Coronavirus | आयपीएलचा तेरावा सीझन लांबणीवर, 15 एप्रिलपासून सुरुवात होणार

कोरोना व्हायरसचा धोका पाहता आयपीएलच्या नव्या मोसमाचं आयोजन करण्यासाठी बीसीसीआयला अनेक अडचणींचा सामना करावा लागला होता. अखेर आयपीएलचं आयोजन लांबणीवर पडलं असून, 15 एप्रिलपासून सुरुवात होणार आहे.

मुंबई : कोरोना व्हायरसच्या पार्श्वभूमीवर 29 मार्चपासून सुरु होणारी इंडियन प्रीमियर लीग अर्थात आयपीएल 13चं आयोजन लांबणीवर पडलं आहे. 29 मार्चपासून सुरु होणारी स्पर्धा आता 15 एप्रिलपासून सुरु होणार आहे. इंटरनॅशनल क्रिकेट काऊन्सिलने (आयसीसी) ट्वीट करुन याबाबत माहिती दिली. आयपीएलमध्ये सहभागी होणाऱ्या संघांनीही हा मोसम 15 एप्रिलपर्यंत लांबणीवर टाकण्याची मागणी बीसीसीआयला केली होती. आयसीसीने आयपीएल 13च्या तारखा पुढे ढकलण्याचा निर्णय जाहीर केला. आयसीसीने ट्वीटमध्ये म्हटलं आहे की, इंडियन प्रीमियर लीगच्या तेराव्या सीझनची सुरुवात 29 मार्चऐवजी 15 एप्रिलपासून होईल. आयसीसीच्या घोषणेआधी अशी अटकळ बांधली जात होती की, शनिवारी (14 मार्च) होणाऱ्या आयपीएलच्या गर्व्हर्निंग काऊन्सिलच्या बैठकीत या मोसमाची तारीख पुढे ढकलण्याबाबत निर्णय होऊ शकतो.

COVID-19 outbreak: The start of IPL 2020 has been postponed from 29 March to 15 April. pic.twitter.com/Von1DWVoYa

— ICC (@ICC) March 13, 2020

याआधी दिल्ली सरकारने राज्यातील आयपीएल सामन्यांच्या आयोजनावर बंदी घातली होती. तर महाराष्ट्र सरकारने राज्यात आयपीएल तिकीटांच्या विक्री बंदी घालण्याची घोषणा केली होती. याशिवाय कर्नाटक सरकारचाही आपल्या राज्यात आयपीएल सामन्यांच्या आयोजनावर बंदी घालण्याबाबत विचार सुरु होता. #CoronaVirus | आयपीएलची तिकीट विक्री होणार नाही, आरोग्यमंत्री राजेश टोपेंची माहिती परदेशी खेळाडूंना व्हिसा नाही केंद्र सरकारने बुधवारी (11 मार्च) परदेशी खेळाडूंना व्हिसा देण्यास नकार दिला होता. सरकारने 15 एप्रिलपर्यंत परदेशी पर्यटकांना व्हिसा देण्यावर बंदी घातली आहे. सरकारच्या या निर्णयानंतर आयपीएलमधील विविध संघांनी ही स्पर्धा 15 एप्रिलपर्यंत लांबणीवर टाकण्याची मागणी बीसीसीआयला केली होती. 29 मार्च ते 24 मे दरम्यान आयपीएलच्या तेराव्या मोसमाचं आयोजन केलं जाईल, अशी घोषणा बीसीसीआयने सुरुवातीला केली होती. परंतु वेळापत्रकाबाबत बीसीसीआयने कोणतीही माहिती दिलेली नव्हती. Corona effect on India vs Africa ODI series | भारत-दक्षिण आफ्रिका संघांमधील दुसरा सामना प्रेक्षकांविनाच खेळवणार