IPL 2020 DC vs KXIP | मयंक अगरवालची धडाकेबाज खेळी अपयशी, पंजाबचा दिल्लीकडून सुपर ओव्हरमध्ये पराभव
आयपीएलच्या 13 व्या सीजनच्या दुसऱ्याच सामन्यात सुपर ओव्हरचा थरार पाहायला मिळाला. सुपरओव्हरमध्ये दिल्ली कॅपिटल्सने किंग्ज इलेव्हन पंजाबवर विजय मिळवला. मयंक अग्रवालची अर्धशतकी खेळी मात्र व्यर्थ ठरली.
IPL 2020 DCvsKXIP : आयपीएलच्या 13 व्या सीजनच्या दुसऱ्याच सामन्यात सुपर ओव्हरचा थरार पाहायला मिळाला. सुपरओव्हरमध्ये दिल्ली कॅपिटल्सने किंग्ज इलेव्हन पंजाबवर सहज मात केली. विजयासाठी पंजाबने दिल्लीला अवघ्या 3 धावांचं लक्ष्य दिलं होतं. पंजाबकडून सर्वोत्तम कामगिरी करणाऱ्या मयंक अगरवालला सुपरओव्हरमध्ये न उतरवल्याने आश्चर्य व्यक्त करण्यात येत आहे. दोन्ही संघांनी 157-157 धावा केल्याने सुपर ओव्हर खेळवण्यात आली. त्याआधी मयंक अगरवालने धडाकेबाज खेळी करत 59 चेंडूत 89 धावा केल्या. मात्र पंजाबला विजय मिळवून देऊ न शकल्याने त्याची खेळी व्यर्थ गेली. मार्क्स स्टॉयनिसने आणि कागिसो रबाडा दिल्लीच्या विजयाचे शिल्पकार ठरले.
त्याआधी पंजाबचा कर्णधार केएल राहुलने नाणेफेक जिंकून प्रथम क्षेत्ररक्षणाचा निर्णय घेतला. प्रथम फलंदाजीला आलेल्या दिल्लीचा डाव मोहम्मद शमीच्या भेदक माऱ्यासमोर सुरुवातीला गडगडला. सामन्याच्या सुरुवातीलाच तीन धक्के बसल्याननंतर कर्णधार श्रेयस अय्यरने 39 धावा आणि ऋषभ पंतने 31 धावा करत दिल्लीचा डाव सावरला. त्यानंतर दिल्लीकडून खेळणाऱ्या ऑस्ट्रेलियाचा मार्क्स स्टॉयनिसने धडाकेबाज खेळी करत सीजनमधलं जलद अर्धशतक साजरं केलं. त्याने अवघ्या 21 चेंडूत 51 धावांची खेळी केली. यामध्ये तीन षटकार आणि सात चौकारांचा समावेश होता. स्टॉयनिसच्या याच खेळीच्या जोरावर दिल्लीने पंजाबसमोर 158 धावांचं आव्हान ठेवलं. पंजाबकडून मोहम्मद शमीने सर्वाधिक 3 विकेट घेतल्या. तर शेल्डन कोट्रेलने 2 आणि रवी बिश्नोईने एक विकेट घेतली.
- IPL 2020, DCvKXIP : दिल्ली कॅपिटल्सला मोठा झटका, 'हा' स्टार गोलंदाज दुखापतग्रस्त
- IPL 2020 | किंग्ज इलेव्हन पंजाब सर्वाधिक कर्णधार बदलणारा संघ, केएल राहुल बारावा कर्णधार
रवी बिश्नोईचं पदार्पण
अंडर 19 स्टार रवी बिश्नोईने पंजाबकडून आयपीएलमध्ये पदार्पण केलं. त्याचा आज प्लेइंग इलेव्हनमध्ये समावेश करण्यात आला. फिरकीपटू बिश्नोईने यावर्षी जानेवारीत पार पडलेल्या अंडर 19 विश्वचषकात भारताकडून खेळला होता. विश्वचषकात बिश्नोईने चमकदार कामगिरी केली होती. महत्त्वाचे म्हणजे गेल्या वर्षी लिलावात किंग्ज इलेव्हन पंजाबने बिश्नोईला 2 कोटी रुपयांत खरेदी केलं होतं. फिल्पर्स, लेग-स्पिन आणि उत्कृष्ट गुगली ही बिश्नोईची जमेची बाजू आहे.
महत्त्वाच्या बातम्या
