...तसं म्हणायचं नव्हतं, मला माफ करा; 'त्या' वक्तव्यानंतर वकार युनिसचा माफीनामा

T20 World Cup : भारत-पाकिस्तान सामना सुरु असताना मोहम्मद रिझवानने मैदानातच नमाज पठण केलं होतं. तो आपल्यासाठी अभिमानाचा क्षण असल्याचं वकार युनिसने म्हटलं होतं. 

mohammad rizwan

मुंबई : भारत-पाकिस्तान सामन्याला चार दिवस उलटले तरीही त्यावरुन सुरु असलेल्या चर्चा काही थांबायचं नाव घेत नाहीत. मोहम्मद रिझवानने हिंदूंच्या मध्ये जाऊन नमाज पठण केलं, तो क्षण आपल्यासाठी अभिमानाचा असल्याचं वक्तव्य वकार युनिसने केलं होतं. त्यावर वाद निर्माण झाल्यानंतर आता आपण माफी मागत असल्याचं वकार युनिसने म्हटलं आहे.  

वकार युनिसने आपल्या ट्वीटमध्ये म्हटलं आहे की, "माझ्या वक्तव्याने अनेकांच्या भावना दुखावल्या गेल्या आहेत. त्याबद्दल मी माफी मागतो. मी जाणीवपूर्वक ते वक्तव्य केलं नाही. धर्म, वंश आणि वर्णाचा भेद पार करुन खेळ लोकांना एकत्र आणतो."

 

In the heat of the moment, I said something which I did not mean which has hurt the sentiments of many. I apologise for this, this was not intended at all, genuine mistake. Sports unites people regardless of race, colour or religion. #apologies 🙏🏻

— Waqar Younis (@waqyounis99) October 26, 2021

मोहम्मद रिझवानने सामना सुरु असताना मैदानातच नमाज पठण केलं होतं. त्यावर प्रतिक्रिया देताना वकार युनिस म्हणाला होता की, हिंदूंच्या समोर मोहम्मद रिझवानने नमाज पठण केलं हा आपल्यासाठी खास क्षण होता. त्याला उत्तर देताना हर्षा भोगले यांनी म्हटलंय की, "वकार युनिसचे हे वक्तव्य हे अत्यंत निराशाजनक आहे. अशा पद्धतीची वक्तव्यं करुन अनेकांनी खेळाच्या भावनेला खाली खेचण्याचं काम केलं आहे. या पद्धतीचे वक्तव्यं ही घातक आहेत."

टी-20 सामन्यामध्ये पाकिस्तानच्या विजयानंतर त्या देशाच्या मंत्र्यांने धार्मिक रंग देत हा इस्लामचा विजय असल्याचं म्हटलं होतं. त्यावरुन होत असलेला वाद ताजा असतानाच वकार युनिसने तशाच प्रकारचं वादग्रस्त वक्तव्य केलं होतं. 

टी-20 विश्वचषकात भारताची पराभवाने सुरुवात झाली. पहिल्याच सामन्यात पारंपरिक प्रतिस्पर्धी पाकिस्तानने (India Vs Pakistan) भारतावर 10 गडी राखून दणदणीत विजय मिळवला. भारताकडून मिळालेल्या 152 धावांचे लक्ष्य कर्णधार बाबर आझम आणि त्याचा सहकारी मोहम्मद रिझवानने सहज पूर्ण केले. पाकिस्तान विरोधातल्या या पराभवामुळे भारताचा विजयी रथ तब्बल 29 वर्षांनंतर रोखला गेला आहे. पाकिस्तानच्या या विजयानंतर पाकिस्तानचे पंतप्रधान आणि माजी कर्णधार इम्रान खान यांनी संघाचं अभिनंदन केलं आहे. त्यांनी एक फोटो ट्विट करत संघाला शुभेच्छा दिल्या आहेत. पाकिस्तान विरोधात पराभव झाल्यानंतर भारताचा पुढील सामना न्यूझीलंड आणि अफगाणिस्तान सोबत होणार आहे.