली आहे.

Sunil Kedar

Sunil Kedar : हरियाणा येथे होणाऱ्या चौथ्या 'खेलो इंडिया' स्पर्धेत यशस्वी खेळाडूंच्या पुरस्कार रकमेत वाढ करण्यात आली आहे. प्रथम क्रमांक मिळवणाऱ्या खेळाडूंना 3 लाख, दुसऱ्या क्रमांकासाठी 2 लाख आणि तिसऱ्या क्रमांकासाठी 1 लाख रुपयांचा प्रोत्साहन पुरस्कार देण्यात येईल, अशी घोषणा  राज्याचे क्रिडामंत्री सुनील केदार (Sunil Kedar) यांनी केली. बालेवाडी येथील शिवछत्रपती क्रीडापीठ येथे सुरु असलेल्या 'चौथ्या खेलो इंडिया युवा क्रीडा स्पर्धा' सराव शिबिराला भेट दिल्यानंतर केदार यांनी खेळाडूंशी संवाद साधला, त्यावेळी ते बोलत होते. यावेळी क्रीडा आयुक्त ओमप्रकाश बकोरिया, सहसंचालक चंद्रकांत कांबळे,  क्रीडा उपसंचालक अनिल चोरमले उपस्थित होते.

यावर्षीदेखील महाराष्ट्र यशस्वी होईल

शासनाने खेळाडूंना प्रोत्साहन देण्यासाठी गेट वे ऑफ इंडिया येथे खेलो इंडियातील यशस्वी खेळाडूंचा सत्कार केला होता. यावर्षीदेखील महाराष्ट्र यशस्वी होईल आणि संपूर्ण देशाला कौतुक वाटेल असा खेळाडूंचा सन्मान केला जाईल. खेळाडूंनी उत्तमता, जिद्द आणि उद्दिष्टावर लक्ष केंद्रीत करणे आवश्यक आहे. खेळाच्या माध्यमातून समानता आणि क्षमता साधली जात असल्याने सामाजिकदृष्ट्याही क्रीडा विकास आवश्यक असल्याचे मत सुनिल केदार यांनी व्यक्त केले. स्पर्धेसाठी सर्व खेळाडू समर्पित भावनेनं आणि पूर्ण क्षमतेने सराव करत आहेत. कोरोनाकाळात सर्व शक्य नसताना आपल्या कौशल्यात कमतरता येऊ दिले नाही. अत्यंत मध्यम वर्गातील कुटुंबातील असूनही पालकांनी त्यांच्यातील क्रीडाकौशल्य प्रतिकूल परिस्थितीतही जपले, ही बाब कौतुकास्पद आणि अभिनंदनीय असल्याचे केदार यांनी सांगितले. 

हात टेकायचे नाही, हार मानायची नाही

खेळाच्या माध्यमातून देश घडवणारी पिढी अपेक्षित आहे. जगात पुढे जाणाऱ्या देशांनी क्रीडा विकासावर लक्ष केंद्रीत केले आहे. हात टेकायचे नाही, हार मानायची नाही, यशाला गवसणी घातल्याशिवाय परतायचे नाही असा निश्चय करा, छत्रपती शिवाजी महाराजांचा हा महाराष्ट्र पहिलाच राहील असे यश मिळवून परत या, आशा शब्दात सुनिल केदार यांनी खेळाडूंना शुभेच्छा दिल्या.

महाराष्ट्र यशाची परंपरा कायम राखेल 

खेलो इंडियाच्या गेल्या तीन स्पर्धांमध्ये  राज्याने अव्वल स्थान मिळवले आहे. महाराष्ट्राच्या यशाची परंपरा कायम राखत यावर्षीदेखील प्रत्येक खेळाडू पूर्ण प्रयत्न करुन राज्याला अग्रेसर ठेवण्यासाठी प्रयत्न करतील. खेळाडूंसाठी बालेवाडी येथील शिवछत्रपती क्रीडानगरीचे आधुनिकीकरण करण्यात येत आहे. ही क्रीडानगरी परिपूर्णतेकडे वाटचाल करत आहे. दोन वर्षे कोरोनामुळे समस्या असतानादेखील खेळाडूंचा आत्मविश्वास वाखाणण्याजोगा आहे. यावर्षी क्रीडा विद्यापीठ सुरु करण्यात येणार असल्याचेही केदार यांनी सांगितले. 

सराव शिबिरातील खेळाडूंचा आत्मविश्वास उंचावलेला आहे. प्रवासाचा त्रास खेळाडूंच्या कामगिरीवर होऊ नये म्हणून त्यांना विमानाने हरियाणात नेले जाणार आहे. यावर्षी मणिपूर राज्यातील थांगता आणि हरियाणाचा गटका या दोन खेळांमध्ये राज्याचे खेळाडू प्रतिनिधित्व करीत आहेत. पाचव्या खेलो इंडिया स्पर्धेसाठी आतापासून तयारी सुरु करण्यात आली असल्याचे क्रीडा आयुक्त ओमप्रकाश बकोरिया यांनी सांगितले.

चौथी स्पर्धा 3 ते 13 जून 2022
             
हरियाणा येथे 3 ते 13 जुन 2022 या कालावधीत चौथ्या खेलो इंडिया युवा स्पर्धेसाठी 21 क्रीडाप्रकारात महाराष्ट्राचे 355 खेळाडु पात्र ठरले आहेत. त्यांचे सराव शिबिर बालेवाडी येथील शिवछत्रपती क्रीडापीठ येथे 21 मे पासून सुरु आहे.  स्पर्धेच्या पूर्वतयारीसाठी आयोजित हे शिबिर 31 मेपर्यंत चालणार आहे.  हरियाणातील पंचकुला येथे 4 जून रोजी स्पर्धेचे उदघाटन होणार असून 13 जून रोजी स्पर्धेची सांगता होणार आहे. बालेवाडीतील सराव शिबिरानंतर 1 ते 8 जून या कालावधीत हे सर्व संघ हरियाणाकडे रवाना होतील.