Ranji Trophy : टीम इंडियातील खेळाडूंच्या मनमानीला गंभीरने लावला चाप; करिअर वाचवण्यासाठी बड्या खेळाडूंचा मोठा निर्णय

रणजी ट्रॉफीच्या पुढील फेरीचे सामने 23 जानेवारीपासून सुरू होणार आहेत. जर सूत्रांवर विश्वास ठेवला तर, भारतातील अनेक स्टार क्रिकेटपटू देशांतर्गत क्रिकेटमध्ये परतणार आहेत.

Rishabh Pant Shubman Gill Yashasvi Jaiswal virat kohli

Source : ABP

Ranji Trophy 2024-25 : रणजी ट्रॉफीच्या पुढील फेरीचे सामने 23 जानेवारीपासून सुरू होणार आहेत. जर सूत्रांवर विश्वास ठेवला तर, भारतातील अनेक स्टार क्रिकेटपटू देशांतर्गत क्रिकेटमध्ये परतणार आहेत. चॅम्पियन्स ट्रॉफी 2025 जवळ येत आहे, ज्यासाठी संघाची घोषणा 18 किंवा 19 जानेवारी रोजी केली जाणार आहे. या संघाच्या घोषणेनंतर रणजी ट्रॉफी सामने खेळले जाणार आहेत, जरी त्याची इंग्लंडविरुद्धच्या एकदिवसीय मालिकेसाठी निवड झाली तरी, त्यांना एक रणजी सामना खेळण्यासाठी वेळ मिळेल. कारण भारत-इंग्लंड एकदिवसीय मालिका 6 फेब्रुवारीपासून सुरू होणार आहे. 

ऑस्ट्रेलिया दौऱ्यातील पराभवानंतर कोच गौतम गंभीरने संघातील स्टार खेळाडूंना कसोटी बॉल क्रिकेटमध्ये टिकायचं असेल तर देशांतर्गत क्रिकेट खेळा, असा सल्ला दिला होता. आता हा सल्ला विराट कोहली, ऋषभ पंतसह शुभमन गिलनही मनावर घेतल्याचे दिसत आहे. त्यामुळे रणजी ट्रॉफीच्या पुढील फेरीत कोणते खेळाडू पुनरागमन करणार आहेत ते येथे जाणून घेऊया.....

ऋषभ पंत

रेड चेंडूच्या क्रिकेटमध्ये ऋषभ पंत भारतीय संघासाठी ट्रम्प कार्ड राहिला आहे, परंतु पांढऱ्या चेंडूच्या क्रिकेटमध्ये त्याची आकडेवारी खूपच खराब आहे. 33 एकदिवसीय सामने खेळूनही तो एक हजार धावांचा आकडा गाठू शकलेला नाही. हिंदुस्तान टाईम्सच्या वृत्तानुसार, डीडीसीएचे सचिव अशोक शर्मा यांनी पुष्टी केली आहे की, पंत 23 जानेवारीपासून सुरू होणाऱ्या सौराष्ट्र विरुद्धच्या सामन्यात दिल्ली संघाकडून खेळेल. 

विराट कोहली

विराट कोहली 2012 मध्ये शेवट देशांतर्गत क्रिकेट खेळताना दिसला होता. एकीकडे, डीडीसीएचे सचिव अशोक शर्मा यांनी ऋषभ पंत पुढील सामन्यात खेळेल याची पुष्टी केली आहे, परंतु विराट कोहलीबद्दल अद्याप काहीही स्पष्ट झालेले नाही. पण निवृत्तीच्या वाढत्या दबावात आणि आपला गमावलेला फॉर्म परत मिळवण्यासाठी विराट कदाचित देशांतर्गत क्रिकेटचा मार्ग निवडू शकतो. जर विराट कोहली आणि रोहित शर्मा यांनी चॅम्पियन्स ट्रॉफीमध्ये चांगली कामगिरी केली नाही तर त्यांना संघातून वगळले जाऊ शकते, असे बीसीसीआयने स्पष्ट केले आहे.

यशस्वी जैस्वाल

यशस्वी जैस्वाल हा देशांतर्गत क्रिकेटमध्ये मुंबई संघाकडून खेळतो. एका मीडिया रिपोर्टनुसार, मुंबई क्रिकेट असोसिएशनच्या सूत्रांनी सांगितले की, जैस्वाल सराव सत्रांमध्ये खेळाडूंसोबत असेल आणि 23 जानेवारीपासून जम्मू आणि काश्मीरविरुद्धच्या सामन्यात खेळताना दिसतील. भारतासाठी टी-20 आणि कसोटी संघात जैस्वालची कामगिरी आतापर्यंत चांगली राहिली आहे, परंतु आजकाल चॅम्पियन्स ट्रॉफीसाठी त्याला एकदिवसीय संघात समाविष्ट करण्याची मागणी वाढत आहे.

शुभमन गिल

शुभमन गिलची कसोटीतील अलीकडील कामगिरी पाहता, त्याला टीम इंडियामधून वगळण्याची मागणी होत आहे. अशा परिस्थितीत, तो 23 जानेवारीपासून सुरू होणाऱ्या कर्नाटकविरुद्धच्या सामन्यात पंजाब संघाकडून खेळताना दिसू शकतो. इंग्लंडविरुद्धच्या टी-20 मालिकेसाठी त्याची निवड झाली नसल्याने त्याच्याकडे किमान एक रणजी ट्रॉफी सामना खेळण्यासाठी वेळ आहे.

हे ही वाचा -