एक्स्प्लोर

Kieron Pollard Retirement : मुंबईकरांच्या लाडक्या पोलार्डचा आयपीएलला अलविदा! भावूक पोस्ट लिहित जाहीर केली निवृत्ती

IPL 2023 : वेस्ट इंडिजचा स्टार अष्टपैलू कायरन पोलार्डला यंदा मुंबई इंडियन्सने रिलीज केलं असून आता त्याने आयपीएलमधून निवृत्ती जाहीर केली आहे.

By : एबीपी माझा स्पोर्ट्स डेस्क | Edited By: शशांक पाटील | Updated at : 15 Nov 2022 02:18 PM (IST)

Kieron Pollard

Kieron Pollard Retirement : आयपीएलला (IPL) जगातील सर्वात बेस्ट क्रिकेट लीग बनवण्यात मोठा वाटा असणारा खेळाडू म्हणजे वेस्ट इंडिजचा स्टार अष्टपैलू कायरन पोलार्ड (Kieron Pollard). मुंबई इंडियन्स (Mumbai Indians) संघाकडून इंडियन प्रीमियर लीग मागील कित्येक वर्षे गाजवल्यावर अखेर यंदाच्या आयपीएलपूर्वी पोलार्डने निवृत्ती जाहीर केली आहे. आगामी आयपीएल 2023 च्या मिनी ऑक्शनपूर्वी मुंबई इंडियन्सने पोलार्डला रिलीज केलं असून पोलार्डने एक भावूक पोस्ट शेअर करत आयपीएलमधून निवृत्ती जाहीर केली आहे. मुंबई इंडियन्समध्ये नाही तर कोणत्याच संघात नाही असं स्पष्ट वक्तव्य करत 12 वर्षे मुंबईकडून खेळल्यानंतर पोलार्डने MI सह आयपीएलला अलविदा केला आहे.

'मुंबई इंडियन्स नाही तर कोणच नाही!'

पोलार्डने आपल्या पोस्टमध्ये लिहिले की, “मुंबई इंडियन्समध्ये बदलांची गरज आहे. जर मी आता मुंबई इंडियन्सकडून खेळू शकलो नाही तर मी स्वतःला मुंबईविरुद्ध खेळतानाही पाहू शकत नाही. मी कायम मुंबईचाच राहणार आहे.''

View this post on Instagram

A post shared by Kieron Pollard (@kieron.pollard55)

पोलार्ड आणि मुंबई इंडियन्स

पोलार्डने आपली संपूर्ण आयपीएल कारकीर्द मुंबईसोबत घालवली आहे. त्याने 171 डावात 3 हजार 412 धावा केल्या. आयपीएलमध्ये पोलार्डची फलंदाजीची सरासरी 28.67 होती, तर त्याच्या कारकिर्दीत स्ट्राईक-रेट 147.32 इतका होता. 16 अर्धशतके झळकावणाऱ्या पोलार्डला लीगमधील सर्वोत्तम फिनिशर मानले जाते. एका दशकाहून अधिक काळ मुंबईच्या प्लेइंग इलेव्हनमध्ये सर्वात सातत्यपूर्ण नाव असलेल्या पोलार्डने मागील हंगामात खास कामगिरी केली नाही. त्याने 11 सामन्यांत 14.40 च्या खराब सरासरीने केवळ 144 धावा केल्या होत्या. यादरम्यान त्याचा स्ट्राइक रेटही केवळ 107.46 होता. ज्यानंतर आता त्याने निवृत्ती जाहीर केली आहे.

23 डिसेंबरला मिनी लिलाव

पुढील वर्षी म्हणजेच 2023 मध्ये आयपीएलचा 16 व्या हंगाम खेळवला जाणार आहे. या हंगामासाठी 23 डिसेंबर रोजी कोचीमध्ये मिनी लिलाव होणार आहे. बीसीसीआयने सर्व आयपीएल संघांना 15 नोव्हेंबरपर्यंत त्यांच्या कायम ( Retained Players ) ठेवलेल्या खेळाडूंची यादी सादर करण्यास सांगितलं आहे.